Attacked | കെഎസ്എഫ്ഇ ഓഫീസില്‍ ജീവനക്കാരിയെ വെട്ടിക്കൊലപ്പെടുത്താന്‍ ശ്രമം; സഹോദരീ ഭര്‍ത്താവ് പിടിയില്‍

ആലപ്പുഴ: (KVARTHA) കളര്‍കോട് കെഎസ്എഫ്ഇ ഓഫീസില്‍ കളക്ഷന്‍ ഏജന്റായ ജീവനക്കാരിയെ വെട്ടിക്കൊലപ്പെടുത്താന്‍ ശ്രമം. പുന്നപ്ര തെക്ക് പഞ്ചായത് ആറാം വാര്‍ഡില്‍ രജീഷിന്റെ ഭാര്യ മായക്കാണ് അനുജത്തിയുടെ ഭര്‍ത്താവ് സുരേഷ് ബാബുവില്‍നിന്ന് കുത്തേറ്റത്. സംഭവത്തില്‍ മായയുടെ സഹോദരീ ഭര്‍ത്താവ് സുരേഷ് ബാബുവിനെ പൊലീസ് അറസ്റ്റ് ചെയ്തു.

സൗത് പൊലീസ് പറയുന്നത്: തിങ്കളാഴ്ച ഉച്ചയോടെയാണ് തിരക്കേറിയ കെഎസ്എഫ്ഇ കളര്‍കോട് ശാഖയില്‍ വെച്ച് യുവതിക്ക് വെട്ടേല്‍ക്കുന്നത്. മായ പണമടക്കാനായാണ് ശാഖയില്‍ എത്തിയത്. മറ്റ് ജീവനക്കാരുമായി സംസാരിച്ച് നില്‍ക്കുന്നതിനിടയില്‍ പിറകില്‍നിന്ന് വന്ന സുരേഷ് കയ്യില്‍ കരുതിയിരുന്ന വടിവാള്‍ ഊരി മായയുടെ കഴുത്ത് ലക്ഷ്യമാക്കി വെട്ടുകയായിരുന്നു. വഴുതി മാറിയതിനാല്‍ തോളിനാണ് മുറിവേറ്റത്.

വെട്ടിക്കൊലപ്പെടുത്താന്‍ ശ്രമിക്കുന്നതിനിടെ ഓഫീസിലെ ജീവനക്കാര്‍ ചേര്‍ന്നാണ് പ്രതിയെ കീഴ്‌പ്പെടുത്തിപൊലീസിന് കൈമാറിയത്. വൈദ്യ പരിശോധനയില്‍ ഷുഗര്‍ താഴ്ന്നതിനെ തുടര്‍ന്ന് പ്രതി വണ്ടാനം മെഡികല്‍ കോളജില്‍ നിരീക്ഷണ വിഭാഗത്തിലാണ്. മായയെ ആശുപത്രിയില്‍ പ്രവേശിപ്പിച്ചു.

സുരേഷ് ബാബു മദ്യപിച്ച് ഭാര്യ അശ്വതിയെ ഉപദ്രവിക്കുക പതിവായിരുന്നു. വിവാഹ ബന്ധം വേര്‍പെടുത്താന്‍ നിയനടപടികള്‍ സ്വീകരിച്ചശേഷം കഴിഞ്ഞ ഒരു വര്‍ഷമായി അശ്വതി കുട്ടികളുമൊത്ത് കളര്‍കോടുള്ള സ്വന്തം വീട്ടിലാണ് താമസം. അതിനിടെ നാലാം ക്ലാസ് വിദ്യാര്‍ഥിയായ മകനെ കൂട്ടികൊണ്ടുപോകാന്‍ സുരേഷ് ബാബു ശ്രമിച്ചിരുന്നു. ഈ സംഭവത്തില്‍ സുരേഷിന്റെ ഭാര്യ പരാതി നല്‍കിയതിന്റെ അടിസ്ഥാനത്തില്‍ ഇയാള്‍ കേസില്‍ ജയിലില്‍ ആയിരുന്നു.