MBBS exam | ഒടുവില്‍ കുട്ടികളുടെ അപേക്ഷ കേന്ദ്രസര്‍കാര്‍ കേട്ടു: യുദ്ധത്തെ തുടര്‍ന്ന് യുക്രൈനില്‍ നിന്ന് മടങ്ങിയെത്തിയ മെഡികല്‍ വിദ്യാര്‍ഥികള്‍ക്ക് രാജ്യത്ത് എം ബി ബി എസ് പരീക്ഷ എഴുതാന്‍ അവസരം

ന്യൂഡെല്‍ഹി: (www.kvartha.com) യുദ്ധത്തെ തുടര്‍ന്ന് യുക്രൈനില്‍ നിന്ന് മടങ്ങിയെത്തിയ മെഡികല്‍ വിദ്യാര്‍ഥികള്‍ക്ക് രാജ്യത്ത് എം ബി ബി എസ് പരീക്ഷ എഴുതാന്‍ അവസരം നല്‍കുമെന്ന് കേന്ദ്ര സര്‍കാര്‍ അറിയിച്ചു. എം ബി ബി എസ് പാര്‍ട് 1, പാര്‍ട് 2 എന്നിവ പാസാകാന്‍ വിദ്യാര്‍ഥികള്‍ക്ക് അന്തിമ അവസരം നല്‍കുമെന്നാണ് സര്‍കാര്‍ സുപ്രീം കോടതിയെ അറിയിച്ചത്.

ഇന്‍ഡ്യന്‍ എം ബി ബി എസ് പരീക്ഷാ സിലബസിനെ അടിസ്ഥാനമാക്കിയുള്ളതായിരിക്കും തിയറി പരീക്ഷ എന്നും തിരഞ്ഞെടുത്ത സര്‍കാര്‍ മെഡികല്‍ കോളജുകളിലാണ് പ്രാക്ടികല്‍ നടത്തുക എന്നും സര്‍കാര്‍ വ്യക്തമാക്കി. ഈ രണ്ട് പരീക്ഷകളും വിജയിച്ച വിദ്യാര്‍ഥികള്‍ രണ്ട് വര്‍ഷ നിര്‍ബന്ധിത ഇന്റേണ്‍ഷിപ് പൂര്‍ത്തിയാക്കണമെന്നും സര്‍കാര്‍ അറിയിച്ചു.

ആദ്യ വര്‍ഷം സൗജന്യമായിരിക്കും. രണ്ടാം വര്‍ഷം എന്‍എംസി (നാഷനല്‍ മെഡികല്‍ കമീഷന്‍) തീരുമാനിച്ച പ്രകാരമുള്ള തുക നല്‍കുമെന്നും കേന്ദ്രം അറിയിച്ചു. ഇത് ഒറ്റത്തവണത്തേക്ക് മാത്രമുള്ള തീരുമാനമാണെന്നും നിലവിലുള്ള കാര്യങ്ങള്‍ക്ക് മാത്രമേ ഇത് ബാധകമാകൂ എന്നും കേന്ദ്രം വ്യക്തമാക്കി.

ഇന്‍ഡ്യക്കാരായ നിരവധി വിദ്യാര്‍ഥികളാണ് യുക്രൈനില്‍ എം ബി ബി എസ് പഠിതാക്കളായി ഉണ്ടായിരുന്നത്. റഷ്യന്‍ അധിനിവേശത്തോടെ ഇവരുടെ പഠനം പാതിവഴിയില്‍ ഉപേക്ഷിച്ച് നാട്ടിലേക്ക് വരാന്‍ നിര്‍ബന്ധിതരായി. യുദ്ധത്തെ തുടര്‍ന്ന് സ്വന്തം നാട്ടിലെത്തിയ വിദ്യാര്‍ഥികള്‍ക്ക് മടങ്ങാന്‍ കഴിഞ്ഞിരുന്നില്ല.

Keywords: Ukraine-returned medical students to get a chance to clear MBBS exam, Centre tells SC, New Delhi, News, Education, Ukraine, Students, Examination, Supreme Court of India, National.