വിദ്യാഭ്യാസത്തിന് 34,884 കോടി രൂപ അനുവദിച്ച് സംസ്ഥാനം; കുട്ടികളുടെയും യുവാക്കളുടെയും ശാക്തീകരണത്തിനായി പുതിയ ദേശീയ വിദ്യാഭ്യാസ നയവും പ്രഖ്യാപിച്ചു
Mar 3, 2022, 18:20 IST
ഗുജറാത്: (www.kvartha.com 03.03.2022) 2022-23 സാമ്പത്തിക വര്‍ഷത്തേക്കുള്ള 2,43,965 കോടി രൂപയുടെ ബജറ്റ് വ്യാഴാഴ്ച ഗുജറാത് ധനമന്ത്രി കനുഭായ് ദേശായി നിയമസഭയില്‍ അവതരിപ്പിച്ചു. വിദ്യാഭ്യാസ വകുപ്പിന് 34,884 കോടി രൂപ അനുവദിച്ചു. ഘടനാപരമായതും ഗുണനിലവാരമുള്ളതുമായ അടിസ്ഥാന സൗകര്യങ്ങളിലൂടെ വിദ്യാഭ്യാസത്തെ ഉയര്‍ന്ന തലത്തിലേക്ക് കൊണ്ടുപോകാന്‍ സംസ്ഥാന സര്‍കാര്‍ പ്രതിജ്ഞാബദ്ധമാണെന്ന് ബജറ്റ് അവതരിപ്പിച്ചുകൊണ്ട് എഫ് എം ദേശായി പറഞ്ഞു.
കുട്ടികളുടെയും യുവാക്കളുടെയും ശാക്തീകരണത്തിനായി പുതിയ ദേശീയ വിദ്യാഭ്യാസ നയം രൂപീകരിച്ചിട്ടുണ്ടെന്നും അദ്ദേഹം സൂചിപ്പിച്ചു. ലിംഗസമത്വവും സ്‌കൂള്‍ പ്രവേശനവും ഉറപ്പാക്കി ഗവേഷണത്തിനും നവീകരണത്തിനും നൈപുണ്യ വികസനത്തിനും തൊഴിലിനും ഊന്നല്‍ നല്‍കുന്നതാണ് നയമെന്ന് അദ്ദേഹം പറഞ്ഞു. അടിസ്ഥാന സൗകര്യങ്ങള്‍, കഴിവുകള്‍, സ്മാര്‍ട് ക്ലാസ് മുറികള്‍, ഡിജിറ്റല്‍ ലേണിംഗ്, ലബോറടറികള്‍ എന്നിവയില്‍ നയം ഊന്നല്‍ നല്‍കും.
മൊത്തം വിഹിതത്തില്‍ നിന്ന് 1,188 കോടി രൂപ സ്‌കൂള്‍ ഓഫ് എക്‌സലന്‍സ് പദ്ധതിക്കായി ചെലവഴിക്കും. ഈ പദ്ധതി പ്രകാരം സംസ്ഥാനത്തെ വിവിധ സ്‌കൂളുകളിലെ അടിസ്ഥാന സൗകര്യങ്ങള്‍ വിദ്യാര്‍ഥികളുടെ ആവശ്യങ്ങള്‍ക്കനുസരിച്ച് മെച്ചപ്പെടുത്തുമെന്ന് മന്ത്രി പറഞ്ഞു.
പ്രൈമറി, സെകന്‍ഡറി സ്‌കൂളുകളില്‍ പുതിയ ക്ലാസ് മുറികള്‍ നിര്‍മിക്കുന്നതിനായി ഗുജറാത് സര്‍കാര്‍ തീവ്രമായ പ്രചാരണം ആരംഭിച്ചു. നിലവില്‍ 2500 മുറികളുടെ പണി പുരോഗമിക്കുന്നു, അടുത്ത വര്‍ഷം 10,000 പുതിയ മുറികള്‍ നിര്‍മിക്കാനാണ് ലക്ഷ്യമിടുന്നത്. വിദ്യാഭ്യാസ വകുപ്പിന്റെ 34,884 കോടി രൂപയില്‍ നിന്ന് 937 കോടി രൂപ ഇതിനായി വകയിരുത്തിയതായി മന്ത്രി അറിയിച്ചു.
ബജറ്റ് പ്രഖ്യാപനം അനുസരിച്ച്, ഒരു ലക്ഷം വിദ്യാര്‍ഥികള്‍ക്ക് വിദ്യാഭ്യാസം നല്‍കുന്നതിനായി സര്‍കാര്‍ സാമൂഹിക പങ്കാളിത്തത്തിന്റെ അടിസ്ഥാനത്തില്‍ 50 ജ്ഞാനശക്തി റെസിഡന്‍ഷ്യല്‍ സ്‌കൂളുകള്‍ ആരംഭിക്കും. അതിലൂടെ സംസ്ഥാനത്തെ പ്രതിഭാധനരായ വിദ്യാര്‍ഥികള്‍ക്ക് ഉയര്‍ന്ന നിലവാരമുള്ള വിദ്യാഭ്യാസം പാര്‍പിട അടിസ്ഥാനത്തില്‍ നല്‍കാന്‍ കഴിയും. ഈ പദ്ധതി പ്രകാരം 90 കോടി രൂപ വകയിരുത്തിയിട്ടുണ്ട്.
വിദ്യാഭ്യാസ അവകാശ നിയമപ്രകാരം സംസ്ഥാനത്തെ സ്വകാര്യ സ്‌കൂളുകളില്‍ പ്രവേശനം തേടുന്ന വിദ്യാര്‍ഥികള്‍ക്കായി 662 കോടി രൂപ വകയിരുത്തിയതായും മന്ത്രി അറിയിച്ചു.
Keywords: Gujarat's Budget 2022-23: Rs 34,884 Crore Allocated For Education, Gujarat, Education, Budget, Minister, Students, School, National, Top-Headlines.
ഇവിടെ വായനക്കാർക്ക് അഭിപ്രായങ്ങൾ
രേഖപ്പെടുത്താം. സ്വതന്ത്രമായ
ചിന്തയും അഭിപ്രായ പ്രകടനവും
പ്രോത്സാഹിപ്പിക്കുന്നു. എന്നാൽ
ഇവ കെവാർത്തയുടെ അഭിപ്രായങ്ങളായി
കണക്കാക്കരുത്. അധിക്ഷേപങ്ങളും
വിദ്വേഷ - അശ്ലീല പരാമർശങ്ങളും
പാടുള്ളതല്ല. ലംഘിക്കുന്നവർക്ക്
ശക്തമായ നിയമനടപടി നേരിടേണ്ടി
വന്നേക്കാം.
