തിരുവനന്തപുരം: (www.kvartha.com) സംസ്ഥാനത്ത് മഴ മുന്നറിയിപ്പില് മാറ്റം. അടുത്ത മണിക്കൂറുകളില് വടക്കന് ജില്ലകളില് ഒറ്റപ്പെട്ട സ്ഥലങ്ങളില് ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഈ സാഹചര്യത്തില് കാസര്കോട്, കണ്ണൂര്, വയനാട് ജില്ലകളില് മഞ്ഞ ജാഗ്രത പ്രഖ്യാപിച്ചു.
മണ്സൂണ് പാത്തി അതിന്റെ സാധാരണ സ്ഥാനത്ത് നിന്നും തെക്കോട്ടു മാറി സ്ഥിതി ചെയ്യുന്നു. തെക്കന് ഗുജറാത് തീരം മുതല് വടക്കന് കേരള തീരം വരെ തീരദേശ ന്യൂനമര്ദ പാത്തിയും ഝാര്ഖണ്ഡിന് മുകളില് ചക്രവാതച്ചുഴിയും നിലനില്ക്കുന്നു. വടക്ക് കിഴക്കന് അറബിക്കടലില് ഗുജറാത്ത് തീരത്തിനു സമീപം മറ്റൊരു ചക്രവാതച്ചുഴിയും നിലനില്ക്കുന്നുണ്ട്. ഇതിന്റെയെല്ലാം സ്വാധീനഫലമായാണ് കേരളത്തില് മഴ ലഭിക്കുന്നതെന്നും കാലാവസ്ഥ വകുപ്പിന്റെ മുന്നറിയിപ്പില് പറയുന്നു.
അതേസമയം, തിങ്കളാഴ്ച (10.07.2023) എറണാകുളം, കണ്ണൂര്, കാസര്കോട് ജില്ലകളിലെ ഒറ്റപ്പെട്ട സ്ഥലങ്ങളില് ശക്തമായ മഴ ലഭിക്കുമെന്നും കാലാവസ്ഥ വകുപ്പ് പ്രവചിക്കുന്നു. എന്നാല് ചൊവ്വാഴ്ച (11.07.2023) ഒരു ജില്ലയിലും മഴ മുന്നറിയിപ്പ് ഇല്ല. ബുധനാഴ്ച (12.07.2023) കണ്ണൂര്, കാസര്കോട് ജില്ലകളിലും വ്യാഴാഴ്ച (13.07.2023) കണ്ണൂര്, കാസര്കോട്, കോഴിക്കോട്, തൃശൂര് ജില്ലകളിലും മഞ്ഞ ജാഗ്രത പ്രഖ്യാപിച്ചിട്ടുണ്ട്.
Keywords: News, Kerala, Kerala-News, Weather, Weather-News, Weather, Alerts, Rain, Kerala, Changed, Thiruvananthapuram, Kerala rain alerts changed.