Police Booked | 'മദ്യലഹരിയിൽ വാഹനം കുറുകെ നിർത്തിയിട്ട് ഗതാഗതം സ്തംഭിപ്പിച്ചു'; സ്കൂൾ മാനജർക്കെതിരെ പൊലീസ് കേസെടുത്തു

കണ്ണൂർ: (www.kvartha.com) മൂക്കറ്റം മദ്യലഹരിയിൽ നടുറോഡിൽ ഇനോവ കാർ വിലങ്ങനെ നിർത്തിയിട്ട് ഗതാഗതം സ്തംഭിപ്പിച്ചെന്ന പരാതിയിൽ സ്കൂൾ മാനജർക്കെതിരെ എടക്കാട് പൊലീസ് കേസെടുത്തു. റോഡിലെ വാഹന ഗതാഗതം തടയുകയും മണിക്കൂറുകളോളം മറ്റുയാത്രക്കാരുടെ മേൽ കുതിര കയറുകയും ചെയ്തതായും ആരോപണമുണ്ട്.പി പിന്നീട് എടക്കാട് പൊലീസെത്തിയാണ് സ്കൂൾ മാനജരെ ബലം പ്രയോഗിച്ച് മാറ്റിയത്. കഴിഞ്ഞ ദിവസം രാത്രി 10 മണിയോടെയാണ് കടമ്പൂർ സ്കൂൾ മാനജർ പുത്തലത്ത് മുരളീധരനെ (53) പൊലീസ് പൊതുശല്യമുണ്ടാക്കുന്ന വിധത്തിൽ അഴിഞ്ഞാടിയെന്ന കുറ്റത്തിന് കസ്റ്റഡിയിലെടുത്തത്.

എടക്കാട് ടൗണിൽ നിന്നും കടമ്പൂരിലേക്കുള്ള റോഡിലായിരുന്നു സംഭവം. വീതി വളരെ കുറവായ റോഡിലൂടെ കടന്നുപോകുമ്പോൾ എതിരെ വന്ന വാഹന യാത്രക്കാരുമായി ഇയാൾ കൊമ്പുകോർക്കുകയും നടുറോഡിൽ വാഹനം കുറുകെ നിർത്തി ബഹളമുണ്ടാക്കുകയുമായിരുന്നുവെന്നാണ് പരാതി. ഇതുകാരണം ഒരു മണിക്കൂറോളം ഈ റൂട്ടിൽ ഗതാഗതം മുടങ്ങിയതായും ആക്ഷേപമുണ്ട്. എടക്കാട് പൊലീസെത്തിയാണ് ഇയാളെയും ഏറ്റുമുട്ടിയ യുവാക്കളെയും പിടിച്ചു മാറ്റിയത്. പൊലിസ് സ്കൂൾ മാനജരെ കസ്റ്റഡിയിലെടുത്ത് സ്റ്റേഷനിലേക്ക് കൊണ്ടുപോവുകയായിരുന്നു.