വന്‍ അഴിമതി; സഊദിയില്‍ 13 സര്‍ക്കാര്‍ ഉദ്യോഗസ്ഥരടക്കം നിരവധി പേര്‍ പിടിയില്‍; ഒഫീസിലും വസതിയിലും നടത്തിയ റെയ്ഡില്‍ 193 ദശലക്ഷം സഊദി റിയാല്‍ പിടിച്ചെടുത്തു

റിയാദ്: (www.kvartha.com 18.10.2020) വന്‍ അഴിമതി ആരോപണങ്ങളെ തുടര്‍ന്ന് സഊദി അറേബ്യയില്‍ സര്‍ക്കാര്‍ ഉദ്യോഗസ്ഥരടക്കം നിരവധി പേര്‍ പിടിയില്‍. റിയാദ് മേഖലയിലെ മുനിസിപ്പാലിറ്റിയില്‍ നിന്നുള്ള 13 സര്‍ക്കാര്‍ ഉദ്യോഗസ്ഥര്‍, നാല് ബിസിനസുകാര്‍, കരാര്‍ കമ്പനികളില്‍ ജോലി ചെയ്യുന്ന അഞ്ച് പ്രവാസികള്‍ എന്നിവരാണ് ഗുരുതരമായ തട്ടിപ്പ് ആരോപണങ്ങളെ തുടര്‍ന്ന് അറസ്റ്റിലായത്. സഊദി മേല്‍നോട്ട, അഴിമതി വിരുദ്ധ അതോറിറ്റി (നസാഹ) ആണ് ഇക്കാര്യം അറിയിച്ചത്.


അറസ്റ്റിലായവര്‍ അനധികൃത ഫണ്ട് ഉപയോഗിച്ച് നടത്തിയ റിയല്‍ എസ്റ്റേറ്റ് വാങ്ങലുകളുടെ ഒരു പട്ടികയും കണ്ടെത്തിയിട്ടുണ്ട്, ആകെ 142 ദശലക്ഷം സഊദി റിയാലാണ് ഇതിനായി ചെലവഴിച്ചത്.

കൂടാതെ, അറസ്റ്റുചെയ്തവരുടെ ബാങ്ക് അക്കൗണ്ടുകളില്‍ നിന്ന് ഏകദേശം 150 ദശലക്ഷം സഊദി റിയാല്‍ നസാഹ പിടിച്ചെടുത്തു, പ്രതികളിലൊരാള്‍ തന്റെ പദവി ഉപയോഗിച്ച് വാണിജ്യ സ്ഥാപനങ്ങള്‍ക്കായി ധനമന്ത്രാലയത്തിന്റെ ഇത്തിമാഡ് ഏകീകൃത ഡിജിറ്റല്‍ സേവന പ്ലാറ്റ് ഫോം വഴി 110 ദശലക്ഷത്തിലധികം സഊദി റിയാല്‍ ഉപയോഗിച്ചതായും കണ്ടെത്തി.

മറ്റ് അഴിമതി ഇടപാടുകള്‍ 2.5 ദശലക്ഷം സഊദി റിയാല്‍ വരുന്ന പലചരക്ക് പ്രീപെയ്ഡ് കാര്‍ഡുകള്‍, ഏകദേശം 1,50,000 ഇന്ധന പ്രീപെയ്ഡ് കാര്‍ഡുകള്‍, തുടങ്ങിയവയുമായി ബന്ധപ്പെട്ടിരിക്കുന്നു.