Health Tips | നിങ്ങൾക്ക് ഈ ലക്ഷണങ്ങൾ ഉണ്ടോ? എങ്കിൽ കൂടുതൽ ഉറക്കം ആവശ്യമാണ്; അവഗണിക്കരുത്!

ന്യൂഡെൽഹി: (www.kvartha.com) ഉറക്കവും ആരോഗ്യവും തമ്മിൽ ബന്ധമുണ്ട്. മനോഹരമായ ചർമം, ദഹനം, മാനസികാരോഗ്യം, രക്തസമ്മർദം എന്നിവ നിലനിർത്താൻ മതിയായ ഉറക്കം ആവശ്യമാണ്. എന്നാൽ ഇപ്പോഴത്തെ മോശം ജീവിതശൈലി ആളുകളുടെ ഉറക്കത്തെ വളരെയധികം ബാധിക്കുന്നുണ്ട്.
             
രാത്രിയിൽ ഗാഢനിദ്രയുടെ അഭാവം ശാരീരികവും മാനസികവുമായ ആരോഗ്യത്തെയും ബാധിക്കുന്നു. വിദഗ്ധർ പറയുന്നത് അനുസരിച്ച്, ദിവസം മുഴുവൻ നന്നായി പ്രവർത്തിക്കാനും ക്ഷീണം ഒഴിവാക്കാനും ഏഴ് മുതൽ എട്ട് മണിക്കൂർ വരെ ഉറങ്ങുന്നത് എല്ലാവർക്കും വളരെ പ്രധാനമാണ്. ഇല്ലെങ്കിൽ, നമ്മുടെ ആരോഗ്യത്തെയും പ്രകടനത്തെയും പ്രതികൂലമായി ബാധിക്കും.

നിങ്ങൾ കൂടുതൽ ഉറങ്ങേണ്ടതുണ്ട് എന്ന് ശരീരത്തിലെ ചില അടയാളങ്ങളിൽ നിന്ന് മനസ്സിലാക്കാൻ കഴിയും.

അലാറം ഇല്ലാതെ എഴുന്നേൽക്കാനുള്ള കഴിവില്ലായ്മ:

നിങ്ങൾ നന്നായി ഉറങ്ങുമ്പോൾ, നിങ്ങളെ ഉണർത്താൻ അലാറം ക്ലോക് ആവശ്യമില്ല. ഉറക്കം പൂർത്തിയാകുമ്പോൾ, നിങ്ങൾ സ്വയം ഉണരും. എന്നാൽ അലാറം ക്ലോക് ഓഫാക്കിയതിന് ശേഷവും നിങ്ങൾക്ക് ഉറക്കമോ അലസതയോ അനുഭവപ്പെടുന്നുണ്ടെങ്കിൽ, നിങ്ങൾക്ക് കൂടുതൽ ഉറങ്ങേണ്ടതുണ്ട്.

ഡ്രൈവിംഗ് ബുദ്ധിമുട്ട്:

വാഹനമോടിക്കുമ്പോൾ നിങ്ങൾക്ക് എപ്പോഴും മയക്കം അനുഭവപ്പെടുന്നുണ്ടെങ്കിൽ, ഇത് നിങ്ങൾക്ക് കൂടുതൽ ഉറങ്ങേണ്ടതിന്റെ സൂചനയാണ്. ഈ അടയാളവും അപകടകരമാണ്. കാരണം പലപ്പോഴും അപകടങ്ങൾ സംഭവിക്കുന്നത് ഉറക്കക്കുറവ് കൊണ്ടാണെന്ന് പറയാറുണ്ട്.

കൂടുതൽ ചായയും കാപ്പിയും കുടിക്കുന്നു:

ചായയോ കാപ്പിയോ ഉപയോഗിച്ച് നിങ്ങളുടെ ദിവസം ആരംഭിക്കുന്നത് നല്ലതാണ്. എന്നാൽ പകൽ ഇടയ്ക്കിടെ ചായയും കാപ്പിയും കുടിക്കുകയും കഫീൻ ആവശ്യമാണെന്ന് തോന്നുകയും ചെയ്യുന്നുവെങ്കിൽ, അത് രാത്രിയിൽ വേണ്ടത്ര ഉറക്കം ലഭിക്കുന്നില്ല എന്നതിന്റെ ലക്ഷണമാണ്. അതിനാൽ നിങ്ങൾ കൂടുതൽ ഉറങ്ങേണ്ടതുണ്ട്.

ശ്രദ്ധ കേന്ദ്രീകരിക്കാനുള്ള ബുദ്ധിമുട്ട്:

ജോലിസ്ഥലത്ത് നിങ്ങൾ പതിവായി തെറ്റുകൾ വരുത്തുകയോ ജോലിയിൽ ശ്രദ്ധ കേന്ദ്രീകരിക്കാൻ കഴിയാതിരിക്കുകയോ ചെയ്താൽ, ഇത് മോശം ഉറക്കത്തിന്റെ ലക്ഷണമാണ്.