ഇതോടെയാണ് സ്പീകറെ പദവിയുടെ കടമയെ കുറിച്ച് ഓര്‍മിപ്പിച്ച് ശാഫി പറമ്പില്‍ എം എല്‍ എ രംഗത്തെത്തിയത്. പിണറായി വിജയന്റെ കണ്ണുരുട്ടല്‍ ഭയന്ന് പദവിയുടെ ഉത്തരവാദിത്തം മറക്കുകയാണ് സ്പീകറെന്നും അദ്ദേഹം ആത്മപരിശോധന നടത്തണമെന്നും എം എല്‍ എ പറഞ്ഞു. അവനവന്റെ ഉത്തരവാദിത്തം തിരിച്ചറിഞ്ഞ് നിറവേറ്റാനാകാത്തതാണ് ഏറ്റവും വലിയ പരാജയമെന്ന് സ്പീകര്‍ തിരിച്ചറിയണമെന്നും ശാഫി ആവശ്യപ്പെട്ടു.
സ്പീകര്‍ എഎന്‍ ശംസീര്‍ നിയമസഭയില്‍ നടത്തിയ വിവാദ പരാമര്‍ശങ്ങളെ കുറിച്ച് മാധ്യമങ്ങളോട് പ്രതികരിക്കുകയായിരുന്നു ശാഫി പറമ്പില്‍. ഡി വൈ എഫ് ഐ നേതാവിലേക്ക് സ്പീകര്‍ ഒരിക്കലും ചുരുങ്ങാന്‍ പാടില്ലെന്ന് അന്‍വര്‍ സാദത്ത് എംഎല്‍എ പറഞ്ഞു. അതാണ് ഇന്ന് കണ്ടത്. ശാഫിയെയും റോജിയെയും സനീഷിനെയും വിനോദിനെയും ജയിപ്പിക്കേണ്ടത് ആ പ്രദേശങ്ങളിലെ ജനങ്ങളാണ്. ശാഫിയെ പ്രത്യേകം പറഞ്ഞത് ആരെ ജയിപ്പിക്കാനാണെന്ന് കേരള സമൂഹം ചര്‍ച ചെയ്യട്ടെ. സ്പീകറുടെ പരാമര്‍ശത്തില്‍ മുഖ്യമന്ത്രി ഉള്‍പ്പെടെ മറുപടി പറയണം എന്നും അദ്ദേഹം ആവശ്യപ്പെട്ടു.
ശാഫി പറമ്പില്‍ അടുത്ത തിരഞ്ഞെടുപ്പില്‍ തോല്‍ക്കുമെന്ന സ്പീകറുടെ പരാമര്‍ശമാണ് വിവാദമായത്. നിയമസഭയില്‍ ബാനറുമായി നടുത്തളത്തിലിറങ്ങിയുള്ള പ്രതിപക്ഷ പ്രതിഷേധത്തിനിടെയായിരുന്നു എം എല്‍ എമാരെ പേരെടുത്ത് വിളിച്ച് സ്പീകറുടെ പരാമര്‍ശം.
'മുഖം മറക്കുന്ന രീതിയില്‍ ബാനര്‍ പിടിക്കരുത്. ഇത് ജനങ്ങള്‍ കാണുന്നുണ്ടെന്ന ബോധ്യമുണ്ടാകണം. ശ്രീ മഹേഷ് കരുനാഗപ്പള്ളിയിലെ ജനങ്ങള്‍ ഇത് കാണുന്നുണ്ട്. ശ്രീ റോജി ജോണ്‍ അങ്കമാലിയിലെ ജനങ്ങള്‍ ഇത് കാണുന്നുണ്ട്. വിനോദ് ഇതൊക്കെ എറണാകുളത്തെ ജനങ്ങള്‍ കാണുന്നുണ്ട്. നിങ്ങള്‍ക്ക് തന്നെയാണ് മോശം. ചെറിയ മാര്‍ജിനില്‍ ജയിച്ചവരാണ്. ജനങ്ങള്‍ കാണുന്നുണ്ട് ഇതൊക്കെ. ഇനിയും ഇവിടെ വരേണ്ടതാണ്. വെറുതെ ഇമേജ് മോശമാക്കരുത്. ശാഫി അടുത്ത തവണ തോല്‍ക്കും, അവിടെ തോല്‍ക്കും' -സ്പീകര്‍ പറഞ്ഞു.
Keywords: Shafi Parambil replies to speaker AN Shamseer, Thiruvananthapuram, News, Politics, Assembly, Criticism, Congress, Kerala.