ആലപ്പുഴ: (www.kvartha.com 15.09.2021) ഇളയ മകന് ഐസ്‌ക്രീമില്‍ വിഷം കലര്‍ത്തി നല്‍കിയ ശേഷം മാതാവ് ജീവനൊടുക്കിയതായി പൊലീസ്. അമ്പലപ്പുഴ വടക്ക് ഗ്രാമപഞ്ചായത്തില്‍ പള്ളിവെളിവീട്ടില്‍ മുജീബിന്റെ ഭാര്യ റഹ് മത്ത്(39) ആണ് മരിച്ചത്.
ചൊവ്വാഴ്ച വൈകുന്നേരമായിരുന്നു സംഭവം. 7 വയസുകാരനായ മകന് മുഫാസിനെ ആലപ്പുഴ മെഡികല്‍ കോളജ് ആശുപത്രിയില്‍ പ്രവേശിപ്പിച്ചു. കുട്ടി തീവ്രപരിചരണ വിഭാഗത്തില്‍ ചികിത്സയിലാണ്.
ഹോടെല്‍ തൊഴിലാളിയായ ഭര്‍ത്താവും മൂത്ത മറ്റു 2 മക്കളും വീട്ടിലില്ലാതിരുന്ന സമയത്താണ് യുവതി കടുംകൈ ചെയ്തതെന്ന് പൊലീസ് പറഞ്ഞു. മകന് വിഷം നല്‍കിയശേഷം യുവതിയും കഴിച്ചതായി പൊലീസ് പറയുന്നു. യുവതിയുടെ മൃതദേഹം മെഡികല്‍ കോളജ് ആശുപത്രിയിലെ മോര്‍ചറിയിലേക്ക് മാറ്റി.
റഹ് മത്ത് ആത്മഹത്യാപ്രവണതയുള്ള ആളാണെന്നും 8 വര്‍ഷമായി മാനസിക വിഭ്രാന്തിക്ക് ജില്ലാ ആശുപത്രിയില്‍ ചികിത്സയിലായിരുന്നെന്നും പൊലീസ് അറിയിച്ചു.