Dead Body | 22 ലക്ഷം പാരിതോഷികം പ്രഖ്യാപിച്ച ആ നായക്കുട്ടി ഇനി തിരിച്ചുവരില്ല, മൃതദേഹം കണ്ടെത്തി

ഒരു നായക്കുട്ടിക്ക് വേണ്ടി ഇത്രയധികം പണം പാരിതോഷികം പ്രഖ്യാപിച്ചത് എല്ലാവര്‍ക്കും അത്ഭുതമായിരുന്നു. മൂന്നു വയസ്സുള്ള കൊക്കാപ്പൂ ഇനത്തിലുള്ള നായക്കുട്ടിയെ കണ്ടെത്തുന്നവര്‍ക്ക് 100,000 ദിര്‍ഹം (22 ലക്ഷത്തിലേറെ ഇന്‍ഡ്യന്‍ രൂപ) ആണ് പാരിതോഷികം പ്രഖ്യാപിച്ചിരുന്നത്. നായക്കുട്ടിയുടെ ഫോടോ പതിച്ച ഫ്‌ളെയറുകളും വ്യാപകമായി വിതരണം ചെയ്തിരുന്നു

നായയെ തിരികെ നല്‍കുന്നവരോട് ചോദ്യങ്ങളൊന്നും ചോദിക്കില്ലെന്നും ഉടമ വ്യക്തമാക്കിയിരുന്നു. എമിറേറ്റ്‌സ് എയര്‍ലൈന്‍സ് ആസ്ഥാനത്തിന് സമീപമുള്ള ആരോഗ്യ പരിശോധനാ കേന്ദ്രത്തിലേക്കുള്ള യാത്രയ്ക്കിടെ,
വളര്‍ത്തുമൃഗങ്ങളെ പരിചരിക്കുന്ന പെറ്റ് റീലൊകേഷന്‍ കംപനിയുടെ വാഹനത്തില്‍ നിന്നുമാണ് നായയെ കാണാതായത്. കംപനിയിലെ ജീവനക്കാര്‍ ഉടന്‍ തന്നെ നായയെ പിന്തുടര്‍ന്നെങ്കിലും കണ്ടെത്താന്‍ സാധിച്ചില്ല. ശനിയാഴ്ച വൈകുന്നേരം 6.40ന് അല്‍ ഗര്‍ഹൂദിലെ ഡി 27 സ്ട്രീറ്റില്‍ ആയിരുന്നു നായയെ അവസാനമായി കണ്ടത്.

ചൊവ്വാഴ്ച രാവിലെ ഇതേ നായക്കുട്ടിയെന്ന് സംശയിക്കുന്ന ഒരു ചത്ത നായയുടെ ചിത്രം ഉടമയ്ക്ക് ആരോ അയച്ചുനല്‍കുകയായിരുന്നു. പരിശോധനയില്‍ അത് തങ്ങളുടെ വളര്‍ത്തുനായ തന്നെയാണെന്ന് ഉടമ തിരിച്ചറിയുകയായിരുന്നു. നായയുടെ സുരക്ഷിതമായ തിരിച്ചു വരവ് കാത്തിരുന്ന കുടുംബത്തിന് ഈ വാര്‍ത്ത വലിയ ആഘാതമായിരുന്നു. ഞങ്ങളുടെ ഹൃദയം തകര്‍ന്നു. ഹൃദയഭേദകമായ ഈ വാര്‍ത്ത അംഗീകരിക്കാന്‍ പ്രയാസപ്പെടുകയാണ് കുടുംബമെന്നും വക്താവ് വെളിപ്പെടുത്തി.

കംപനിയുടെ ഭാഗത്തുനിന്നുണ്ടായ വീഴ്ചയാണ് കഡില്‍സിനെ നഷ്ടപ്പെടാന്‍ കാരണമെന്ന് ഉടമ കുറ്റപ്പെടുത്തി. ആരോഗ്യ പരിശോധനയ്ക്കായി കഡില്‍സിനെ കൊണ്ടുപോകുമ്പോള്‍ കംപനി ജീവനക്കാരുടെ ഭാഗത്ത് നിന്നും അശ്രദ്ധ സംഭവിച്ചു. കൃത്യമായ പരിചരണവും മേല്‍നോട്ടവും ഉറപ്പാക്കുന്നതില്‍ കംപനി പരാജയപ്പെട്ടെന്നും ഉടമ ആരോപിച്ചു. കാറിടിച്ച് ചത്തതോടെ പെറ്റ് റീലോകേഷന്‍ കംപനിക്കെതിരെ കഡില്‍സിന്റെ ഉടമ കേസ് നല്‍കുമോയെന്ന കാര്യത്തില്‍ വ്യക്തതയില്ല.