ന്യൂഡെല്‍ഹി: (www.kvartha.com 12.03.2021) ലൈഫ് മിഷന്‍ കേസിലെ സിബിഐ അന്വേഷണം ചോദ്യം ചെയ്ത് യൂണിടാക് എംഡി സന്തോഷ് ഈപ്പന്‍ സമര്‍പിച്ച ഹര്‍ജിയില്‍ കേന്ദ്ര- സംസ്ഥാന സര്‍കാരുകള്‍ക്കും സിബിഐയ്ക്കും സുപ്രിംകോടതി നോടിസ്. അനില്‍ അക്കര എം എല്‍ എയ്ക്കും നോടിസ് അയച്ചിട്ടുണ്ട്.
നേരത്തെ സംസ്ഥാന സര്‍കാരും സി ബി ഐ അന്വേഷണത്തിനുള്ള ഹെകോടതി ഉത്തരവിനെതിരെ സുപ്രീം കോടതിയെ സമീപിച്ചിരുന്നു. ഈ ഹര്‍ജിക്കൊപ്പം സന്തോഷ് ഈപ്പന്‍ നല്‍കിയ ഹര്‍ജിയും പരിഗണിക്കാന്‍ ജസ്റ്റിസ് അശോക് ഭൂഷണ്‍ അധ്യക്ഷനായ ബെഞ്ച് തീരുമാനിച്ചു.
തൃശൂര്‍ വടക്കാഞ്ചേരിയില്‍ ഫ്ളാറ്റുകള്‍ നിര്‍മിച്ചു നല്‍കുന്നതിനാണ് തുക ലഭിച്ചതെന്നും വിദേശ സംഭാവന നിയന്ത്രണ നിയമം ലംഘിച്ചില്ലെന്നുമാണ് സന്തോഷ് ഈപ്പന്റെ വാദം. സി ബി ഐ അന്വേഷണം രാഷ്ട്രീയ ലക്ഷ്യം വച്ചാണെന്നും ഹര്‍ജിയില്‍ ആരോപിച്ചു.