WhatsApp | വാട്സ്ആപ് ഉപയോക്താക്കൾക്ക് മോശം വാർത്ത! ദീപാവലി മുതൽ ഈ സ്മാർട് ഫോണുകളിൽ ആപ് പ്രവർത്തിക്കില്ല

ന്യൂഡെൽഹി: (www.kvartha.com) ദീപാവലി വരാൻ പോകുന്നു, അതിന്റെ സന്തോഷത്തിൽ ആളുകൾ സുഹൃത്തുക്കൾക്കും ബന്ധുക്കൾക്കും വാട്സ്ആപിൽ നിന്ന് ആശംസകൾ അയയ്‌ക്കുകയും ഫോടോകളും വീഡിയോകളും പങ്കിടുകയും ചെയ്യും. അതേസമയം, നിരവധി സ്മാർട് ഫോണുകളിൽ ഒക്ടോബർ 24 മുതൽ ആപ് പ്രവർത്തിക്കില്ല. ദീപാവലി ദിനം മുതൽ ചില പഴയ ഐഫോണുകളിലും ആൻഡ്രോയിഡുകളിലും വാട്സ്ആപ് സപോർട് ചെയ്യില്ലെന്നാണ് മാധ്യമങ്ങൾ റിപോർട് ചെയ്യുന്നത്. ഇൻഡ്യയിൽ 50 കോടിയിലധികം ഉപയോക്താക്കൾ വാട്സ്ആപിന് ഉണ്ടെന്നാണ് കണക്ക്.
              
ഏതൊക്കെ ഫോണുകളിൽ ലഭിക്കില്ല?

മാധ്യമ റിപോർടുകൾ പ്രകാരം, ഒക്ടോബർ 24 മുതൽ, പഴയ ഓപറേറ്റിംഗ് സിസ്റ്റത്തിൽ പ്രവർത്തിക്കുന്ന ഐഫോണുകളിൽ വാട്സ്ആപ് ഉപയോഗിക്കാൻ കഴിയില്ല. എന്നിരുന്നാലും, ഇത് അപ്‌ഡേറ്റ് ചെയ്‌ത് ആപ് ഉപയോഗിക്കാം. ഐഫോണുകളുടെ iOS 10 അല്ലെങ്കിൽ iOS 11 ഓപറേറ്റിംഗ് സിസ്റ്റത്തിൽ വാട്സ്ആപ് ലഭിക്കില്ല.

ഇതോടൊപ്പം, ഐഫോൺ 5, 5C എന്നിവയുടെ ഉപയോക്താക്കൾക്കും ആപിന്റെ സേവനം ലഭ്യമാകില്ല. ഭാവിയിൽ ചില അപ്‌ഡേറ്റുകൾ വരാൻ പോകുന്നതിനാലാണ് അത്തരം ഫോണുകളിലെ സേവനം നിർത്തുന്നതെന്നും ഇവയിൽ ആപ് പ്രവർത്തിക്കില്ലെന്നും കംപനി അറിയിച്ചു.

വാട്സ്ആപ് ഉപയോഗിക്കുന്നതിന്, ഉപയോക്താവ് തന്റെ ഫോൺ iOS 15 അല്ലെങ്കിൽ iOS 16-ലേക്ക് അപ്‌ഡേറ്റ് ചെയ്യണം. ഈ അപ്‌ഡേറ്റ് iPhone 5C, iPhone 5 എന്നിവയിൽ ലഭ്യമല്ല എന്നത് ശ്രദ്ധിക്കേണ്ടതാണ്. ഈ ഐഫോണുകളിൽ വാട്സ്ആപ് പ്രവർത്തിക്കില്ലെങ്കിലും, മറ്റ് പഴയ ഐഫോണുകളിൽ ഇത് ഉപയോഗിക്കാം. ഐഫോൺ 5s, 6 6s എന്നീ ഉപയോക്താക്കൾക്ക് തുടർന്നും വാട്സ്ആപ് ഉപയോഗിക്കാം. ഇതിനായി, ഉപയോക്താക്കൾ iOS 15 അല്ലെങ്കിൽ 16 ലേക്ക് അപ്ഡേറ്റ് ചെയ്താൽ മതിയാകും. ആൻഡ്രോയിഡ് ഉപയോക്താക്കൾക്ക് വാട്സ്ആപ് ഉപയോഗിക്കുന്നത് തുടരാൻ Android 4.1 അല്ലെങ്കിൽ അതിന് ശേഷമുള്ള പതിപ്പ് ആവശ്യമാണ്.