രണ്ടുകോടി കര്‍ഷകര്‍ ഒപ്പിട്ട നിവേദനം രാഷ്ട്രപതി റാംനാഥ് കോവിന്ദിന് രാഹുല്‍ഗാന്ധി കൈമാറി; നിയമം പിന്‍വലിക്കുംവരെ പാര്‍ടി ഭേദമെന്യേ കര്‍ഷകര്‍കൊപ്പം നിലകൊള്ളുമെന്നും പ്രിയങ്കാ ഗാന്ധി അടക്കമുള്ള കോണ്‍ഗ്രസ് നേതാക്കള്‍
Dec 24, 2020, 13:34 IST
ന്യൂഡെല്‍ഹി: (www.kvartha.com 24.12.2020) വിവാദ കര്‍ഷക നിയമങ്ങള്‍ പിന്‍വലിക്കണമെന്നാവശ്യപ്പെട്ട് രണ്ടുകോടി കര്‍ഷകര്‍ ഒപ്പിട്ട നിവേദനം രാഷ്ട്രപതി റാംനാഥ് കോവിന്ദിന് കൈമാറാനെത്തിയ കോണ്‍ഗ്രസ് നേതാവ് രാഹുല്‍ ഗാന്ധിയുടെ നേതൃത്വത്തിലുള്ള കോണ്‍ഗ്രസ് എംപിമാരുടെ സംഘത്തെ ഡെല്‍ഹി പൊലീസ് തടഞ്ഞു. രാഷ്ട്രപതിയെ കാണാന്‍ മൂന്നുപേരെ മാത്രമേ അനുവദിക്കൂ എന്ന നിലപാടിലായിരുന്നു പൊലീസ്. തുടര്‍ന്ന് രാഹുല്‍ ഉള്‍പ്പെടെ രാഷ്ട്രപതിയെ കണ്ടു. എംപിമാരായ ഗുലാം നബി ആസാദ്, അധീര്‍ രഞ്ജന്‍ ചൗധരി എന്നിവരും രാഹുലിനൊപ്പം രാഷ്ട്രപതിയുമായി കൂടിക്കാഴ്ച നടത്തി. 
കര്‍ഷകര്‍ക്കു വേണ്ടിയാണ് പുതിയ നിയമങ്ങളെന്നാണ് സര്‍ക്കാര്‍ പറയുന്നത്. എന്നാല്‍ കര്‍ഷകരെ ദ്രോഹിക്കാന്‍ വേണ്ടിയാണിതെന്ന് രാഹുല്‍ പറഞ്ഞു. കാര്‍ഷിക നിയമങ്ങള്‍ പിന്‍വലിക്കുന്നതു വരെ കര്‍ഷകര്‍ പിന്മാറില്ല. നിയമം പിന്‍വലിക്കുംവരെ പാര്‍ടി ഭേദമെന്യേ കര്‍ഷകര്‍ക്കൊപ്പം നിലകൊള്ളുമെന്നും രാഹുല്‍ അറിയിച്ചു. ശീതകാലമാണ്. കര്‍ഷകരെല്ലാം വ്യഥയിലാണ്. പലരും മരിച്ചു വീഴുന്നു. ഇതൊന്നും പ്രധാനമന്ത്രി നരേന്ദ്രമോദി കേള്‍ക്കുന്നില്ലേ എന്നും രാഹുല്‍ ചോദിച്ചു.
പ്രിയങ്ക ഗാന്ധിയുടെ നേതൃത്വത്തില്‍ രാഷ്ട്രപതി ഭവനിലേക്കുള്ള പ്രതിഷേധ പ്രകടനം നേരത്തേ പൊലീസ് തടഞ്ഞിരുന്നു. ഇതേത്തുടര്‍ന്ന് പ്രിയങ്ക, കൊടിക്കുന്നില്‍ സുരേഷ് എംപി എന്നിവരടക്കമുള്ള നേതാക്കള്‍ കുത്തിയിരുന്ന് പ്രതിഷേധിച്ചു. നേതാക്കളെ അറസ്റ്റ് ചെയ്തു നീക്കാന്‍ ശ്രമം നടത്തിയെങ്കിലും പ്രവര്‍ത്തകര്‍ വാഹനത്തിനു മുന്നില്‍ തടസം തീര്‍ത്തു. തുടര്‍ന്ന് പ്രിയങ്ക ഗാന്ധി ഉള്‍പ്പെടെയുള്ളവരെ പൊലീസ് കസ്റ്റഡിയില്‍ എടുത്തു.
നിരോധനാജ്ഞ ലംഘിച്ചതിനാണിത്. രണ്‍ദീപ് സുര്‍ജേവാല, എംപിമാരായ കെ.സി. വേണുഗോപാല്‍, ടി എന്‍ പ്രതാപന്‍, ഹൈബി ഈഡന്‍, കൊടിക്കുന്നില്‍ സുരേഷ്, രാജ് മോഹന്‍ ഉണ്ണിത്താന്‍ തുടങ്ങിയവരെയും കസ്റ്റഡിയിലെടുത്തു. എഐസിസി ആസ്ഥാനത്തിനു മുന്നില്‍ ഒത്തു ചേര്‍ന്ന പ്രവര്‍ത്തകര്‍ പ്രതിഷേധം തുടരുകയാണ്.
കോണ്‍ഗ്രസ് ആദ്യം മുതല്‍ സമരത്തിനൊപ്പമുണ്ടെന്നും ഇനിയും തുടരുമെന്നും പ്രിയങ്ക ഗാന്ധി പറഞ്ഞു. ജനാധിപത്യപരമായി തെരഞ്ഞെടുക്കപ്പെട്ട എംപിമാരെയെങ്കിലും രാഷ്ട്രപതിയെ കാണാന്‍ അനുവദിക്കണമെന്നു പ്രിയങ്ക ആവശ്യപ്പെട്ടു. കര്‍ഷകര്‍ക്കൊപ്പം കോണ്‍ഗ്രസ് ഉറച്ചു നില്‍ക്കും. കേന്ദ്രത്തിനെതിരെ ശബ്ദിക്കുന്നവരെ തീവ്രവാദികളായി ചിത്രീകരിക്കാനാണു ശ്രമമെന്നും അവര്‍ കുറ്റപ്പെടുത്തി.
രണ്ടു ട്രക്കുകള്‍ നിറയെ രണ്ടു കോടി കര്‍ഷകര്‍ ഒപ്പിട്ട നിവേദനവുമായാണ് രാഹുല്‍ ഗാന്ധി ഉള്‍പ്പെടെ രാഷ്ട്രപതി ഭവനിലേക്ക് പുറപ്പെട്ടത്. പ്രകടനത്തിന് പൊലീസ് അനുമതി നിഷേധിച്ചതാണ് സംഘര്‍ഷത്തിനിടയാക്കിയത്. രാഹുല്‍ ഉള്‍പ്പെടെ ഏതാനും നേതാക്കള്‍ക്കു മാത്രം രാഷ്ട്രപതിയെ കാണാന്‍ അനുമതി നല്‍കുകയായിരുന്നു.
Keywords: Rahul Gandhi to lead Congress MPs' protest march against farm laws, New Delhi, News, Politics, Rahul Gandhi, President, Trending, Farmers, Protesters, National.
ഇവിടെ വായനക്കാർക്ക് അഭിപ്രായങ്ങൾ
രേഖപ്പെടുത്താം. സ്വതന്ത്രമായ
ചിന്തയും അഭിപ്രായ പ്രകടനവും
പ്രോത്സാഹിപ്പിക്കുന്നു. എന്നാൽ
ഇവ കെവാർത്തയുടെ അഭിപ്രായങ്ങളായി
കണക്കാക്കരുത്. അധിക്ഷേപങ്ങളും
വിദ്വേഷ - അശ്ലീല പരാമർശങ്ങളും
പാടുള്ളതല്ല. ലംഘിക്കുന്നവർക്ക്
ശക്തമായ നിയമനടപടി നേരിടേണ്ടി
വന്നേക്കാം.
