കണ്ണൂര്‍, കാസര്‍കോട്, വടകര നിയോജക മണ്ഡലങ്ങളിലെ യുഡിഎഫ് സ്ഥാനാര്‍ഥികളുടെ പ്രചാരണത്തിനാണ് രാഹുല്‍ ഗാന്ധിയെത്തുന്നത്. യുഡിഎഫിന്റെ പ്രമുഖ നേതാക്കള്‍ മഹാസമ്മേളനത്തില്‍ പങ്കെടുക്കും. തിരഞ്ഞെടുപ്പു പ്രചാരണം അവസാനഘട്ടത്തിലേക്ക് നീങ്ങുമ്പോള്‍ കൂടുതല്‍ ദേശീയ നേതാക്കള്‍ യുഡിഎഫിനു വേണ്ടി പ്രചാരണത്തിനെത്തും.
മഹാസംഗമത്തിനെത്തുന്ന പ്രവര്‍ത്തകര്‍ക്ക് വാഹനങ്ങള്‍ പാര്‍കു ചെയ്യാനും മറ്റും പ്രത്യേക സംവിധാനമൊരുക്കിയിട്ടുണ്ടെന്നും നഗരത്തില്‍ ഗതാഗത തടസമുണ്ടാകാതിരിക്കാന്‍ വേണ്ട ക്രമീകരണങ്ങള്‍ ഏര്‍പ്പെടുത്തുമെന്നും നേതാക്കള്‍ അറിയിച്ചു.
.webp "Press Meet")
പരാജയഭീതിയില്‍ യുഡിഎഫ് സ്ഥാനാര്‍ഥികളുടെ പ്രചാരണ പ്രവര്‍ത്തനങ്ങളെ പല രീതിയിലും തടസപ്പെടുത്താന്‍ സിപിഎം ശ്രമിക്കുന്നതായി യുഡിഎഫ് നേതാക്കള്‍ ആരോപിച്ചു. യുഡിഎഫ് സ്ഥാനാര്‍ഥികളുടെ പ്രചാരണ ബോര്‍ഡുകളും പോസ്റ്ററുകളും വ്യാപകമായി നശിപ്പിക്കുന്നു. അക്രമപ്രവര്‍ത്തനങ്ങളിലൂടെ സമാധാനാന്തരീക്ഷം തകര്‍ക്കാന്‍ സിപിഎം നേതൃത്വം ബോധപൂര്‍വം ശ്രമിക്കുകയാണ്.
പാനൂരില്‍ ബോംബ് നിര്‍മാണത്തിനിടെ സ്‌ഫോടനമുണ്ടായി ഒരു സിപിഎം പ്രവര്‍ത്തകന്‍ കൊല്ലപ്പെടുകയും മൂന്നു പേര്‍ക്ക് പരുക്കേല്‍ക്കുകയും ചെയ്തതു കൊണ്ടു മാത്രം സിപിഎമിന്റെ ഗൂഢനീക്കം പുറംലോകമറിഞ്ഞു. സിപിഎമിന്റെ പാര്‍ടി ഗ്രാമങ്ങളില്‍ വന്‍തോതില്‍ ബോംബുകളും മാരകായുധങ്ങളും സംഭരിച്ചിട്ടുണ്ട്. പൊലീസിന്റെ ഭാഗത്തു നിന്ന് ശക്തമായ നടപടി ഉണ്ടാകുന്നില്ല. സമാധാനപരമായ പോളിംഗ് ഉറപ്പു വരുത്താന്‍ തിരഞ്ഞെടുപ്പു കമീഷന്‍ ഇടപെടണമെന്നും സംഘര്‍ഷ സാധ്യതയുള്ള പ്രദേശങ്ങള്‍ കേന്ദ്രസേനയുടെ പൂര്‍ണനിയന്ത്രണത്തിലാക്കണമെന്നും നേതാക്കള്‍ ആവശ്യപ്പെട്ടു.
വാര്‍ത്താസമ്മേളനത്തില്‍ ഡിസിസി അധ്യക്ഷന്‍ മാര്‍ട്ടിന്‍ ജോര്‍ജ്, മുസ്ലിം ലീഗ് ജില്ലാ പ്രസിഡന്റ് അബ്ദുല്‍ കരീം ചേലേരി, അഡ്വ. ടിഒ മോഹനന്‍, കെ പ്രമോദ് എന്നിവര്‍ പങ്കെടുത്തു.
Keywords: UDF prepares for Maha Sangam; Rahul Gandhi in Kannur on 18th, Kannur, News, UDF, Maha Sangam, Rahul Gandhi, Politics, Campaign, CPM, Press Meet, Kerala News.