HC Verdict | ഒരു സ്ത്രീയും പുരുഷനും ഒപ്പം താമസിച്ചു എന്നത് ലൈംഗിക ബന്ധത്തിന് സമ്മതം നൽകിയിട്ടുണ്ടെന്ന് അനുമാനിക്കാനാവില്ലെന്ന് ഹൈകോടതി

ന്യൂഡെൽഹി: (www.kvartha.com) ഒരു സ്ത്രീ പുരുഷനോടൊപ്പം സഹവസിക്കാൻ സമ്മതിച്ചാൽ അവൾ ലൈംഗിക ബന്ധത്തിന് സമ്മതം നൽകിയിട്ടുണ്ടെന്ന് അനുമാനിക്കാനാവില്ലെന്ന് ഡെൽഹി ഹൈകോടതി. സഹവാസത്തിനുള്ള സമ്മതവും ലൈംഗിക ബന്ധത്തിനുള്ള സമ്മതവും തമ്മിലുള്ള വ്യത്യാസം വ്യക്തമാക്കേണ്ടതുണ്ടെന്ന് ജസ്റ്റിസ് അനുപ് ജയറാം ഭംഭാനി നിരീക്ഷിച്ചു. ചെക്ക് സ്വദേശിനിയെ ബലാത്സംഗം ചെയ്‌തെന്ന കേസിൽ കുറ്റാരോപിതന് ജാമ്യം നിഷേധിച്ച് കൊണ്ടാണ് കോടതി ഈ നിരീക്ഷണം നടത്തിയത്.

ഭർത്താവിന്റെ മരണശേഷം ആചാരാനുഷ്ഠാനങ്ങൾ നടത്താൻ സഹായിക്കുന്നതിനായി ആത്മീയ ഗുരുവായി എത്തിയ ഇയാൾ യുവതിയെ ബലാത്സംഗം ചെയ്യുകയായിരുന്നുവെന്നാണ് കേസ്. 2019-ൽ ഡെൽഹിയിലെ ഹോസ്റ്റലിൽ വെച്ച് ഇയാൾ ഇരയെ ലൈംഗികമായി പീഡിപ്പിക്കുകയും പിന്നീട് 2020 ജനുവരി, ഫെബ്രുവരി മാസങ്ങളിൽ പ്രയാഗ്‌രാജിലും ബിഹാറിലും വെച്ച് ശാരീരിക ബന്ധത്തിലേർപ്പെടുകയും ചെയ്തുവെന്നാണ് ആരോപണം. ഇന്ത്യൻ ശിക്ഷാ നിയമം 354, 376 വകുപ്പുകൾ പ്രകാരം കഴിഞ്ഞ വർഷം മാർച്ചിൽ കേസ് രജിസ്റ്റർ ചെയ്യുകയും 2022 മെയ് മാസത്തിൽ കുറ്റപത്രം സമർപ്പിക്കുകയും ചെയ്തു. തുടർന്നാണ് ജാമ്യം തേടി കുറ്റാരോപിതൻ കോടതിയെ സമീപിച്ചത്.