രാഹുല്‍ ഗാന്ധിയുടെ വയനാട്ടിലെ റെക്കോര്‍ഡ് വിജയത്തിനെതിരെ ഹൈക്കോടതിയെ സമീപിക്കാനൊരുങ്ങി സരിത എസ് നായര്‍; തെരഞ്ഞെടുപ്പ് റദ്ദാക്കണം എന്ന് ആവശ്യം

കൊച്ചി: (www.kvartha.com 24.05.2019) രാഹുല്‍ ഗാന്ധിയുടെ വയനാട്ടിലെ റെക്കോര്‍ഡ് വിജയത്തിനെതിരെ ഹൈക്കോടതിയെ സമീപിക്കാനൊരുങ്ങി സോളാര്‍ വിവാദ നായിക സരിത എസ് നായര്‍. വയനാട്ടില്‍ തന്റെ പത്രിക തള്ളിയ തെരഞ്ഞെടുപ്പ് കമ്മിഷന്‍ അമേത്തിയില്‍ യാതൊരു ബുദ്ധിമുട്ടും കൂടാതെ സ്വീകരിച്ചു. അതുകൊണ്ടുതന്നെ തന്റെ പത്രിക തള്ളിയ നടപടിക്കെതിരെയാണ് സരിത കോടതിയെ സമീപിക്കുന്നത്. രാഹുലിന്റെ തെരഞ്ഞെടുപ്പ് റദ്ദാക്കണം എന്നാണ് ആവശ്യം. തെരഞ്ഞെടുപ്പ് അന്യായമായാണ് കേസ് ഉന്നയിക്കുക.


രാജ്യം മുഴുവന്‍ ശ്രദ്ധ നേടിയ വയനാട് മണ്ഡലത്തില്‍ കേരളത്തിലെ തന്നെ റെക്കോര്‍ഡ് ഭൂരിപക്ഷത്തിലാണ് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി ജയിച്ചത്. 4,31,770 വോട്ടിന്റെ ഭൂരിപക്ഷത്തിലാണ് രാഹുലിന്റെ മിന്നും വിജയം. 7,06,367 വോട്ട് രാഹുല്‍ നേടിയപ്പോള്‍ രാഹുലിന്റെ ഭൂരിപക്ഷത്തിന്റെ പകുതിയോളം വോട്ട് നേടാന്‍ മാത്രമാണ് ഇടത് സ്ഥാനാര്‍ത്ഥി പി പി സുനീറിനായത്. 2,74,597 വോട്ടാണ് സുനീറിന് ലഭിച്ചതെങ്കില്‍ ബിഡിജെഎസിന്റെ തുഷാര്‍ വെള്ളാപ്പള്ളി നേടിയത് 78,816 വോട്ട് മാത്രം.