New Criminal Laws | രാജ്യത്തെ ക്രിമിനൽ നിയമങ്ങള്‍ പൂർണമായും മാറും; ജൂലൈ 1 മുതല്‍ പ്രാബല്യത്തില്‍; എന്താണ് പുതിയ മാറ്റങ്ങൾ? മാറുന്നത് ബ്രിട്ടീഷ് കാലത്തെ നിയമങ്ങൾ!

 

കൊളോണിയൽ കാലത്തെ ഐപിസി, സിആർപിസി എന്നിവയ്ക്ക് പകരമായാണ് പുതിയ ക്രിമിനൽ നിയമങ്ങൾ അവതരിപ്പിച്ചിരിക്കുന്നത്. ഈ മൂന്ന് നിയമങ്ങൾക്കും കഴിഞ്ഞ വർഷം ഡിസംബർ 21 ന് പാർലമെൻ്റിൻ്റെ അംഗീകാരം ലഭിക്കുകയും ഡിസംബർ 25 ന് രാഷ്ട്രപതി ദ്രൗപതി മുർമു അനുമതി നൽകുകയും ചെയ്തിരുന്നു. ഓഗസ്റ്റ് 11ന് കേന്ദ്ര ആഭ്യന്തരമന്ത്രി അമിത് ഷാ പാര്‍ലമെന്റില്‍ അവതരിപ്പിച്ച ആദ്യ ബില്ലുകള്‍ സ്റ്റാന്‍ഡിങ് കമ്മിറ്റിക്ക് വിട്ടിരുന്നു.

കമ്മിറ്റി നവംബര്‍ പത്തിന് റിപ്പോര്‍ട്ട് സമര്‍പ്പിച്ചതിന് പിന്നാലെ ഡിസംബര്‍ 11-ന് ബില്ലുകള്‍ പിന്‍വലിച്ചത് ശ്രദ്ധേയമായിരുന്നു. ശീതകാല സമ്മേളനത്തില്‍ മാറ്റങ്ങളോടെ അവതരിപ്പിച്ച പുതിയ ബില്ലുകളായിരുന്നു സഭകള്‍ പാസാക്കിയത്. വിവിധ കുറ്റകൃത്യങ്ങൾ നിർവചിച്ചും അതിനുള്ള ശിക്ഷയും നിർവചിച്ചുകൊണ്ട് രാജ്യത്തെ ക്രിമിനൽ നീതിന്യായ വ്യവസ്ഥയെ പൂർണമായും മാറ്റുക എന്നതാണ് മൂന്ന് നിയമങ്ങളുടെയും ലക്ഷ്യം.

മൂന്ന് നിയമങ്ങളിലും വലിയ മാറ്റങ്ങൾ വരുത്തി

വിദഗ്ഗരുടെ അഭിപ്രായത്തിൽ, മൂന്ന് പുതിയ നിയമങ്ങൾ തീവ്രവാദം, ആൾക്കൂട്ട കൊലപാതകം, ദേശീയ സുരക്ഷയ്ക്ക് ഭീഷണിയായ കുറ്റകൃത്യങ്ങൾ എന്നിവയ്ക്ക് ശിക്ഷ കൂടുതൽ കർശനമാക്കും. ഭാരതീയ ന്യായ സംഹിത ഇന്ത്യൻ പീനൽ കോഡ് (IPC) 1860 ന് പകരമാകും. രാജ്യത്തെ ക്രിമിനൽ കുറ്റങ്ങൾ സംബന്ധിച്ച പ്രധാന നിയമമാണിത്. സാമൂഹ്യ സേവനം ഒരു ശിക്ഷയായാണ് പുതിയ ബിൽ നിർവചിക്കുന്നത്. ഇതിന് കീഴിൽ നേരത്തെയുണ്ടായിരുന്ന 511 സെക്ഷനുകൾക്ക് പകരം ഇനി 358 വിഭാഗങ്ങളുണ്ടാകും. 21 പുതിയ കുറ്റകൃത്യങ്ങൾ കൂട്ടിച്ചേർക്കുകയും 41 കുറ്റകൃത്യങ്ങളിൽ ശിക്ഷാ സമയം വർധിപ്പിക്കുകയും ചെയ്തു.

ഭാരതീയ നാഗരിക് സുരക്ഷാ സംഹിത ക്രിമിനൽ പ്രൊസീജ്യർ കോഡ് 1973 (CrPC) ന് പകരമാകും. അറസ്റ്റ്, പ്രോസിക്യൂഷൻ, ജാമ്യം എന്നിവ ഇതിന് കീഴിലാണ് വരുന്നത്. പുതിയ നിയമത്തിൽ 531 വിഭാഗങ്ങൾ ഉണ്ടാകും, നേരത്തെ 484 വിഭാഗങ്ങൾ മാത്രമാണുണ്ടായിരുന്നത്. 177 വകുപ്പുകളിൽ മാറ്റം വരുത്തുകയും ഒമ്പത് പുതിയ വകുപ്പുകൾ ചേർക്കുകയും 14 വകുപ്പുകൾ റദ്ദാക്കുകയും ചെയ്തിട്ടുണ്ട്.

ഭാരതീയ സാക്ഷ്യ ഇന്ത്യൻ എവിഡൻസ് ആക്റ്റ് 1872 ന് പകരമാകും. ഇന്ത്യൻ കോടതികളിലെ തെളിവുകളുടെ സ്വീകാര്യതയെ അടിസ്ഥാനമാക്കിയുള്ളതാണ് ഈ നിയമം. എല്ലാ സിവിൽ, ക്രിമിനൽ നടപടികൾക്കും ഇത് ബാധകമാണ്. ഈ നിയമങ്ങളിൽ, എഫ്ഐആർ മുതൽ കേസ് ഡയറി, ചാർജ് ഷീറ്റ് വരെ മുഴുവൻ പ്രക്രിയയും ഡിജിറ്റൽ ആക്കാൻ വ്യവസ്ഥ ചെയ്തിട്ടുണ്ട്. ഇതിന് കീഴിൽ നേരത്തെയുണ്ടായിരുന്ന 167 സെക്ഷനുകൾക്ക് പകരം ഇനി 170 സെക്ഷനുകളുണ്ടാകും. 24 വിഭാഗങ്ങളിൽ മാറ്റങ്ങൾ വരുത്തിയിട്ടുണ്ട്.

വകുപ്പുകളുടെ നമ്പറുകളിൽ മാറ്റം

പുതിയ നിയമത്തിൽ ഐപിസി പ്രകാരമുള്ള ചില വകുപ്പുകളുടെ നമ്പറുകളിൽ മാറ്റം വരുത്തിയിട്ടുണ്ട്.

* ഐപിസി പ്രകാരം സെക്ഷൻ 302 കൊലപാതകത്തിനുള്ള ശിക്ഷയാണ് കൈകാര്യം ചെയ്തത്. ഇപ്പോൾ കൊലപാതകം സെക്ഷൻ 101 ന് കീഴിൽ വരും. കൂടാതെ, പുതിയ നിയമപ്രകാരം, സെക്ഷൻ 302 പിടിച്ചുപറിയുമായി ബന്ധപ്പെട്ടിരിക്കുന്നു.
* ഐപിസിയുടെ 420-ാം വകുപ്പ് വഞ്ചന കുറ്റമാണ്, എന്നാൽ പുതിയ നിയമത്തിൽ അതേ നമ്പറിൽ ഒരു വകുപ്പ് ഇല്ല. ഭാരതീയ ന്യായ സംഹിതയുടെ 316-ാം വകുപ്പിന് കീഴിലാണ് തട്ടിപ്പ് വരുന്നത്.
* നിയമവിരുദ്ധമായി സംഘം ചേരുന്നതുമായി ബന്ധപ്പെട്ട ഐപിസിയുടെ 144-ാം വകുപ്പിനെ ഇനി മുതൽ സെക്ഷൻ 187 എന്ന് വിളിക്കും.
* മാനനഷ്ടം കൈകാര്യം ചെയ്യുന്ന ഐപിസിയുടെ 499-ാം വകുപ്പ് ഇപ്പോൾ പുതിയ നിയമത്തിൻ്റെ 354-ാം വകുപ്പിന് കീഴിലാണ്.
* ബലാത്സംഗത്തിനുള്ള ശിക്ഷ കൈകാര്യം ചെയ്യുന്ന വകുപ്പ് 376, ഇപ്പോൾ സെക്ഷൻ 63 ആണ്. പുതിയ നിയമപ്രകാരം, സെക്ഷൻ 64 ശിക്ഷയെ കുറിച്ച് പ്രതിപാദിക്കുന്നു, അതേസമയം സെക്ഷൻ 70 കൂട്ട ബലാത്സംഗ കുറ്റമാണ് കൈകാര്യം ചെയ്യുന്നത്.
* രാജ്യദ്രോഹം കൈകാര്യം ചെയ്യുന്ന ഐപിസിയുടെ 124-എ വകുപ്പ് ഇപ്പോൾ പുതിയ നിയമപ്രകാരം സെക്ഷൻ 150 എന്നറിയപ്പെടുന്നു.