കണ്ണൂര്: (www.kvartha.com) സിപിഎം സൈബര് പോരാളി ആകാശ് തില്ലങ്കേരി വിവാഹിതനാകുന്നു. ഹോമിയോ ഡോക്ടറായ അനുപമ ജയതിലകാണ് വധു. മെയ് 12 ന് വധൂഗൃഹത്തില്വച്ചാണ് വിവാഹം. ഇരുവരുടെയും പ്രണയ വിവാഹമാണ്. സമൂഹ മാധ്യമത്തിലൂടെയുള്ള പരിചയം പ്രണയത്തിലെത്തുകയായിരുന്നു. കണ്ണൂര് ജില്ലക്കാരി തന്നെയാണ് അനുപമയും.
ഇവരുടെ സേവ് ദ ഡേറ്റ് വീഡിയോകളും ചിത്രങ്ങളും സമൂഹ മാധ്യമങ്ങളില് വൈറലായിരുന്നു. യൂത് കോണ്ഗ്രസ് എടയന്നൂര് ബ്ളോക് പ്രസിഡന്റ് ശുഐബിനെ വെട്ടിക്കൊന്ന കേസിലെ പ്രതിയാണ് ആകാശ് തില്ലങ്കേരി. ഈ കേസ് കോടതിയില് ഉടന് വിചാരണ തുടങ്ങിയേക്കും.
സി പി എം നേതാവ് പി ജയരാജന്റെ ആരാധകരില് ഒരാളും സമൂഹ മാധ്യമത്തില് ആശയപ്രചാരകനുമായ ആകാശ് തില്ലങ്കേരി കഴിഞ്ഞ കുറെ കാലമായി പാര്ടിയും ഡി വൈ എഫ് ഐയുമായി അകല്ച്ചയിലാണ്. പാര്ടിയെയും ഡി വൈ എഫ് ഐ സംഘടനയെയും സമൂഹ മാധ്യമങ്ങളിലൂടെ വിമര്ശിക്കാറുമുണ്ട്. അതുകൊണ്ടുതന്നെ സി പി എം ജില്ലാ നേതൃത്വവും ഡി വൈ എഫ് ഐയും ഇയാളെ നേരത്തെ തള്ളി പറഞ്ഞിരുന്നു.
കരിപ്പൂര് സ്വര്ണക്കടത്ത് കേസിലെ മുഖ്യപ്രതി അര്ജുന് ആയങ്കിയുമായി അടുത്ത ബന്ധമുണ്ടെന്ന് ആരോപിക്കുന്ന ആകാശ് തില്ലങ്കേരിയുടെ വീട്ടിലും കസ്റ്റംസ് റെയ്ഡ് നടത്തിയിരുന്നു. ഇയാളെ ചോദ്യം ചെയ്യുന്നതിനായി കൊച്ചിയിലേക്ക് വിളിപ്പിച്ചിരുന്നുവെങ്കിലും തെളിവുകള് ലഭിക്കാത്തതിനാല് വെറുതെ വിടുകയായിരുന്നു.