COVID | കോവിഡ് വീണ്ടും ആശങ്ക പടർത്തുന്നു; ഇന്ത്യയിൽ കണ്ടെത്തിയ കൊറോണയുടെ പുതിയ വകഭേദം എത്രത്തോളം അപകടകരമാണ്?

സംസ്ഥാനത്ത് 79 വയസുള്ള ഒരു സ്ത്രീയുടെ സാമ്പിൾ നവംബർ 18 ന് പരിശോധിച്ചതോടെയാണ് രോഗം സ്ഥിരീകരിച്ചത്. ഇവർക്ക് ഇൻഫ്ലുവൻസ പോലുള്ള രോഗങ്ങളുടെ (ILA) നേരിയ ലക്ഷണങ്ങൾ ഉണ്ടായിരുന്നു. നിലവിൽ രാജ്യത്ത് 90 ശതമാനത്തിലധികം കോവിഡ് -19 കേസുകളും ഗുരുതരമല്ലെന്നും രോഗബാധിതരായ ആളുകൾ വീടുകളിൽ ക്വാറന്റൈനിലാണ് കഴിയുന്നതെന്നും വൃത്തങ്ങൾ അറിയിച്ചു. നേരത്തെ, സിംഗപ്പൂരിലെ ഇന്ത്യൻ യാത്രക്കാരനിൽ ജെഎൻ.1 അണുബാധ കണ്ടെത്തിയിരുന്നു. തമിഴ്‌നാട്ടിലെ തിരുച്ചിറപ്പള്ളി സ്വദേശിയായ ഇയാൾ ഒക്ടോബർ 25ന് സിംഗപ്പൂരിലേക്ക് പോയിരുന്നു.

സിംഗപ്പൂരിൽ കോവിഡ് -19 കേസുകൾ തുടർച്ചയായി വർധിച്ചുകൊണ്ടിരിക്കുന്നതിനാൽ, തിരക്കേറിയ സ്ഥലങ്ങളിൽ മാസ്ക് ധരിക്കാൻ രാജ്യത്തെ ആരോഗ്യ മന്ത്രാലയം ജനങ്ങളോട് അഭ്യർത്ഥിച്ചു. ഡിസംബർ മൂന്ന് മുതൽ ഒമ്പത് വരെ, കോവിഡ് -19 കേസുകൾ 56,043 ആയി ഉയർന്നു. രോഗബാധിതരുടെ എണ്ണം 75% വർദ്ധിച്ചതായി മന്ത്രാലയം അറിയിച്ചു. ആശുപത്രിയിൽ പ്രവേശിപ്പിക്കപ്പെടുന്ന ശരാശരി ആളുകളുടെ എണ്ണം 225 ൽ നിന്ന് 350 ആയി ഉയർന്നു. തീവ്രപരിചരണ വിഭാഗത്തിൽ പ്രതിദിന ശരാശരി കേസുകൾ നാലിൽ നിന്ന് ഒമ്പതായും വർധിച്ചതായി റിപോർട്ടുകൾ പറയുന്നു.

എന്താണ് ജെഎൻ വൺ?

കൊറോണയുടെ പുതിയ ജെഎൻ വൺ വകഭേദം ഇതുവരെ കണ്ടെത്തിയ മറ്റ് വകഭേദങ്ങളെ അപേക്ഷിച്ച് കൂടുതൽ പകർച്ചവ്യാധിയായി കണക്കാക്കപ്പെടുന്നു. പിറോള വേരിയന്റ് എന്നും അറിയപ്പെടുന്ന ബിഎ.2.86 എന്ന കുടുംബത്തിൽ നിന്നാണ് ഈ പുതിയ കോവിഡ് വകഭേദം ഉത്ഭവിച്ചതെന്ന് ശാസ്ത്രജ്ഞർ പറയുന്നു. ജെഎൻ വൺ വകഭേദത്തിന്റെ സ്പൈക്ക് പ്രോട്ടീനിൽ 41 മ്യൂട്ടേഷനുകൾ ഉണ്ടായിട്ടുണ്ട്, എന്നാൽ മുമ്പത്തെ വകഭേദങ്ങളിൽ ഇത്രയധികം മാറ്റങ്ങൾ കണ്ടില്ല. പുതിയ വകഭേദം മുമ്പത്തേക്കാൾ വേഗത്തിൽ പടരാനുള്ള സാധ്യതയുണ്ടെന്നും വാക്സിനേഷൻ ഫലം ചെയ്യില്ലെന്നുമാണ് ആരോഗ്യവിദഗ്ധർ ചൂണ്ടികാട്ടുന്നത്‌.

ജെഎൻ വൺ ലക്ഷണങ്ങൾ

പനി
വിറയൽ
നെഞ്ച് വേദന
ശ്വസന പ്രശ്നം
തൊണ്ടവേദന
പേശി വേദനയും ക്ഷീണവും
തലവേദന
ഛർദി
ഓക്കാനം
രുചിയോ മണമോ നഷ്ടപ്പെടൽ
ചുമ
മൂക്കൊലിപ്പ്

ആരോഗ്യ വിദഗ്ധരുടെ അഭിപ്രായത്തിൽ, കൊറോണയുടെ ഈ വകഭേദം ഒഴിവാക്കാൻ വാക്സിനേഷൻ എടുക്കേണ്ടത് വളരെ പ്രധാനമാണ്. അണുബാധയുടെ ലക്ഷണങ്ങളുള്ള ആളുകൾ വീടിന് പുറത്തിറങ്ങരുത്. ആളുകളുമായി സമ്പർക്കം പുലർത്തുന്നതും ഒഴിവാക്കണം.