ചരിത്രം
2007 നവംബർ 16-ന്, ഐക്യരാഷ്ട്രസഭ ജനറല് അസംബ്ലിയുടെ 62-ാമത് സെഷനില് ഫെബ്രുവരി 20 ലോക സാമൂഹിക നീതി ദിനമായി പ്രഖ്യാപിച്ചു. 2009 ഫെബ്രുവരി 20നാണ് ആദ്യമായി ലോക സാമൂഹ്യ നീതി ദിനമായി ആചരിച്ചത്. സമൂഹത്തെ ചിതൽ പോലെ പൊള്ളയാക്കുന്ന സാമൂഹിക തിന്മകളും വിവേചനവും അസമത്വവും അവസാനിപ്പിക്കാനുള്ള കൂട്ടായ പരിശ്രമത്തിൻ്റെ പ്രതീകമായി എല്ലാ വർഷവും ആചരിക്കാൻ തുടങ്ങി.
ലോക സാമൂഹ്യനീതി ദിനത്തിൻ്റെ ലക്ഷ്യം നിറവേറ്റുന്നതിനും ഈ ദിനത്തിൻ്റെ പ്രാധാന്യത്തെക്കുറിച്ച് ജനങ്ങൾക്കിടയിൽ അവബോധം പ്രചരിപ്പിക്കുന്നതിനും ഐക്യരാഷ്ട്രസഭയും ഇൻ്റർനാഷണൽ ലേബർ ഓഫീസും (ILO) ഒരുമിച്ച് പ്രവർത്തിക്കുന്നു. എല്ലാ വർഷവും ലോക സാമൂഹ്യ നീതി ദിനത്തിന്റെ ഭാഗമായി ഓരോ പ്രമേയം തിരഞ്ഞെടുക്കാറുണ്ട്. 'ഔപചാരിക തൊഴിലിലൂടെ സാമൂഹ്യനീതി കൈവരിക്കുക' എന്നതായിരുന്നു 2022 ലെ പ്രമേയം. 'തടസ്സങ്ങളെ മറികടക്കുക, സാമൂഹ്യനീതിക്ക് അവസരങ്ങള് അഴിച്ചുവിടുക' എന്നായിരുന്നു 2023 ലെ പ്രമേയം.
പ്രാധാന്യം
സാമൂഹിക അനീതിക്കെതിരെ പ്രവർത്തിക്കുകയും, ശാരീരിക വിവേചനം, ലിംഗഭേദം, നിരക്ഷരത, ദാരിദ്ര്യം, മതപരമായ വിവേചനം, സാമ്പത്തികം, തൊഴിൽ വിവേചനം, വർണ വിവേചനം എന്നിങ്ങനെയുള്ള വേർതിരിവുകൾ സമൂഹത്തിൽ നിന്ന് തുടച്ചു മാറ്റുവാൻ അന്താരാഷ്ട്രതലത്തില് വിവിധ സമൂഹങ്ങളെ ഒരുമിച്ച് കൊണ്ടുവരികയുമാണ് ഈ ദിനം ആചരിക്കുന്നതിലൂടെ പ്രധാനമായും ലക്ഷ്യമിടുന്നത്. അതിലൂടെ മാനുഷിക തുല്യതയ്ക്കൊപ്പം എല്ലാവർക്കും നീതി ഉറപ്പ് വരുത്തുന്നതിനും സഹായമാകുന്നു. ജാതിയുടെയോ മതത്തിന്റെയോ വർണത്തിന്റെയോ പണത്തിന്റെയോ തൊഴിലിന്റെയോ രാഷ്ട്രീയത്തിന്റെയോ മറ്റു സ്ഥാനമാനങ്ങളുടെയോ പേരിൽ അനീതിക്ക് ഇരയാവാതിരിക്കട്ടെയെന്നാണ് ഈ ദിനം മുന്നോട്ട് വെക്കുന്ന തത്വം.
Keywords: World Social Justice, UNO, World, New Delhi, Discrimination, Individuals, Purpose, Fear, Exploitation, Injustice, Gender, Color, Importance of World Day of Social Justice.