Fights off crocodile | നദിയിൽ കുളിക്കുന്നതിനിടെ മുതല ആക്രമിച്ചു; നഗ്നമായ കൈകൊണ്ട് പോരാടി 14 കാരൻ കഷ്ടിച്ച് രക്ഷപ്പെട്ടു

കേന്ദ്രപാര: (www.kvartha.com) ഒഡീഷയിലെ ഭിതാർകനിക ദേശീയ ഉദ്യാനത്തിന് സമീപമുള്ള അരജ ഗ്രാമത്തിലെ കനി നദിയിൽ മുതലയോട് നഗ്നമായ കൈകൊണ്ട് പോരാടിയ 14 വയസുകാരൻ മരണത്തിൽ നിന്ന് കഷ്ടിച്ച് രക്ഷപ്പെട്ടു. ഓംപ്രകാശ് സാഹു എന്ന കുട്ടി സുഹൃത്തുക്കളോടൊപ്പം നദിയിൽ കുളിക്കുന്നതിനിടെയാണ് ആറടി നീളമുള്ള മുതല ആക്രമിച്ചതെന്ന് ഇൻഡ്യൻ എക്‌സ്പ്രസ് റിപോർട് ചെയ്തു.
                   
മുതല കുട്ടിയുടെ കാലുകൾ പിടിച്ച് നദിയിലേക്ക് വലിച്ചിടാൻ ശ്രമിച്ചു. എന്നാൽ ഓംപ്രകാശ് മുതലയോട് പോരാടി. 'ഞാൻ മുതലയുടെ കണ്ണുകൾ വിരലുകൾ കൊണ്ട് കുത്തി, തുടർന്ന് അതിന്റെ പിടി അയഞ്ഞു, അത് രക്ഷപ്പെടാൻ എന്നെ പ്രാപ്തമാക്കി', ആശുപത്രിയിൽ ചികിത്സയിലുള്ള ഓംപ്രകാശ് പറഞ്ഞു.

മുതല കാലിൽ പിടിക്കുമ്പോൾ കുട്ടി അരയോളം വെള്ളത്തിലായിരുന്നുവെന്ന് ദൃക്‌സാക്ഷിയായ മഹാദേവ് സാഹു കൂട്ടിച്ചേർത്തു. 'ഓംപ്രകാശ് മുതലയുമായി മല്ലിടുന്നതിനിടെ, അവന്റെ നിലവിളി കേട്ട് ഗ്രാമവാസികൾ ഓടിയെത്തി മുതലയ്ക്ക് നേരെ കല്ലെറിയാൻ തുടങ്ങി. ഒടുവിൽ, കുട്ടി സ്വയം രക്ഷപ്പെട്ടു. രണ്ട് കാലുകൾക്കും കൈകൾക്കും പരിക്കേറ്റു,' മഹാദേവ് അറിയിച്ചു.

ആദ്യം കേന്ദ്രപാറയിലെ ജില്ലാ ആസ്ഥാന ആശുപത്രിയിൽ പ്രവേശിപ്പിച്ച ഓംപ്രകാശിനെ പിന്നീട് നില വഷളായതിനെ തുടർന്ന് കട്ടക്കിലെ എസ്‌സിബി മെഡികൽ കോളജ് ആശുപത്രിയിലേക്ക് മാറ്റി. ജീവൻ അപകടനില തരണം ചെയ്തിട്ടില്ലെന്നും ചികിത്സയോട് നന്നായി പ്രതികരിക്കുന്നുണ്ടെന്നും ഡോക്ടർമാർ അറിയിച്ചു.

ഒരു മാസത്തിനിടെ ഭിതാർകനികയ്ക്ക് സമീപം റിപോർട് ചെയ്യുന്ന മൂന്നാമത്തെ മുതല ആക്രമണമാണിത്. മെയ് 26ന് ഝരപദ ഗ്രാമത്തിലെ ജാനകി ജെന (54) നദിയിൽ പാത്രങ്ങൾ കഴുകുന്നതിനിടെ മുതലയുടെ ആക്രമണത്തിൽ കൊല്ലപ്പെട്ടിരുന്നു. അതുപോലെ മെയ് നാലിന് ബ്രാഹ്മണി നദിയിൽ കുളിക്കുന്നതിനിടെ നാലപായ് ഗ്രാമത്തിലെ 40 കാരനായ ശിവപ്രസാദ് ബെഹ്‌റയും മുതലയുടെ ആക്രമണത്തിൽ മരിച്ചു. < !- START disable copy paste -->