Dog Attacked | കണ്ണൂരില്‍ വീണ്ടും തെരുവ് നായയുടെ ആക്രമണം; 6 വയസുകാരി ഉള്‍പെടെയുളള 10 പേര്‍ക്ക് കടിയേറ്റു

പരുക്കേറ്റ് ആശുപത്രിയിലെത്തിയവരെ പഞ്ചായത് പ്രസിഡന്റ് ശ്രീഷ സന്ദര്‍ശിച്ചു. പഞ്ചായതില്‍ വര്‍ധിച്ചു വരുന്ന തെരുവ് നായ ശല്യം നിയന്ത്രിക്കാന്‍ ആവശ്യമായ നടപടികള്‍ സ്വീകരിക്കുമെന്ന് പഞ്ചായത് പ്രസിഡന്റ് അറിയിച്ചു. ബുധനാഴ്ച രാവിലെ 8.30 മുതലാണ് വിറളി പിടിച്ചോടിയ നായ ബസ് കാത്തു നിന്നവരെയും വഴി യാത്രികരെയും വീട്ടുമുറ്റത്ത് നിന്നവരെയും ഉള്‍പെടെ ആക്രമിച്ചത്.

യു കെ ജി വിദ്യാര്‍ഥിനിയായ ആറു വയസുകാരിയെ കോറോത്ത് പീടികക്കടുത്ത് സ്‌കൂള്‍ ബസ് കാത്തു നില്‍ക്കുന്നതിനിടെയാണ് കടിച്ചത്. കുട്ടിക്ക് ഷോള്‍ഡറിനും, തുടയിലും ആഴത്തില്‍ മുറിവേറ്റു. പെണ്‍കുട്ടിയുടെ ഇളയമ്മ പ്രേമജ (58), ചുങ്കത്തെ വിജയന്‍(58), ഇളയടത്ത് മുക്കിലെ കണ്ണോത്ത് വലിയ പറമ്പില്‍ അനന്യ(15), പാലയാട്ടെ പത്മിനി നിവാസില്‍ മഹേഷ്(50), ചോനാടം അണ്ടിക്കംപനിക്കടുത്ത കച്ചവടക്കാരന്‍ സുശാന്ത്(58), ചോനാടം ബല്ല അപാര്‍ട് മെന്റ് ഉടമ ജോര്‍ജ് (65), ചോനാടം വാഴയില്‍ വീട്ടില്‍ ശ്രേയ(20) എന്നിവരാണ് ചികിത്സയിലുള്ളത്.

ജോലിക്കായി ചോനാടം ഭാഗത്ത് എത്തിയപ്പോഴാണ് പാലയാട്ടെ മഹേഷിന് കടിയേറ്റത്. ഇതോടെ ഭയപ്പാടിലായ പ്രദേശവാസികള്‍ അക്രമിയായ തെരുവുനായയെ തേടി പിടിച്ചു പിന്നീട് തല്ലിക്കൊല്ലുകയായിരുന്നു.