Sneeze | തുമ്മൽ വന്നു, മൂക്ക് അമർത്തി പിടിച്ചു; യുവാവിന് സംഭവിച്ചത്! ഡോക്ടർമാർ പോലും അമ്പരന്നു; ഇക്കാര്യം ശ്രദ്ധിക്കുക

ലന്‍ഡന്‍ : (KVARTHA) തുമ്മൽ സാധാരണ പ്രക്രിയയാണ്, എന്നാൽ ഇത് ആളുകളുടെ മുന്നിൽ വരുമ്പോൾ ചിലർക്ക് ലജ്ജയും തോന്നുന്നു. ഇതൊരു രോഗമോ ആരോഗ്യ സംബന്ധമായ ഏതെങ്കിലും തരത്തിലുള്ള പ്രശ്നമോ അല്ല. തുമ്മൽ തടയുന്നത് ആരോഗ്യത്തിന് ഹാനികരമാണ്. തുമ്മൽ തടയാൻ ശ്രമിക്കുന്നതിനിടെ ഒരാളുടെ ശ്വാസനാളം പൊട്ടിയ സംഭവമാണ് ബ്രിട്ടനിൽ നിന്ന് പുറത്തുവന്നിരിക്കുന്നത്. ഡോക്ടർമാരുടെ അഭിപ്രായത്തിൽ ഒരാളുടെ ശ്വാസനാളത്തിന് പരിക്കേൽക്കുന്നത് വളരെ അപൂർവമാണ്.


എന്താണ് സംഭവം?

ബിഎംജെ (BMJ) എന്ന ജേണലിലാണ് സംഭവത്തെ കുറിച്ചുള്ള പഠന റിപ്പോർട്ട് പ്രസിദ്ധീകരിച്ചിരുന്നത്. കാർ ഓടിക്കുന്നതിനിടെ 34-കാരനായ യുവാവിന് തുമ്മൽ അനുഭവപ്പെട്ടതിനെ തുടർന്ന് ഇയാൾ വിരൽ കൊണ്ട് മൂക്കിൽ അമർത്തി പിടിച്ചു. ഇതോടെ വായയ്ക്കുള്ളിൽ മർദം സൃഷ്ടിക്കപ്പെട്ടു. കൂടാതെ ശ്വാസനാളത്തിൽ രണ്ട് മില്ലിമീറ്റർ ദ്വാരവും ഉണ്ടായതായി പഠനത്തിൽ പറയുന്നു. ലോകത്ത് ഇത്തരമൊരു സംഭവം ഇതാദ്യമാണെന്നാണ് ഡോക്ടർമാർ വ്യക്തമാക്കുന്നത്.

ഡോക്ടർമാർ പോലും അമ്പരന്നു

ശ്വാസനാളം പൊട്ടിയതിനെത്തുടർന്ന്, ഈ വ്യക്തി വേദനകൊണ്ട് പുളയാൻ തുടങ്ങി. അതിനുശേഷം അദ്ദേഹത്തെ തിടുക്കത്തിൽ ആശുപത്രിയിലേക്ക് കൊണ്ടുപോയി. അവസ്ഥ കണ്ട് ഡോക്ടർമാർ പോലും അമ്പരന്നു. ശ്വാസനാളം പൊട്ടിയതിനുശേഷവും ഇയാൾക്ക് ഭക്ഷണം വിഴുങ്ങുന്നതിനോ സംസാരിക്കുന്നതിനോ ഒരു ബുദ്ധിമുട്ടും നേരിടുന്നില്ല എന്ന വസ്തുതയാണ് ഡോക്ടർമാരെ അത്ഭുതപ്പെടുത്തിയത്. എന്നിരുന്നാലും, ഈ സമയത്ത് ഇയാളുടെ കഴുത്ത് വല്ലാതെ വീർക്കുകയും ശബ്ദത്തിൽ നേരിയ മാറ്റം അനുഭവപ്പെടുകയും ചെയ്തു. ചികിത്സയെ തുടർന്ന് യുവാവ് അഞ്ച് ആഴ്ചയ്ക്കുള്ളിൽ പൂർണമായി സുഖം പ്രാപിച്ചു.

തുമ്മൽ തടയുന്നതിന്റ ദോഷങ്ങൾ

തുമ്മൽ തടയുന്നത് പല വിധത്തിൽ ആരോഗ്യത്തിന് ഹാനികരമാണ്. തുമ്മൽ തടഞ്ഞാൽ വായിൽ സമ്മർദമുണ്ടാകുന്നത് കർണപടത്തിൽ എത്താൻ ഇടയാക്കും, ഇത് ചിലപ്പോൾ കർണപടലം പൊട്ടാൻ കാരണമാകും. കൂടാതെ വായയ്ക്കുള്ളിൽ മർദം വർധിക്കാൻ തുടങ്ങുമ്പോൾ ശ്വാസനാളത്തിൽ ദ്വാരത്തിനും ഇടയാക്കും. ഇതുവഴി രക്തക്കുഴലുകൾ പൊട്ടാനുള്ള സാധ്യതയുമുണ്ട്.