Minister | എന്താണ് സഹമന്ത്രിയുടെ ചുമതല, സ്വതന്ത്രമായി പ്രവർത്തിക്കാനാവുമോ? അറിയാം വ്യത്യാസങ്ങൾ 

 
What is role of Minister of State India?

എൻഡിഎ സർക്കാരിൽ 30 കാബിനറ്റ് മന്ത്രിമാരും അഞ്ച് സ്വതന്ത്ര ചുമതലയുള്ള സഹമന്ത്രിമാരും 36 സഹമന്ത്രിമാരുമാണുള്ളത്

ന്യൂഡെൽഹി: (KVARTHA) മൂന്നാം എൻഡിഎ സർക്കാരിൽ 30 കാബിനറ്റ് മന്ത്രിമാരും അഞ്ച് സ്വതന്ത്ര ചുമതലയുള്ള സഹമന്ത്രിമാരും 36 സഹമന്ത്രിമാരുമാണുള്ളത്. കേരളത്തിൽ നിന്നുള്ള സുരേഷ് ഗോപിക്കും ജോർജ് കുര്യനും സഹമന്ത്രിസ്ഥാനമാണ് ലഭിച്ചത്. സുരേഷ് ഗോപിക്ക് കാബിനറ്റ് പദവി ലഭിക്കുമെന്ന് നേരത്തെ അഭ്യൂഹങ്ങൾ ഉണ്ടായിരുന്നു. എന്നാൽ അതുണ്ടായില്ല. 

ഈ സാഹചര്യത്തിൽ എന്താണ് സഹമന്ത്രിമാർക്ക് ചെയ്യാനാവുക എന്ന സംശയം പലർക്കുമുണ്ടാകാം. കാബിനറ്റ് മന്ത്രി, സ്വതന്ത്ര ചുമതലയുള്ള സഹമന്ത്രി, സഹമന്ത്രി എന്നിങ്ങനെ മൂന്ന് തരത്തിലുള്ള മന്ത്രിമാരാണ് കേന്ദ്രമന്ത്രിസഭയിലുള്ളത്. ഈ മന്ത്രിസ്ഥാനങ്ങൾ തമ്മിൽ എന്താണ് വ്യത്യാസമെന്നും അവരുടെ ചുമതലകൾ എന്താണെന്നും അറിയാം.

കാബിനറ്റ് മന്ത്രി

കേന്ദ്രസർക്കാരിൽ പ്രധാനമന്ത്രി കഴിഞ്ഞാൽ ഏറ്റവും കൂടുതൽ അധികാരമുള്ളത് കാബിനറ്റ് മന്ത്രിക്കാണ്. 
പ്രധാനമന്ത്രിയെ നേരിട്ട് റിപ്പോർട്ട് ചെയ്യുന്നതും കാബിനറ്റ് മന്ത്രിമാരാണ്. ഇവർക്ക് ഒന്നിലധികം വകുപ്പുകൾ നൽകാറുണ്ട്, അവയുടെ മുഴുവൻ ഉത്തരവാദിത്തവും വഹിക്കാനും കഴിയും. സർക്കാർ സുപ്രധാന തീരുമാനങ്ങൾ എടുക്കുന്ന മന്ത്രിസഭാ യോഗങ്ങളിൽ ഈ മന്ത്രിമാർ നിർബന്ധമായും പങ്കെടുക്കണം. മന്ത്രിസഭാ യോഗത്തിലാണ് സർക്കാർ എല്ലാ തീരുമാനങ്ങളും എടുക്കുന്നത്. പൊതുവെ പരിചയ സമ്പന്നരായ എംപിമാർക്കാണ് കാബിനറ്റ് മന്ത്രിസ്ഥാനം നൽകുന്നത്.

സ്വതന്ത്ര ചുമതലയുള്ള സഹമന്ത്രി 

കാബിനറ്റ് മന്ത്രിമാർക്ക് ശേഷം അധികാരമുള്ളവരാണ് സ്വതന്ത്ര ചുമതലയുള്ള സഹമന്ത്രിമാർ. ഈ വിഭാഗത്തിലുള്ള മന്ത്രിമാരും പ്രധാനമന്ത്രിയുമായി നേരിട്ട് റിപ്പോർട്ട് ചെയ്യുകയും അവർക്ക് ഏൽപ്പിച്ച വകുപ്പിൻ്റെ സ്വതന്ത്ര ചുമതല വഹിക്കുകയും ചെയ്യുന്നു. മന്ത്രാലയത്തിൻ്റെ മുഴുവൻ ഉത്തരവാദിത്തവും ഇത്തരത്തിലുള്ള മന്ത്രിമാരിൽ നിക്ഷിപ്തമാണ്. മന്ത്രിസഭാ യോഗങ്ങളിൽ സ്വതന്ത്ര ചുമതലയുള്ള സഹമന്ത്രിമാർ പങ്കെടുക്കാറില്ല, എന്നാൽ ആവശ്യമെങ്കിൽ ഈ യോഗങ്ങളിൽ തങ്ങളുടെ അഭിപ്രായം അവതരിപ്പിക്കാം.

സഹമന്ത്രി 

മൂന്നാമത്തെ വിഭാഗം സഹമന്ത്രിമാരാണ്. യഥാർത്ഥത്തിൽ ഇവർ കാബിനറ്റ് മന്ത്രിമാരുടെ സഹായികളാണ്. സഹമന്ത്രി റിപ്പോർട്ട് ചെയ്യുന്നത് പ്രധാനമന്ത്രിക്കല്ല, കാബിനറ്റ് മന്ത്രിക്കാണ്. സാധാരണയായി, മന്ത്രിസഭയുടെ വലുപ്പമനുസരിച്ച്, ഒരു കാബിനറ്റ് മന്ത്രിയുടെ കീഴിൽ ഒന്നോ രണ്ടോ സഹമന്ത്രിമാരെ നിയമിക്കാറുണ്ട്. ആഭ്യന്തരം, ധനം, ആരോഗ്യം, വിദ്യാഭ്യാസം തുടങ്ങിയ വലിയ മന്ത്രാലയങ്ങളിൽ നിരവധി വകുപ്പുകൾ ഉൾപ്പെടുന്നു. ഇതിൽ വിവിധ വകുപ്പുകളുടെ ചുമതല സഹമന്ത്രിമാർക്കാണ് നൽകുക.

ഇവിടെ വായനക്കാർക്ക് അഭിപ്രായങ്ങൾ രേഖപ്പെടുത്താം. സ്വതന്ത്രമായ ചിന്തയും അഭിപ്രായ പ്രകടനവും പ്രോത്സാഹിപ്പിക്കുന്നു. എന്നാൽ ഇവ കെവാർത്തയുടെ അഭിപ്രായങ്ങളായി കണക്കാക്കരുത്. അധിക്ഷേപങ്ങളും വിദ്വേഷ - അശ്ലീല പരാമർശങ്ങളും പാടുള്ളതല്ല. ലംഘിക്കുന്നവർക്ക് ശക്തമായ നിയമനടപടി നേരിടേണ്ടി വന്നേക്കാം.

Tags

Share this story

wellfitindia