മട്ടന്നൂര്‍: (www.kvartha.com) കണ്ണൂര്‍ അന്താരാഷട്ര വിമാനത്താവളത്തില്‍ വന്‍സ്വര്‍ണവേട്ട, അറുപതു ലക്ഷത്തോളം രൂപ വിലവരുന്ന 995 ഗ്രാം സ്വര്‍ണവുമായി കണ്ണൂര്‍ പൊലീസ് സ്റ്റേഷന്‍ പരിധിയിലെ യുവാവ് കസ്റ്റംസ് പിടിയില്‍. വെളളിയാഴ്ച രാത്രി എയര്‍ ഇന്‍ഡ്യാ എക്സ്പ്രസ് വിമാനത്തില്‍ റിയാദില്‍ നിന്നെത്തിയ റശീദില്‍ നിന്നാണ് സ്വര്‍ണം പിടികൂടിയത്.
കസ്റ്റംസിന്റെ ചെകിങ് ഇന്‍ പരിശോധനയില്‍ സംശയം തോന്നിയതിനെ തുടര്‍ന്ന് യാത്രക്കാരനെ കസ്റ്റഡിയിലെടുത്തു പരിശോധിച്ചപ്പോഴാണ് സ്വര്‍ണം കണ്ടെത്തിയത്. പേസ്റ്റ് രൂപത്തിലുളള സ്വര്‍ണം നാലുഗുളികകളാക്കി മലദ്വാരത്തില്‍ ഒളിപ്പിച്ച നിലയില്‍ കണ്ടെത്തുകയായിരുന്നു.
കസ്റ്റംസ് അസി. കമിഷണര്‍ വിബി സുബ്രഹ്‌മണ്യന്‍, സൂപ്രണ്ടുമാരായ ബാബു, ദീപക് മീണ, ഇന്‍സ്പെക്ടര്‍മാരായ രാധാകൃഷ്ണന്‍, ഷമ്മി ജോസ്, രാജശേഖരന്‍ റെഡ്ഡി, ഗൗരവ് സിക്കര്‍വാര്‍, നിതേഷ്, വത്സല എന്നിവര്‍ റെയ്ഡില്‍ പങ്കെടുത്തു.
റശീദിനെ ചോദ്യം ചെയ്തതിനു ശേഷം മട്ടന്നൂര്‍ വിമാനത്താവള പൊലീസിന് തുടര്‍നടപടികള്‍ക്കായി കൈമാറി. വരുംദിവസങ്ങളിലും പരിശോധന ശക്തമാക്കുമെന്ന് കസ്റ്റംസ് അധികൃതര്‍ അറിയിച്ചു.
Keywords: Youth arrested with gold worth 60 lakhs at Kannur airport, Kannur, News, Gold Smuggling, Arrested, Customes, Air India, Flight, Passenger, Kerala News.
