AIMIM | തെലങ്കാനയിൽ അസദുദ്ദീൻ ഉവൈസിയുടെ പാർട്ടിക്ക് ഞെട്ടൽ; സ്വന്തം കോട്ടകളിൽ പിന്നിലായി; മുസ്ലീം വോട്ടുകൾ പോയതെങ്ങോട്ട്?

നിലവിൽ ചന്ദ്രയാൻഗുട്ട, മലക്പേട്ട്, ചാർമിനാർ, ബഹദൂർപുര നിയമസഭാ മണ്ഡലങ്ങളിലാണ് എഐഎംഐഎം സ്ഥാനാർത്ഥികൾ ലീഡ് ചെയ്യുന്നത്. നാമ്പള്ളി പോലുള്ള കോട്ടകളിൽ കോൺഗ്രസിനോട് എഐഎംഐഎം തോൽക്കുന്നത് വർഷങ്ങൾക്ക് ശേഷം ഇതാദ്യമായിരിക്കും. അസദുദ്ദീൻ ഉവൈസി ശക്തമായ പ്രചാരണം നടത്തിയ മണ്ഡലം കൂടിയാണ് നാമ്പള്ളി. തിരഞ്ഞെടുപ്പിൽ ഒമ്പത് സീറ്റുകളിലാണ് പാർട്ടി മത്സരിച്ചത്. ഇതിൽ ഏഴ് സീറ്റുകൾ പഴയ ഹൈദരാബാദ് മേഖലയിൽ നിന്നുള്ളതാണ്.

തെലങ്കാനയിൽ തിരഞ്ഞെടുപ്പ് പ്രചാരണത്തിനിടെ കോൺഗ്രസും ഉവൈസിയും തമ്മിൽ രൂക്ഷമായ വാക് പോരായിരുന്നു. പൊതുയോഗങ്ങളിൽ കോൺഗ്രസ് നേതാക്കളും ഉവൈസിയും പരസ്പരം ആക്രമിക്കുന്ന ദൃശ്യങ്ങളാണ് പുറത്തുവന്നത്. സംസ്ഥാനത്ത് ഭരണകക്ഷിയായ ബിആർഎസുമായി ഉവൈസിയുടെ പാർട്ടിക്ക് സഖ്യമുണ്ട്. എന്നാൽ ഹൈദരാബാദ് മേഖലയിൽ ഇരുപാർട്ടികളും സൗഹൃദമത്സരത്തിലായിരുന്നു.

ഹൈദരാബാദ് ലോക്‌സഭാ മണ്ഡലത്തിലും നഗരത്തിലെ ഏഴ് മുസ്ലീം ഭൂരിപക്ഷ നിയമസഭാ മണ്ഡലങ്ങളിലും ആധിപത്യം നിലനിർത്തുമ്പോൾ തന്നെ, 2014-ലെയും 2019-ലെയും തിരഞ്ഞെടുപ്പുകളിൽ എഐഎംഐഎം സംസ്ഥാനത്തിന്റെ മറ്റ് ഭാഗങ്ങളിൽ ടിആർഎസിനെ പിന്തുണച്ചിരുന്നു. ഈ സൗഹൃദവും മുഖ്യമന്ത്രി കെ ചന്ദ്രശേഖർ റാവുവിന്റെ മതേതര പ്രതിച്ഛായയും സംസ്ഥാനത്തെ 40 ലക്ഷം വരുന്ന മുസ്‌ലിംകളുടെ പിന്തുണ ഉറപ്പാക്കാൻ ബിആർഎസിനെ സഹായിക്കുകയും ചെയ്തിരുന്നു.

സംസ്ഥാനത്തെ 119 സീറ്റുകളിൽ 45 ലും മുസ്ലീം വോട്ട് നിർണായകമാണ്. എഐഎംഐഎം മത്സരിക്കാത്ത സീറ്റുകളിൽ മുസ്ലീം വോട്ടർമാർ ബിആർഎസിന് വോട്ട് ചെയ്യണമെന്ന് ഉവൈസി ജനങ്ങളോട് അഭ്യർത്ഥിച്ചിരുന്നു.
ഇതാണ് തെലങ്കാന നിയമസഭാ തെരഞ്ഞെടുപ്പിന്റെ പ്രചാരണത്തിനിടെ കോൺഗ്രസ് എഐഎംഐഎമ്മിനെ രൂക്ഷമായി ലക്ഷ്യമിട്ടത്. തെലങ്കാനയിലെ മുസ്ലീം ജനസംഖ്യ മൊത്തം ജനസംഖ്യയുടെ 13 ശതമാനമാണ്. ഹൈദരാബാദിലെ 10 നിയോജക മണ്ഡലങ്ങളിൽ 35 മുതൽ 60 ശതമാനം വരെ മുസ്ലീം വോട്ടർമാർ ഉണ്ടെന്നാണ് കണക്ക്. എന്നാൽ മുസ്ലിം വോട്ടുകൾ ഇത്തവണ കോൺഗ്രസിനെ തുണച്ചുവെന്നാണ് വ്യക്തമാകുന്നത്. < !- START disable copy paste -->