Agra | 350ലേറെ വർഷങ്ങൾക്ക് ശേഷം താജ്മഹലിന് 'അപരൻ'; സഞ്ചാരികളെ ആകർഷിക്കാൻ ആഗ്രയിൽ മറ്റൊരു വെള്ള മാർബിൾ കെട്ടിടം

സോമി ബാഗിലെ സമാധി

ആഗ്രയിലെ താജ്മഹലിൽ നിന്ന് 12 കിലോമീറ്റർ അകലെയുള്ള സോമി ബാഗിൽ രാധസോമി വിഭാഗത്തിന്റെ സ്ഥാപകന്റെ പുതുതായി നിർമിച്ച ശവകുടീരമാണ് ശ്രദ്ധേയമായിരിക്കുന്നത്. 'രാധാസ്വാമി സത്സംഗ്' എന്ന വിശ്വാസത്തിന്റെ സ്ഥാപകനായ സച്ചിദാനന്ദ സോമിജി മഹാരാജിന്റെ അന്ത്യവിശ്രമ സ്ഥലമാണ് ആഗ്രയിലെ സോമി ബാഗ് സമാധി. 193 അടി ഉയരമുള്ള കെട്ടിടം രാജസ്ഥാനിലെ മക്രാനയിൽ നിന്നുള്ള വെള്ള മാർബിൾ കൊണ്ടാണ് നിർമിച്ചിരിക്കുന്നത്.

സ്വാമി ബാഗിലെ എല്ലാ കല്ലുകളിലും രാധാ സോമി എന്ന് എഴുതിയിരിക്കുന്നു. 52 കിണറുകളുടെ അടിത്തറയിലാണ് കെട്ടിടത്തിൻ്റെ നിർമാണം. സ്വാമി ബാഗിൻ്റെ ഉയരം താജ്മഹലിനേക്കാൾ കൂടുതലാണ്. മുകളിൽ സ്വർണ നിറത്തിൽ താഴികക്കുടവുമുണ്ട്. രാധാസ്വാമി വിഭാഗത്തിൻ്റെ അനുയായികളുടെ കോളനിക്ക് നടുവിലാണ് സ്വാമി ബാഗിലെ ഈ സമാധി സ്ഥിതി ചെയ്യുന്നത്.

ഈ വിഭാഗത്തിന് ഉത്തർപ്രദേശ്, പഞ്ചാബ്, കർണാടക തുടങ്ങിയ സംസ്ഥാനങ്ങളിലും വിദേശ രാജ്യങ്ങളിലും ദശലക്ഷക്കണക്കിന് അനുയായികളുണ്ട്. 1922 മുതൽ ഇന്നുവരെ സമാധി സ്ഥലത്തിന്റെ നിർമാണ പ്രവർത്തനങ്ങൾ തുടർച്ചയായി നടന്നുകൊണ്ടിരിക്കുന്നുവെന്നും ഭാവിയിലും ഈ മതസ്ഥലത്തിൻ്റെ പ്രവൃത്തികൾ ഇതുപോലെ തുടർന്ന് കൊണ്ടേയിരിക്കുമെന്നും അനുയായികൾ വിശ്വസിക്കുന്നു.

താജ്‌മഹൽ

ലോകത്തിലെ ഏഴ് അത്ഭുതങ്ങളില്‍ ഒന്നാണ്‌ താജ്‌മഹൽ. മുംതാസ് മഹൽ എന്ന ഭാര്യയുടെ ഓര്‍മ്മയ്ക്കായി മുഗൾ ചക്രവര്‍ത്തിയായ ഷാജഹാന്‍ നിര്‍മ്മിച്ചതാണിത്. ആഗ്രയിലെ യമുനാ നദിയുടെ തീരത്ത് വെള്ള മാര്‍ബിള്‍ കൊണ്ട് നിര്‍മ്മിച്ച ഈ അത്ഭുത സൗധം മുഗള്‍ വാസ്തുവിദ്യയുടെ മകുടോദാഹരണമാണ്. ഏറ്റവും മനോഹരമായ പ്രണയത്തിന്റെ പ്രതീകമായും താജ്‌മഹൽ കണക്കാക്കപ്പെടുന്നു. താജ്മഹലിന്റെ നിർമ്മാണം ആരംഭിച്ചത് 1632-ലാണ്. മുഖ്യഭാഗം ഏകദേശം 1638-ൽ പൂർത്തിയായി. പള്ളി, ഗസ്റ്റ് ഹൗസ് തുടങ്ങിയ പരിസരത്തെ നിർമിതികൾ പിന്നീട് പൂർത്തിയാക്കി. താജ്‌മഹൽ സമുച്ചയത്തിന്റെ നിർമ്മാണം പൂർണമായും 1653-ലാണ് പൂർത്തിയായത്.