സര്‍വേയിൽ പങ്കെടുത്തവരില്‍ 77 ശതമാനം ആളുകളുടെയും പ്രധാന ആവശ്യം മെട്രോ യാത്ര ടികെറ്റ് നിരക്ക് കുറക്കണമെന്നതായിരുന്നുവെന്ന് ലോക്നാഥ് ബെഹ്‌റ വാർത്താസമ്മേളനത്തിൽ വ്യക്തമാക്കി. സര്‍വേയില്‍ ആകെ പങ്കെടുത്ത 11,199 പേരില്‍ 63 ശതമാനം പേര്‍ മെട്രോ ഉപയോഗിക്കാത്തവരും 37 ശതമാനം മെട്രോ ഉപയോഗിക്കുന്നവരുമായിരുന്നു.
മാനസിക വെല്ലുവിളി നേരിടുന്നവർക്ക് മെട്രോയിൽ സൗജന്യ യാത്ര അനുവദിക്കും. ഇവര്‍ക്കൊപ്പമെത്തുന്നയാള്‍ക്ക് പകുതി നിരക്കില്‍ യാത്ര ചെയ്യാനും അവസരം നല്‍കും. വിദ്യാർഥികൾ അടക്കമുള്ള വിവിധ വിഭാഗങ്ങൾക്ക് നിരക്കിൽ ഇളവ് നൽകുന്നതിലും തീരുമാനം ഉണ്ടാകും. ഗാന്ധി ജയന്തി, കേരളപ്പിറവി ദിനത്തിൽ എല്ലാ യാത്രക്കാർക്കും അമ്പത് ശതമാനം നിരക്കിൽ യാത്ര അനുവദിക്കും. തിരക്ക് കുറഞ്ഞ സമയങ്ങളില്‍ ആളുകളെ ആകര്‍ഷിക്കാന്‍ പദ്ധതികള്‍, ഫാമിലി, യാത്ര സംഘങ്ങള്‍ എന്നിവര്‍ക്ക് പ്രത്യേക ഇളവുകള്‍ എന്നിവയും ആലോചിക്കുന്നുണ്ട്. കൂടുതൽ യാത്രക്കാരെ ആകർഷിക്കുന്നതിനായി വാരാന്ത്യങ്ങളിൽ വിവിധ പരിപാടികൾ സംഘടിപ്പിക്കാനും തീരുമാനിച്ചിട്ടുണ്ട്.
യാത്രക്കാരുടെ വാഹനങ്ങള്‍ പാര്‍ക് ചെയ്യുന്നതിന് ഓരോ സ്‌റ്റേഷന്‍ പരിധിയിലും എത്ര സ്ഥലം ബാക്കിയുണ്ടെന്ന് അറിയാന്‍ ആപ് കൊണ്ടുവരും. ജലമെട്രോ ബോടുകള്‍ക്കും മെട്രോ ട്രെയിനുകള്‍ക്കും പേരിടുമെന്നും എം ഡി ലോക്നാഥ് ബെഹ്‌റ പറഞ്ഞു. ജല മെട്രോ ഡിസംബറിൽ നീറ്റിലിറക്കുമെന്നും അദ്ദേഹം അറിയിച്ചു.