ഹൃദയത്തിൽ നിന്ന് ശരീരത്തിലേക്ക് രക്തം പമ്പ് ചെയ്യുമ്പോൾ ധമനികളുടെ ഭിത്തികളിൽ രക്തം ചെലുത്തുന്ന സമ്മർദമാണ് രക്തസമ്മർദം.ബിപി കൂടുമ്പോൾ നമ്മുടെ കാലുകളിലും ചില സൂചനകൾ കാണപ്പെടുന്നതാണ്. രക്തസമ്മർദം ഉയരുമ്പോൾ കാലുകളിലേക്കും കൈകളിലേക്കുമുള്ള രക്തപ്രവാഹം നല്ല രീതിയിൽ നടക്കാതെ വരുന്നു. നടക്കുമ്പോള്‍ കാലുകളിൽ ഉണ്ടാകുന്ന വേദന, കൈ-കാലുകളിൽ അനുഭവപ്പെടുന്ന തണുപ്പ്, കാലുകളില്‍ അനുഭവപ്പെടുന്ന നിറ വ്യത്യാസം, കാലുകളിലെ മരവിപ്പ്, മുറിവുകള്‍ ഉണങ്ങാന്‍ സമയമെടുക്കുക തുടങ്ങിയവയൊക്കെ രക്തസമ്മർദം ഉയരുമ്പോൾ കാലുകളിൽ കാണപ്പെടുന്ന ലക്ഷണങ്ങളാണ്.
കൂടാതെ നിരന്തരമായ ക്ഷീണവും അനുഭവപ്പെടാം. മാത്രമല്ല ചില സമയത്തെ തലക്കറക്കം, ഛർദി, കാഴ്ച മങ്ങൽ, ശ്വസിക്കാൻ ബുദ്ധിമുട്ട് അനുഭവപ്പെടുക ഇവയെല്ലാം ബിപി കൂടുമ്പോൾ ഉണ്ടാവാം. അതുപോലെ ഉയര്‍ന്ന രക്തസമ്മർദമുള്ള ഭൂരിഭാഗം ആളുകൾക്കും അസഹ്യമായ തലവേദന അനുഭവപ്പെട്ടേക്കാം. അതിരാവിലെ തന്നെ തലവേദന അനുഭവപ്പെടുന്നത് ചിലപ്പോള്‍ ഉയർന്ന രക്തസമ്മർദത്തിന്റെ ലക്ഷണമായി കണക്കാക്കാം.
രക്തസമ്മര്‍ദം ഉയരുമ്പോൾ ചില ആളുകളിൽ നെഞ്ച് വേദനയും ഉണ്ടാകാം. മൂക്കിൽ നിന്ന് രക്തസ്രാവം വരുന്നതും ചിലപ്പോഴൊക്കെ രക്തസമ്മർദം ഉയരുന്നത് കൊണ്ടാവാം. ഇത്തരം ലക്ഷണങ്ങൾ അനുഭവപ്പെടുകയാണെങ്കിൽ തീർച്ചയായും സ്വയം രോഗ നിർണയം നടത്താതെ ഡോക്ടറെ കണ്ട് പരിശോധിക്കാവുന്നതാണ്. പെട്ടെന്നുള്ള കണ്ടെത്തലും ചികിത്സയും രോഗം എളുപ്പത്തിൽ ഭേദമാകാൻ സഹായിക്കും.
Keywords: News, News-Malayalam, Health, BP, Blood Pressure, Symptoms, High Blood Pressure Symptoms.