കേരളത്തെ അഭിനന്ദിച്ചും ഉത്തര്‍പ്രദേശ് സര്‍കാരിനെ പരിഹസിച്ചും കോണ്‍ഗ്രസ് എംപി ശശി തരൂര്‍; ആരോഗ്യ സുരക്ഷ മാത്രമല്ല സദ്ഭരണവും രാഷ്ട്രീയവുമെല്ലാം സംസ്ഥാനത്തെ കണ്ടുപഠിക്കണമെന്നും യോഗിക്ക് നിര്‍ദേശം

തിരുവനന്തപുരം: (www.kvartha.com 28.12.2021) കേരളത്തെ അഭിനന്ദിച്ചും ഉത്തര്‍പ്രദേശ് സര്‍കാരിനെ പരിഹസിച്ചും കോണ്‍ഗ്രസ് എംപി ശശി തരൂര്‍. ആരോഗ്യ സുരക്ഷ മാത്രമല്ല സദ്ഭരണവും രാഷ്ട്രീയവുമെല്ലാം സംസ്ഥാനത്തെ കണ്ടുപഠിക്കണമെന്നും യോഗിക്ക് നിര്‍ദേശം നല്‍കിയിരിക്കയാണ് ശശി തരൂര്‍ എംപി.

കേരളത്തില്‍ നടക്കുന്നത് സദ്ഭരണമാണെന്നും എല്ലാ രാഷ്ട്രീയത്തെയും ഉള്‍കൊള്ളുന്നതാണ് കേരളഭരണമെന്നും ശശി തരൂര്‍ ഫെയ്സ്ബുക് പോസ്റ്റില്‍ പറഞ്ഞു. നീതി ആയോഗിന്റെ ആരോഗ്യ സര്‍വേയില്‍ കേരളം ഒന്നാമത് എത്തിയത് ചൂണ്ടിക്കാണിച്ചാണ് തരൂരിന്റെ അഭിനന്ദനം. അവസാന സ്ഥാനത്ത് എത്തിയ യുപി മുഖ്യമന്ത്രി യോഗി ആദിത്യനാഥിനെ ടാഗ് ചെയ്തായിരുന്നു തരൂരിന്റെ ഫെയ്സ്ബുക് പോസ്റ്റ്.

ആരോഗ്യസുരക്ഷ എന്താണെന്ന് യുപിയെ കണ്ട് കേരളം പഠിക്കണമെന്ന യോഗിയുടെ 2017 ലെ പരാമര്‍ശം തലക്കെട്ടാക്കിയ ബിസിനസ് സ്റ്റാന്‍ഡേഡിന്റെ വാര്‍ത്തയും തരൂര്‍ തന്റെ ട്വീറ്റിനൊപ്പം ചേര്‍ത്തിട്ടുണ്ട്.

ശശി തരൂറിന്റെ ഈ പ്രസ്താവന കോണ്‍ഗ്രസ് നേതൃത്വത്തെ വീണ്ടും വെട്ടിലാക്കിയിരിക്കയാണ്. കേരളത്തില്‍ നടപ്പാക്കുന്ന കെ റെയില്‍ പദ്ധതിയെ അനുകൂലിച്ചുകൊണ്ട് ശശി തരൂര്‍ നേരത്തെ പ്രതികരണം നടത്തിയിരുന്നു. ഇതേതുടര്‍ന്ന് കോണ്‍ഗ്രസ് നേതാക്കള്‍ക്ക് തരൂരിനോട് നീരസം തോന്നിയിരുന്നു.