അതിനിടെ നേതൃത്വത്തിന്റെ ബലഹീനത ചൂണ്ടിക്കാട്ടി ഹൈക്കമാന്‍ഡിന് കത്തയച്ച 23 നേതാക്കളെ കാണാന്‍ കോണ്‍ഗ്രസ് അധ്യക്ഷ സോണിയാ ഗാന്ധി തീരുമാനിച്ചിട്ടുണ്ട്. സംഘത്തിലെ അഞ്ചോ ആറോ പ്രധാനികളെ ശനിയാഴ്ച കാണാനാണ് സോണിയയുടെ തീരുമാനമെന്ന് കോണ്‍ഗ്രസ് വൃത്തങ്ങള്‍ അറിയിച്ചു.
കത്തില്‍ ഒപ്പിടാത്ത മറ്റ് നേതാക്കളും ഹാജരാകുമെന്ന് കോണ്‍ഗ്രസ് അവകാശപ്പെടുന്നു. സംഘടനാ തെരഞ്ഞെടുപ്പിന് മുന്നോടിയായി സോണിയ ഗാന്ധി വിവിധ ഗ്രൂപ്പുകളുമായി കൂടിക്കാഴ്ച നടത്തുന്നുണ്ടെന്ന് പാര്‍ട്ടി നേതാക്കള്‍ പറയുന്നു.
മധ്യപ്രദേശ് മുന്‍ മുഖ്യമന്ത്രി കമല്‍നാഥ് മുന്‍കൈ എടുത്താണ് കൂടിക്കാഴ്ചയ്ക്ക് അവസരം ഒരുക്കിയത്. മുതിര്‍ന്ന നേതാവും രാജ്യസഭയിലെ പ്രതിപക്ഷ നേതാവുമായ ഗുലാം നബി ആസാദ്, കപില്‍ സിബല്‍, ആനന്ദ് ശര്‍മ, മുകുള്‍ വാസ്‌നിക് തുടങ്ങിയ നേതാക്കള്‍ സോണിയയെ കാണുന്ന സംഘത്തിലുണ്ടാവുമെന്നാണു കരുതുന്നത്.
നേതൃത്വത്തെക്കണ്ട് പ്രശ്നങ്ങള്‍ അവതരിപ്പിക്കാന്‍ നേതാക്കള്‍ക്കുപോലും അവസരം ലഭിക്കുന്നില്ലെന്ന് മുതിര്‍ന്ന നേതാവായ കപില്‍ സിബല്‍ ഈയിടെയും വിമര്‍ശനം ഉന്നയിച്ചിരുന്നു. വിമര്‍ശകരുടെ അഭിപ്രായങ്ങള്‍ കേള്‍ക്കാനും അനുരഞ്ജനത്തിനുമായാണു കൂടിക്കാഴ്ച. കൂടിക്കാഴ്ചയില്‍ രാഹുല്‍ ഗാന്ധിയും പ്രിയങ്ക ഗാന്ധിയും പങ്കെടുക്കും.
Keywords: Sonia Gandhi Finally Agrees To Meet Congress Rebels. How It Happened, New Delhi, News, Politics, Congress, Sonia Gandhi, Meeting, Election, National.