ചൊവ്വാഴ്ച ഉച്ചയ്ക്ക് ഹാജരാകണമെന്നാണ് ഹൈകോടതി കലക്ടറോട് നിര്‍ദേശിച്ചത്. എന്നാല്‍ ഹാജരായിരുന്നില്ല. ഇതില്‍ കോടതി അതൃപ്തി രേഖപ്പെടുത്തിയതിനു പിന്നാലെയാണ് കലക്ടര്‍ ബുധനാഴ്ച കോടതിയിലെത്തിയത്. ജില്ലാ കലക്ടര്‍ക്കൊപ്പം കോര്‍പറേഷന്‍ സെക്രടറിയും കോടതിയിലെത്തി. അഡീഷനല്‍ ചീഫ് സെക്രടറി ശാരദ മുരളീധരന്‍ ഓണ്‍ലൈനിലും ഹാജരായി.
പ്രഥമ പരിഗണന പൊതുജന താല്‍പര്യത്തിനാണെന്ന് വ്യക്തമാക്കിയ ഹൈകോടതി കേരളത്തെ മുഴുവന്‍ ഒരു നഗരമായാണ് കാണുന്നതെന്നും ഈ നഗരത്തില്‍ മാലിന്യം കുമിഞ്ഞു കൂടാന്‍ അനുവദിക്കില്ലെന്നും പറഞ്ഞു.
അതേസമയം, മാലിന്യ പ്ലാന്റിനു തീപിടിച്ച സംഭവത്തില്‍ സര്‍കാര്‍ ബുധനാഴ്ച വൈകിട്ട് അഞ്ചുമണിക്ക് ഉന്നതതല യോഗം വിളിച്ചതായി എജി ഹൈകോടതിയെ അറിയിച്ചു. മാലിന്യ പ്ലാന്റിലെ തീപ്പിടുത്തം കൊച്ചി നഗരത്തിലും എറണാകുളം ജില്ലയുടെ വിവിധ ഭാഗങ്ങളിലും സൃഷ്ടിച്ചിരിക്കുന്ന പ്രശ്‌നങ്ങളുടെ പശ്ചാത്തലത്തിലാണ് യോഗം. യോഗത്തില്‍ തദ്ദേശ സ്വയംഭരണം വകുപ്പ് മന്ത്രി എംബി രാജേഷും ചീഫ് സെക്രടറിയും ഉള്‍പ്പെടെ പങ്കെടുക്കും.
കൊച്ചിയിലെ വിഷപ്പുക മൂലം ഗാസ് ചേംബറില്‍ അകപ്പെട്ട അവസ്ഥയിലാണെന്ന് കഴിഞ്ഞദിവസം കോടതി ചൂണ്ടിക്കാട്ടിയിരുന്നു. മാലിന്യസംസ്‌കരണകേന്ദ്രത്തിന് ആരെങ്കിലും തീവച്ചതാണോയെന്ന ചോദ്യവും ഉയര്‍ത്തിയിരുന്നു. മാലിന്യം കത്തി വിഷപ്പുക പടരുന്നതു സംബന്ധിച്ചു ജസ്റ്റിസ് ദേവന്‍ രാമചന്ദ്രന്‍ ചീഫ് ജസ്റ്റിസിന് നല്‍കിയ കത്തിനെ തുടര്‍ന്നാണ് കോടതി സ്വമേധയ കേസെടുത്തത്.
ഉത്തരവാദികളായ ഉദ്യോഗസ്ഥര്‍ക്കെതിരെ നടപടിയെടുക്കണമെന്നു നിര്‍ദേശിച്ച കോടതി, കോര്‍പറേഷന്‍ സെക്രടറി, കലക്ടര്‍, മലിനീകരണ നിയന്ത്രണ ബോര്‍ഡ് ചെയര്‍മാന്‍ എന്നിവര്‍ ചൊവ്വാഴ്ച തന്നെ ഹാജരാകണമെന്ന് ആവശ്യപ്പെട്ടു. അഡ്വകറ്റ് ജെനറല്‍ വിശദീകരണത്തിന് ഒരുദിവസം സാവകാശം തേടിയെങ്കിലും അനുവദിച്ചില്ല.
ബ്രഹ്‌മപുരത്തെ തീപ്പിടുത്ത വിഷയം കത്തിനില്‍ക്കുന്നതിനിടെ കലക്ടറെ വയനാട്ടിലേക്കു സ്ഥലം മാറ്റാന്‍ സംസ്ഥാന സര്‍കാര്‍ തീരുമാനിച്ചിരുന്നു.
Keywords: District Collector Dr.Renuraj Appears In High Court In Brahmapuram Fire Issue, Kochi, News, High Court of Kerala, District Collector, Criticism, Controversy, Fire, Kerala.