തളിപ്പറമ്പിലെ പ്രമുഖ കോണ്‍ഗ്രസ് നേതാവ് സിസി ശ്രീധരന്‍ ഉള്‍പ്പെടെ 19 പേരാണ് പാര്‍ടി ഭാരവാഹിത്വം രാജിവെച്ച് ഡിസിസി പ്രസിഡന്റിന് കത്ത് നല്‍കിയത്. മുന്‍ മണ്ഡലം പ്രസിഡന്റും നിലവില്‍ ബ്ലോക് വൈസ് പ്രസിഡന്റുമാണ് ശ്രീധരന്‍. തളിപ്പറമ്പ് ഈസ്റ്റ് മണ്ഡലം കമിറ്റിയിലെ പ്രവര്‍ത്തകരാണ് കഴിഞ്ഞ ദിവസം രാജി സമര്‍പ്പിച്ചത്.
തളിപ്പറമ്പ് മണ്ഡലം കോണ്‍ഗ്രസ് കമിറ്റി വിഭജിച്ച് തളിപ്പറമ്പ് ഈസ്റ്റ്, തളിപ്പറമ്പ് ടൗണ്‍ എന്നീ മണ്ഡലങ്ങളാക്കുകയും അഡ്വ. സകരിയ കായക്കൂലിനെ ഈസ്റ്റ് മണ്ഡലത്തിന്റെയും, ടിവി രവി ടൗണ്‍ മണ്ഡലത്തിന്റെയും പ്രസിഡന്റുമാരായി കമിറ്റി നിലവില്‍ വരികയും ചെയ്തിരുന്നു. ടൗണ്‍ മണ്ഡലം പ്രസിഡന്റ് ടിവി രവി മണ്ഡലം പ്രസിഡന്റ് സ്ഥാനം രാജിവെച്ചതോടെയാണ് അഡ്വ. ടി ആര്‍ മോഹന്‍ദാസിന് മണ്ഡലം പ്രസിഡന്റിന്റെ ചുമതല ലഭിച്ചത്.
തുടര്‍ന്ന് ഈസ്റ്റ് മണ്ഡലത്തെ അവഗണിക്കുന്ന സമീപനമുണ്ടായതോടെ പരാതി ഡിസിസിയിലെത്തിയെങ്കിലും നടപടികളുണ്ടായില്ല. ഇതില്‍ പ്രതിഷേധിച്ച് സകരിയ കായക്കൂല്‍ താല്‍കാലിക അവധിയെടുത്തെങ്കിലും പ്രസിഡന്റിന്റെ ചുമതല വൈസ് പ്രസിഡന്റിന് നല്‍കാതെ ടൗണ്‍ മണ്ഡലം പ്രസിഡന്റിന് നല്‍കുകയായിരുന്നു.
ഇതിന് ശേഷം ഈസ്റ്റ് മണ്ഡലം കമറ്റിയുടെ പ്രവര്‍ത്തനം മരവിക്കുകയായിരുന്നുവെന്ന് പ്രവര്‍ത്തകര്‍ ആരോപിക്കുന്നു. പ്രശ്നത്തിന് പരിഹാരമുണ്ടാക്കാതെ ഏകപക്ഷീയമായി ഈസ്റ്റ് മണ്ഡലം കമിറ്റി പിരിച്ചുവിട്ട് തളിപ്പറമ്പ് മണ്ഡലം കമിറ്റി മാത്രമായി മാറ്റുകയും ചെയ്തു. ഇതില്‍ പ്രതിഷേധിച്ചാണ് ഈസ്റ്റ് മണ്ഡലം പരിധിയിലെ ബ്ലോക്-മണ്ഡലം-ബൂത് കമിറ്റികളിലെ 19 പേര്‍ പാര്‍ടി ഭാരവാഹിത്വം രാജിവെച്ചത്.
Keywords: Taliparamba: After Muslim League, Congress also ranks against leadership: Mass resignation, Kannur, News, Politics, Congress, Muslim-League, Resignation, Meeting, Kerala.