ജഹാംഗീർപുരി അക്രമക്കേസ് സുപ്രീം കോടതിയിൽ; ഇടപെടലും എൻഐഎ അന്വേഷണവും ആവശ്യപ്പെട്ട് 2 വ്യത്യസ്ത ഹർജികൾ; വിവിധ സംസ്ഥാനങ്ങളിൽ വീടുകളും മറ്റ് കെട്ടിടങ്ങളും ബുൾഡോസർ ഉപയോഗിച്ച് തകർക്കുന്നതിനെതിരെയും ഹർജി

ന്യൂഡെൽഹി: (www.kvartha.com 18.04.2022) ഡെൽഹിയിലെ ജഹാംഗീർപുരിയിൽ ശനിയാഴ്ച ഹനുമാൻ ജയന്തിയുടെ ഘോഷയാത്രയോട് അനുബന്ധിച്ച് നടന്ന അക്രമസംഭവങ്ങൾ സുപ്രീം കോടതിയിലെത്തി. സംഭവത്തിൽ സുപ്രീം കോടതിയുടെയും എൻഐഎയുടെയും ഇടപെടൽ ആവശ്യപ്പെട്ട് രണ്ട് വ്യത്യസ്ത ഹർജികളാണ് സമർപിച്ചിരിക്കുന്നത്.
                             

ഡെൽഹി ആസ്ഥാനമായുള്ള അഭിഭാഷകൻ അമൃത്പാൽ സിംഗ് ഖൽസ ജഹാംഗീർപുരി അക്രമത്തെക്കുറിച്ച് ചീഫ് ജസ്റ്റിസ് എൻ വി രമണയ്ക്ക് കത്തയച്ചു. ഇതുവരെയുള്ള ഡെൽഹി പൊലീസ് അന്വേഷണം ഭാഗികവും വർഗീയവുമാണെന്നും കലാപം നടത്തിയവരെ നേരിട്ട് സംരക്ഷിക്കുകയാണെന്നും അദ്ദേഹം കത്തിൽ ആരോപിച്ചു. ജഹാംഗീർപുരി കലാപത്തെക്കുറിച്ച് നിഷ്പക്ഷമായ അന്വേഷണം നടത്താൻ സുപ്രീം കോടതിയിലെ സിറ്റിങ് ജഡ്ജിയുടെ നേതൃത്വത്തിൽ ഒരു കമിറ്റി രൂപീകരിക്കാൻ ഉത്തരവിടണമെന്ന്
അമൃത്പാൽ സിംഗ് ആവശ്യപ്പെട്ടു.

'രണ്ട് വർഷത്തിനിടെ ഇത് രണ്ടാം തവണയാണ് ഡൽഹിയിൽ കലാപം പൊട്ടിപ്പുറപ്പെടുന്നത്, രണ്ട് അവസരങ്ങളിലും ന്യൂനപക്ഷ സമുദായാംഗങ്ങളെ കുറ്റപ്പെടുത്തി. പക്ഷപാതരഹിതമായ മാധ്യമ റിപോർടുകൾ പ്രകാരം, ഹനുമാൻ ജയന്തി ഘോഷയാത്രയുടെ ഭാഗമായ ഏതാനും അംഗങ്ങൾ പള്ളിയിൽ പ്രവേശിച്ച് കാവി പതാക സ്ഥാപിച്ചു. തുടർന്ന് നടന്നത് ഇരു വിഭാഗങ്ങളുടെയും കല്ലേറായിരുന്നു. ഈ സംഭവത്തിൽ ഏഴ് മുതൽ എട്ട് വരെ ഡൽഹി പൊലീസ് ഉദ്യോഗസ്ഥർക്കും സാധാരണക്കാർക്കും ഗുരുതരമായി പരിക്കേൽക്കുകയും സ്വകാര്യ സ്വത്ത് നശിപ്പിക്കുകയും ചെയ്തു', ഖൽസ പറഞ്ഞു.

അതേസമയം ജഹാംഗീർപുരി കലാപത്തിൽ ദാഇശിന്റെയും മറ്റ് തീവ്രവാദ സംഘടനകളുടെയും പങ്കാളിത്തം പരിശോധിക്കാൻ എൻഐഎ അന്വേഷണം ആവശ്യപ്പെട്ട് മറ്റൊരു അഭിഭാഷകനായ വിനീത് ജിൻഡാൽ സുപ്രീം കോടതിയിൽ ഒരു പൊതുതാൽപര്യ ഹർജി സമർപിച്ചു.

അതിനിടെ ബിജെപി ഭരിക്കുന്ന വിവിധ സംസ്ഥാനങ്ങളിൽ വീടുകളും മറ്റ് കെട്ടിടങ്ങളും ബുൾഡോസർ ഉപയോഗിച്ച് തകർക്കുന്നതിനെതിരെ ജംഇയതുൽ ഉലമ-ഇ-ഹിന്ദ് സുപ്രീം കോടതിയിൽ ഹർജി നൽകി. കോടതിയുടെ അനുമതിയില്ലാതെ ആരുടേയും വീടോ കടയോ പൊളിക്കരുതെന്ന് സംസ്ഥാനങ്ങളോട് ഉത്തരവിടണമെന്ന് ഹർജിയിൽ ആവശ്യപ്പെട്ടിട്ടുണ്ടെന്ന് ജംഇയ്യത് ഉലമ ഇ ഹിന്ദ് പ്രസിഡന്റ് അർശാദ് മദനി പറഞ്ഞു.

ആരോപിതമായ അക്രമ പ്രവർത്തനങ്ങൾക്ക് മറുപടിയായി, അത്തരം പ്രവൃത്തികളിൽ/സംഭവങ്ങളിൽ ഉൾപ്പെട്ടിട്ടുണ്ടെന്ന് സംശയിക്കുന്ന ആളുകളുടെ വീടുകൾ തകർക്കാൻ പല സംസ്ഥാനങ്ങളിലെയും ഭരണകൂടം ബുൾഡോസർ ഉപയോഗിക്കുന്നു. മുഖ്യമന്ത്രി ഉൾപെടെ നിരവധി മന്ത്രിമാരും നിയമസഭാംഗങ്ങളും. കൂടാതെ മധ്യപ്രദേശ് സംസ്ഥാന ആഭ്യന്തര മന്ത്രിയും ഇത്തരം പ്രവൃത്തികളെ അനുകൂലിക്കുന്ന പ്രസ്താവനകൾ നടത്തുകയും കലാപമുണ്ടായാൽ ന്യൂനപക്ഷ വിഭാഗങ്ങളുടെ വീടുകളും വാണിജ്യ സ്വത്തുക്കളും നശിപ്പിക്കുമെന്ന് ഭീഷണിപ്പെടുത്തുകയും ചെയ്തിട്ടുണ്ട്. അത്തരം നടപടികൾ അവലംബിക്കുന്നത് കുറ്റാരോപിതരായ വ്യക്തികളുടെ അവകാശങ്ങളുടെ ലംഘനമാണെന്നും അത് ഭരണഘടനാ ധാർമികതയ്ക്കും ക്രിമിനൽ നീതിന്യായ വ്യവസ്ഥയ്ക്കും എതിരാണെന്നും ഹർജിയിൽ പറയുന്നു.

Keywords: News, National, Top-Headlines, Supreme Court of India, Court, Violence, NIA, New Delhi, Controversy, Jahangirpuri violence, Jahangirpuri violence: Petitions seek Supreme Court intervention, NIA probe.

< !- START disable copy paste -->