EP Jayarajan | ആലുവയിലെ 5 വയസുകാരിയുടെ കൊലപാതകത്തില്‍ പ്രതിപക്ഷ നേതാവ് വേട്ടക്കാരനൊപ്പമെന്ന് എല്‍ഡിഎഫ് കണ്‍വീനര്‍

കണ്ണൂര്‍: (www.kvartha.com) ആലുവയില്‍ അഞ്ചുവയസുകാരിയുടെ കൊലപാതകത്തില്‍ പ്രതിപക്ഷ നേതാവ് വി ഡി സതീശന്‍ രാഷ്ട്രീയ മുതലെടുപ്പിന് ശ്രമിക്കുന്നുവെന്ന് എല്‍ഡിഎഫ് കണ്‍വീനര്‍ ഇ പി ജയരാജന്‍ പറഞ്ഞു. കണ്ണൂര്‍ പാപ്പിനിശേരിയില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം. ഒരിക്കലും ഒരു പ്രതിപക്ഷ നേതാവ് ഇത്തരത്തിലൊരു നിലപാട് സ്വീകരിക്കാന്‍ പാടില്ലാത്തതാണ്. ഇരയോടൊപ്പം നില്‍ക്കാനല്ല വേട്ടക്കാരന്റെ കൂടെ ഓടാനാണ് പ്രതിപക്ഷ നേതാവ് ശ്രമിക്കുന്നത്.
      
ആലുവയിലെ കൊലപാതകത്തില്‍ പൊലീസ് അറസ്റ്റു ചെയ്തു ഫലപ്രദമായ നടപടി സ്വീകരിച്ചു വരുന്നതിനിടെ പൊലീസിനെ തളര്‍ത്താനാണ് പ്രതിപക്ഷ നേതാവ് വിമര്‍ശനങ്ങള്‍ ഉന്നയിക്കുന്നതെന്നും ജയരാജന്‍ പറഞ്ഞു. പ്രതിയെ അതിവേഗം പിടികൂടിയ പൊലീസിന് തെളിവെടുപ്പിനായി അവിടെ കൊണ്ടു പോകാന്‍ കഴിഞ്ഞില്ല. ആലുവയിലെ ജനങ്ങളുടെ രോഷം കാരണം പൊലീസ് മടങ്ങുകയായിരുന്നു. ഇത്തരമൊരു സാഹചര്യത്തിലാണ് പ്രതിപക്ഷ നേതാവ് പൊലീസിനെ വിമര്‍ശിക്കുന്നതെന്നു ഓര്‍ക്കണമെന്നും ഇ പി ജയരാജന്‍ പറഞ്ഞു. < !- START disable copy paste -->