Gold Medal | കോമൺവെൽത് ഗെയിംസ്: ഇൻഡ്യയ്ക്ക് വീണ്ടും സ്വർണം; ബാഡ്മിന്റണിൽ ചരിത്രം കുറിച്ച് പിവി സിന്ധു

ബർമിംഗ്ഹാം: (www.kvartha.com) കോമൺവെൽത് ഗെയിംസ് ബാഡ്മിന്റണിൽ ഇൻഡ്യൻ താരം പിവി സിന്ധുവിന് സ്വർണം. വനിതാ സിംഗിൾസ് ഫൈനലിൽ കാനഡയുടെ മിഷേൽ ലിയെ തോൽപിച്ചാണ് ഗെയിംസിൽ കന്നി സ്വർണമെഡൽ പിവി സിന്ധു സ്വന്തമാക്കിയത്. 2014 ഗ്ലാസ്‌ഗോ ഗെയിംസിൽ വനിതാ സിംഗിൾസിൽ വെങ്കലവും നാലു വർഷം മുമ്പ് ഗോൾഡ്‌കോസ്റ്റിൽ വെള്ളിയും താരം നേടിയിരുന്നു.
                 
ഈ വർഷത്തെ കോമൺവെൽത് ഗെയിംസിലെ ബാഡ്മിന്റണിലെ ഇൻഡ്യയുടെ ആദ്യ സ്വർണം കൂടിയാണിത്. രണ്ട് തവണ ഒളിംപിക് മെഡൽ നേടിയ സിന്ധു 2014 കോമൺ‌വെൽത് ഗെയിംസ് ജേതാവ് മിഷേൽ ലിയെ 21-15, 21-13 എന്ന സ്കോറിനാണ് പരാജയപ്പെടുത്തിയത്. ഗെയിംസിലെ ഇൻഡ്യയുടെ 19-ാമത്തെ സ്വർണമാണിത്.

മികച്ച തുടക്കമാണ് പിവി സിന്ധുവിന് ലഭിച്ചത്. ആദ്യ ഗെയിമിന്റെ പകുതി പിന്നിട്ടപ്പോൾ 11-8ന് മുന്നിലായിരുന്നു. മിഷേൽ ലി മികച്ച പ്രകടനം നടത്തിയെങ്കിലും ആദ്യ ഗെയിമിൽ സിന്ധുവിന്റെ ജയം 21-15ന് ആയിരുന്നു. രണ്ടാം ഗെയിം മികച്ച രീതിയിൽ തന്നെ ലി ആരംഭിച്ചു. എന്നാൽ നിമിഷങ്ങൾക്കകം സിന്ധു ഒരിക്കൽ കൂടി മുന്നിലെത്തി. കനേഡിയൻ താരം പിഴവുകൾ വരുത്തി, സിന്ധുവിന്റെ ലീഡ് വർധിച്ച് കൊണ്ടിരുന്നു. രണ്ടാം ഗെയിമിന്റെ പകുതി പിന്നിട്ടപ്പോൾ 11-6ന് ലീഡ് നേടിയ സിന്ധു ഒടുവിൽ 21-13ന് ജയിക്കുകയും ചെയ്തു. < !- START disable copy paste -->