സംസ്ഥാനത്ത് ആഭ്യന്തരം പരാജയമല്ല, ചെന്നിത്തലയുടെ ഉപവാസം പരിഹാസ്യം: സി പി ഐ

തിരുവനന്തപുരം: (www.kvartha.com 30.0.2017) പ്രതിപക്ഷ നേതാവ് രമേശ് ചെന്നിത്തലയുടെ ഉപവാസം പരിഹാസ്യമാണെന്ന് സിപിഐ സംസ്ഥാന സെക്രട്ടറി കാനം രാജേന്ദ്രന്‍. സംസ്ഥാനത്ത് ആഭ്യന്തര വകുപ്പ് പരാജയമല്ലെന്നും അദ്ദേഹം പറഞ്ഞു.

ആര്‍എസ്എസ് പ്രവര്‍ത്തകനെ കൊലപ്പെടുത്തിയ കേസിലെ കുറ്റവാളികള്‍ക്കെതിരെ മുഖം നോക്കാതെ നടപടിയെടുക്കാന്‍ സര്‍ക്കാരിന് കഴിഞ്ഞിട്ടുണ്ട്. മുഖ്യപ്രതികളായ മുഴുവന്‍ പേരെയും മണിക്കൂറുകള്‍ക്കകം പിടികൂടാന്‍ സാധിച്ചത് ആഭ്യന്തര വകുപ്പിന്റെ നേട്ടം തന്നെയാണ്. അര്‍ദ്ധരാത്രിയില്‍ ഹര്‍ത്താല്‍ നടത്തുന്നത് രാഷ്ട്രിയ കക്ഷികള്‍ പരിശോധിക്കണമെന്നും കാനം ആവശ്യപ്പെട്ടു.


വീണ്ടും സര്‍വക്ഷിയോഗം വിളിക്കണം. സംസ്ഥാനത്ത് ക്രമസമാധാനം തകര്‍ക്കാന്‍ ഗൂഢാലോചന നടക്കുന്നുണ്ടോയെന്ന് സംശയിക്കുന്നതായും കാനം ആശങ്ക പ്രകടിപ്പിച്ചു. നേരത്തെ ആര്‍ എസ് എസ് പ്രവര്‍ത്തകന്റെ കൊലപാതകത്തില്‍ മുഴുവന്‍ പ്രതികളെയും പിടികൂടാനായത് കേന്ദ്ര ആഭ്യന്തര മന്ത്രി രാജ്‌നാഥ് സിംഗ് സംസ്ഥാന ആഭ്യന്തര മന്ത്രി കൂടിയായ മുഖ്യമന്ത്രി പിണറായി വിജയനെ ഫോണില്‍ വിളിച്ച് അഭിനന്ദിച്ചിരുന്നു.