ടിക് ടോകില്‍ ഹീറോ ആകാന്‍ നടുറോഡില്‍ സ്‌കൂട്ടറിന് പിറകില്‍ യുവതിയെ ഇരുത്തി അപകടകരമാംവിധം അഭ്യാസ പ്രകടനം; നിയമങ്ങള്‍ കാറ്റില്‍ പറത്തി നടത്തുന്ന അഭ്യാസ വിഡിയോ വൈറലായതോടെ 21കാരന് പിടിവീണു

ബംഗളൂരു: (www.kvartha.com 12.06.2019) സമൂഹ മാധ്യമങ്ങളായ ഫേസ്ബുക്കും വാട്‌സാപ്പും വിട്ട് ഇപ്പോള്‍ യുവതി യുവാക്കള്‍ ടിക് ടോക്കിന്റെ പിന്നാലെയാണ്. ടിക് ടോക്കില്‍ ഫോളവേഴ്‌സിനെ കിട്ടാന്‍ കൗമാര പ്രായക്കാര്‍ ചെയ്തുകൂട്ടുന്ന കോപ്രായങ്ങള്‍ ചില്ലറയല്ല. വീടിനകത്തും പുറത്തും മാത്രമല്ല പൊതു സ്ഥലങ്ങളിലും ടിക് ടോക് വിഡിയോ ഷൂട്ട് നടക്കുന്നത് കൂടിവരികയാണ്.അതിന്റെ ഏറ്റവും പുതിയ ഉദാഹരമാണ് നടുറോഡില്‍ യുവതിയെ പിറകിലിരുത്തിയുള്ള 21കാരന്റെ അഭ്യാസപ്രകടനം.

സുരക്ഷാ സംവിധാനങ്ങളൊന്നുമില്ലാതെ നിയമങ്ങള്‍ കാറ്റില്‍ പറത്തി നടത്തുന്ന ഈ അഭ്യാസ വിഡിയോ വൈറലായതോടെ വിഡിയോയിലെ യുവാവിനെ പോലീസ് അറസ്റ്റ് ചെയ്തു. ബംഗളൂരുവിലാണ് സംഭവം നടന്നത്. 21 കാരനായ ബികോം വിദ്യാര്‍ത്ഥി നൂര്‍ അഹമ്മദാണ് അറസ്റ്റിലായത്. സ്‌കൂട്ടറിന്റെ പുറകില്‍ യുവതിയെ ഇരുത്തി അതിവേഗത്തില്‍ ബൈക്ക് സ്റ്റണ്ട് നടത്തുന്ന വീഡിയോ ആണ് വൈറലായത്. ഇരുവരും ഹെല്‍മെറ്റ് ധരിച്ചിട്ടുമില്ല.


റോഡില്‍ അപകടകരമായി വാഹനമോടിച്ചതിന് അറസ്റ്റ് ചെയ്ത നൂര്‍ അഹമ്മദിനെ മജിസ്‌ട്രേറ്റ് കോടതിയില്‍ ഹാജരാക്കുമെന്നും സ്വന്തമായി സ്‌കൂട്ടര്‍ ഇല്ലാത്ത നൂര്‍ കഴിഞ്ഞ പത്തുമാസത്തില്‍ അധികമായി സുഹൃത്തുകളുടെ വാഹനത്തില്‍ ബൈക്ക് അഭ്യാസം പരിശീലിക്കുകയായിരുന്നുവെന്നും പോലീസ് പറഞ്ഞു.