തെരെഞ്ഞെടുപ്പു തോല്‍വിയില്‍ നിന്നും ഉയിര്‍ത്തെഴുന്നേറ്റവര്‍

വിദ്യാഭ്യാസ മന്ത്രിയായിരുന്ന ജോസഫ് മുണ്ടശേരി തൃശൂരില്‍ വെച്ചു തോല്‍വി ഏറ്റുവാങ്ങിയിട്ടുണ്ട്. എസ് കെ പൊറ്റക്കാട്, സുകുമാര്‍ അഴിക്കോട് തുടങ്ങിയ എഴുത്തുകാര്‍ മുതല്‍ പ്രഗല്‍ഭ സിനിമാക്കാരായ രാമുകാര്യട്ട്, ഒ എന്‍ വി, മുരളി, ഇന്നസെന്റ് തുടങ്ങിയവരും മല്‍സരിച്ചു തോററിട്ടും പ്രശസ്തി മങ്ങാതെയിരുന്നിട്ടുണ്ട്. എന്തിനേറെ സാക്ഷാല്‍ ഇ കെ നായനാരും, ബാലാനന്ദനും കാസര്‍കോടിന്റെ മണ്ണിലാണ് തോറ്റത്. പിന്നീട് നായനാര്‍ മുഖ്യമന്ത്രിയായി. ബാലാനന്ദന്‍ സി ഐ ടി യുവിന്റെ അഖിലേന്ത്യാ സെക്രട്ടറിയായി. നായനാരെ തോല്‍പ്പിച്ച കടന്നപ്പള്ളി ഇന്നും മന്ത്രിയായി തുടരുന്നുണ്ട്. ഇന്നത്തെ കെപിസിസി പ്രസിഡണ്ട് മുല്ലപ്പള്ളിയും ഐക്യ ജനാധിപത്യ മുന്നണിയുടെ ശില്‍പി കെ കരുണാകരനും രമേശ് ചെന്നിത്തലക്കും തോറ്റ ചരിത്രമുണ്ട്. ഇവരൊക്കെ ജനം മറക്കാത്ത നേതാക്കളായി പിന്നീട് രാഷ്ട്രീയ തട്ടകങ്ങളില്‍ നിറഞ്ഞാടി.

പ്രധാനമന്ത്രി സ്ഥാനാര്‍ത്ഥിയായി മല്‍സരിച്ച 1971ല്‍ റായ്ബറേലിയില്‍ ഇന്ദിരാഗാന്ധി തോറ്റതും, കൊച്ചുമകന്‍ രാഹുല്‍ ഗാന്ധി അമേഠിയില്‍ തോറ്റതും അവരുടെ പ്രശസ്തിക്ക് മങ്ങലേല്‍ക്കാന്‍ ഇടയായിട്ടില്ല. മുഖ്യമന്ത്രി സ്ഥാനാര്‍ത്ഥിയായി മല്‍സരിച്ച ജ്യോതിബസു1971ല്‍ 3800 വോട്ടിനു ബംഗാളില്‍ തോറ്റു. പിന്നീട് മുന്ന് പതിറ്റാണ്ടു കാലം അദ്ദേഹം മുഖ്യമന്ത്രിയായി എന്നു മാത്രമല്ല, പ്രധാനമന്ത്രി സ്ഥാനത്തിലേക്കു വരെ പരിഗണിക്കപ്പെട്ടു. മാരാരിക്കുളത്തുകാര്‍ വി എസിനെ തോല്‍പ്പിച്ചതും മുഖ്യമന്ത്രി സ്ഥാനാര്‍ത്ഥിയായതു കൊണ്ടു മാത്രമാണ്. മമത തോറ്റതും മുഖ്യമന്ത്രി സ്ഥാനാര്‍ത്ഥിയായാണല്ലോ. മമത കിരീടമില്ലാത്ത രാജ്ഞിയായി വീണ്ടും മുഖ്യമന്ത്രി പദത്തിലെത്തിച്ചേര്‍ന്നു.

കെപിസിസി പ്രസിഡണ്ടായിരിക്കെ മല്‍സരിക്കാതെ മന്ത്രിയായി ഒടുവില്‍ തോല്‍വി സമ്മതിച്ച് ചെങ്കോലൊഴിഞ്ഞ് തിരിച്ചു പോയ കെ മുരളീധരന് പിന്നീട് വടകരയിലും വട്ടിയൂര്‍ക്കാവിലും വിജപതാക ഏന്താനായി. പികെ കുഞ്ഞാലിക്കുട്ടിയെ കുറ്റിപ്പുറത്തുകാര്‍ തോല്‍പ്പിച്ചതും മുസ്ലീം ലീഗിന്റെ കോട്ടയില്‍ വെച്ചായിരുന്നു. അത്രക്ക് ആഞ്ഞു വീശിയിരുന്നു അന്ന് ഐസ്‌ക്രീം കേസ്. അതിനു ശേഷം കുഞ്ഞാലിക്കുട്ടി ഏത്രയോ തവണ മന്ത്രിയായി, എംപിയായി. എന്തിനേറെ പറയണം ആദ്യ മന്ത്രിസഭാ രൂപീകരണ സമയത്ത് ഇഎംഎസ് പോലും നീലേശ്വരത്തു വെച്ച് തോല്‍വി മണത്ത് കഷ്ടിച്ചു രക്ഷപ്പെട്ട മുഖ്യമന്ത്രിയാണ്.