കോവിഡ് മഹാമാരിക്കെതിരായ പോരാട്ടത്തില് രാജ്യത്തിന്റെ കരുത്ത് പ്രകടിപ്പിക്കുന്നതായിരുന്നു വാക്സിനേഷന് പരിപാടിയെന്ന് രാഷ്ട്രപതി പറഞ്ഞു. ഒരു വര്ഷത്തില് കുറഞ്ഞ സമയംകൊണ്ട് 150 കോടിയിലേറെ ഡോസ് വാക്സിനുകള് വിതരണം ചെയ്തുവെന്നും അത്തരത്തില് ഏറ്റവുമധികം ഡോസ് വാക്സിനുകള് നല്കിയ രാജ്യങ്ങളില് ഒന്നായി മാറാന് ഇന്ഡ്യയ്ക്ക് സാധിച്ചുവെന്നും രാഷ്ട്രപതി പറഞ്ഞു.
കോവിഡ് മഹാമാരി രാജ്യത്തെ നിരവധി പേരുടെ ജീവനെടുത്തു. ഇത്തരമൊരു സാഹചര്യത്തില്പോലും കേന്ദ്ര, സംസ്ഥാന സര്കാരുകളും ഡോക്ടര്മാര്, നഴ്സുമാര്, ശാസ്ത്രജ്ഞര്, ആരോഗ്യപ്രവര്ത്തകര് തുടങ്ങിയവര് ഒരുമയോടെ പ്രവര്ത്തിച്ചു. അവര്ക്കെല്ലാവര്ക്കും ഈ അവസരത്തില് നന്ദി അറിയിക്കുന്നുവെന്നും രാഷ്ട്രപതി പറഞ്ഞു.
സ്ത്രീ പുരുഷ തുല്യത ഉറപ്പുവരുത്തുന്നതിനായി സ്ത്രീകളുടെ വിവാഹ പ്രായം 18 വയസില് നിന്ന് 21 വയസായി ഉയര്ത്തുന്നതിന് നിയമനിര്മാണം നടത്താന് സര്കാരിന് സാധിച്ചെന്ന് രാഷ്ട്പതി പറഞ്ഞു. കേന്ദ്ര സര്കാരിന്റെ ജനക്ഷേമ പദ്ധതികളെക്കുറിച്ചും രാഷ്ട്രപതി പ്രസംഗത്തില് എടുത്തുപറഞ്ഞു.
കേന്ദ്രത്തിന്റെ ക്ഷേമ പദ്ധതികളെ രാഷ്ട്രപതി കോവിന്ദ് പ്രശംസിച്ചു, ലോകത്തിലെ ഏറ്റവും വലിയ ഭക്ഷ്യ വിതരണ യജ്ഞമാണ് ഇന്ത്യ നടത്തുന്നതെന്നും രാഷ്ട്രപതി പറഞ്ഞു.
ഉജ്ജ്വല യോജന, മുദ്ര യോജന, ബേടി ബചാവോ ബേടി പഠാവോ തുടങ്ങിയ പദ്ധതികള് ചൂണ്ടിക്കാട്ടി സ്ത്രീശാക്തീകരണത്തിന് സര്കാര് വലിയ പ്രാധാന്യമാണ് നല്കുന്നതെന്നും രാഷ്ട്രപതി പറഞ്ഞു. ആയുഷ്മാന് ഭാരത്, ജന് ഔഷധി കേന്ദ്ര, ഗരീബ് കല്യാണ് യോജന, പിഎം സ്വനിധി യോജന തുടങ്ങിയ സര്കാര് പദ്ധതികളുടെ പ്രവര്ത്തനങ്ങള് സംബന്ധിച്ചും രാഷ്ട്രപതി പ്രസംഗത്തില് എടുത്തുപറഞ്ഞു.
രാഷ്ട്രപതിയുടെ പ്രസംഗത്തിനു ശേഷം ധനമന്ത്രി നിര്മലാ സീതാരാമന് സാമ്പത്തികസര്വേ ലോക്സഭയില് വെക്കും. ചൊവ്വാഴ്ച രാവിലെ ലോക്സഭയില് ധനമന്ത്രി ബജറ്റ് അവതരിപ്പിക്കും. രാഷ്ട്രപതിയുടെ നയപ്രഖ്യാപനത്തിനുള്ള നന്ദിപ്രമേയ ചര്ച്ച ലോക്സഭയില് ബുധനാഴ്ച ആരംഭിക്കും. നാലുദിവസമാണ് ചര്ച്ചയ്ക്കു നീക്കിവെച്ചിരിക്കുന്നത്. ഫെബ്രുവരി ഏഴിന് പ്രധാനമന്ത്രി ചര്ച്ചയ്ക്കു മറുപടി പറയും.
കോവിഡ് പ്രതിരോധ നിയന്ത്രണങ്ങള് കാരണം ബുധനാഴ്ചമുതല് രാജ്യസഭ രാവിലെ 10 മുതല് മൂന്നരവരെയും ലോക്സഭ വൈകിട്ട് നാലുമുതല് രാത്രി ഒമ്പതുവരെയുമാണ് ചേരുക.
Keywords: President Kovind lauds Centre’s welfare schemes, says India running world’s largest food distribution drive, New Delhi, News, Politics, President, Budget, COVID-19, National.