1861 സെപ്റ്റംബർ 24 ന് മുംബൈയിലെ സമ്പന്നമായ പാഴ്സി കുടുംബത്തിലാണ് ഭികാജി കാമ ജനിച്ചത്. പല ഭാഷകളിലും പ്രാവീണ്യമുണ്ടായിരുന്ന ഭികാജി, റുസ്തം കാമയെ വിവാഹം കഴിച്ചു. വിവാഹശേഷം, സാമൂഹ്യസേവനത്തിലും ജനക്ഷേമ പ്രവർത്തനങ്ങളിലുമാണ് ഭികാജി കൂടുതൽ സമയം ചെലവഴിച്ചത്. 1896-ൽ ബോംബെ പ്രസിഡൻസിയിലെ ക്ഷാമകാലത്തും അതിനു ശേഷമുള്ള പ്ലേഗിലും, ഭികാജി ആളുകളെ വളരെയധികം സഹായിച്ചു. അവർക്കും പ്ലേഗ് ബാധിച്ചു.
ചികിത്സയ്ക്കായി 1902-ൽ ബ്രിടനിലേക്ക് പോയി. ലൻഡനിൽ വച്ച് അവർ ശ്യാംജി കൃഷ്ണ വർമ്മയെയും ദാദാഭായ് നവറോജിയെയും കണ്ടുമുട്ടി, അതിനുശേഷം ഹോം റൂൾ പ്രസ്ഥാനത്തിൽ അംഗമായി. ലൻഡനിൽ നിന്ന് ഇൻഡ്യയിലേക്ക് മടങ്ങുന്നതിന്, ദേശീയ സമര പ്രവർത്തനങ്ങളിൽ പങ്കെടുക്കില്ലെന്ന് രേഖാമൂലമുള്ള രേഖയിൽ ഒപ്പിടണമെന്ന് ബ്രിടീഷ് ഭരണകൂടം വ്യവസ്ഥ വെച്ചു. അവർ അതിന് വിസമ്മതിച്ചു. 1905-ൽ അവർ പാരീസിലേക്ക് മാറി, അവിടെ പാരീസ് ഇൻഡ്യ സൊസൈറ്റി സ്ഥാപിച്ചു. ഇതിനുശേഷം യൂറോപിൽ വന്ദേമാതരം ഗാനം ഉൾപെടെ നിരവധി വിപ്ലവകരമായ ലേഖനങ്ങൾ പ്രസിദ്ധീകരിച്ചു. രഹസ്യമായി ഇവരുടെ ലേഖനങ്ങൾ പോണ്ടിച്ചേരിയിൽ എത്തിയിരുന്നതായി പറയുന്നു.
ജർമനിയിൽ ഇൻഡ്യയുടെ പതാക
ജർമനിയിലെ സ്റ്റട്ട്ഗാർട്ടിൽ നടന്ന രണ്ടാമത്തെ അന്താരാഷ്ട്ര സോഷ്യലിസ്റ്റ് കോൺഗ്രസിലേക്ക് ഭികാജി കാമയെ ക്ഷണിച്ചു. പങ്കെടുക്കുന്ന എല്ലാ രാജ്യങ്ങളുടെയും പതാകകൾ സ്ഥാപിച്ചിരുന്നു. ഇൻഡ്യയ്ക്കായി ഒരു ബ്രിടീഷ് പതാക ഉണ്ടായിരുന്നു. ഭികാജി കാമയ്ക്ക് ഇത് സ്വീകാര്യമായിരുന്നില്ല. അവർ പുതിയ പതാക ഉണ്ടാക്കി യോഗത്തിൽ ഉയർത്തി. വിദേശ മണ്ണിൽ ഇൻഡ്യയുടെ പതാക ഉയർത്തിയ ആദ്യ ഇൻഡ്യൻ വനിതയായി അവർ മാറി.
ഈ യോഗത്തിൽ മാഡം കാമ ഇൻഡ്യയിലെ വരൾച്ചയുടെ ഭീകരമായ സാഹചര്യം ലോകത്തിന് മുന്നിൽ അവതരിപ്പിച്ചു. ഇൻഡ്യയിലെ മനുഷ്യാവകാശങ്ങൾക്ക് പുറമേ, ബ്രിടീഷ് സർകാരിൽ നിന്ന് സ്വയംഭരണാവകാശവും ആവശ്യപ്പെട്ടു. മാഡം കാമ പറത്തിയ പതാക ഇൻഡ്യയുടെ നിലവിലെ പതാകയിൽ നിന്ന് വളരെ വ്യത്യസ്തമായിരുന്നു, അതിന് പച്ച, മഞ്ഞ, ചുവപ്പ് എന്നീ മൂന്ന് വരകളുണ്ടായിരുന്നു. മുകൾഭാഗം പച്ചനിറമായിരുന്നു, അതിൽ എട്ട് താമരപ്പൂക്കൾ അടങ്ങിയിരുന്നു. ഈ എട്ട് പൂക്കൾ അക്കാലത്തെ ഇൻഡ്യയിലെ എട്ട് പ്രവിശ്യകളെ പ്രതിനിധീകരിച്ചിരുന്നു. നടുവിൽ ഒരു മഞ്ഞ വരയുണ്ടായിരുന്നു. അതിൽ വന്ദേമാതരം എന്ന് എഴുതിയിരുന്നു.
ഇതിനുശേഷം, മാഡം കാമ ധാരാളം യാത്ര ചെയ്തു, അതിൽ അമേരികയും ഈജിപ്തും പ്രമുഖമായിരുന്നു. എന്നാൽ പ്രവർത്തനങ്ങളുടെ പ്രധാന കേന്ദ്രം പാരീസായിരുന്നു. ഇതിനിടയിൽ, അസുഖം കാരണം, അവർ ബ്രിടീഷ് സർകാരുമായി ഒത്തുതീർപ്പ് ചെയ്യുകയും ഇൻഡ്യയിലേക്ക് മടങ്ങാനുള്ള വ്യവസ്ഥകൾ അംഗീകരിക്കുകയും ചെയ്തു. 1935 നവംബറിൽ ബോംബെയിൽ വന്ന അവർ ഒമ്പത് മാസങ്ങൾക്ക് ശേഷം 1936 ഓഗസ്റ്റ് 13-ന് പാഴ്സി ജനറൽ ആശുപത്രിയിൽ വച്ച് അന്ത്യശ്വാസം വലിച്ചു.