പഠനദിവസങ്ങള് 210 ദിവസം ആക്കി ഉയര്ത്തുന്നതിനുവേണ്ടിയാണ് രണ്ടു മാസം നീളുന്ന മധ്യവേനല് അവധിയിലെ ആദ്യ ആഴ്ച കൂടി പ്രവൃത്തി ദിവസമാക്കിയത്. ഇതോടെ, മധ്യവേനല് അവധി ഏഴ് ആഴ്ചയായി ചുരുങ്ങുന്ന സാഹചര്യം ഉണ്ടായി. ഇതിനെതിരെ വ്യാപക പ്രതിഷേധം ഉയര്ന്നിരുന്നു.
തുടര്ന്ന് അധ്യാപക സംഘടനകളുമായി മന്ത്രി വി ശിവന്കുട്ടി നടത്തിയ ചര്ചയിലാണ് പുതിയ തീരുമാനം. ഏപ്രില് ആറിന് അവധി തുടങ്ങാനുള്ള തീരുമാനത്തെ അധ്യാപക സംഘടനകള് എതിര്ത്തതോടെയാണ് സര്കാരിന് തീരുമാനത്തില് നിന്നും പിന്മാറേണ്ടി വന്നത്.
ഈ അധ്യയന വര്ഷം 13 ശനിയാഴ്ചകള് പ്രവൃത്തി ദിവസമാക്കാനും അതിനൊപ്പം വേനല് അവധികാലത്തെ അഞ്ച് ദിവസങ്ങള് കൂടി ചേര്ത്താണ് 210 പ്രവൃത്തി ദിവസമാക്കാന് തീരുമാനിച്ചത്. കേരള വിദ്യാഭ്യാസ ചട്ടത്തില് (KER) വേനല് അവധിയെക്കുറിച്ച് കൃത്യമായി പറയുന്നുണ്ടെന്നും കോടതി വിധികള് സര്കാര് മുഖവിലയ്ക്കെടുക്കണമെന്നും സംഘടനകള് നിലപാടെടുത്തു. ഏകപക്ഷീയമായ തീരുമാനം അംഗീകരിക്കില്ലെന്ന് സംഘടനകള് വ്യക്തമാക്കിയതോടെ സര്കാര് വഴങ്ങി.
2023-24 അകാഡമിക വര്ഷത്തെ അധ്യയന ദിനങ്ങള് 205 ആയി നിജപ്പെടുത്തുകയും ചെയ്തു. യോഗത്തില് അധ്യാപക സംഘടനകളുടെ അഭ്യര്ഥന മാനിച്ചാണ് 210 സ്കൂള് പഠന ദിവസങ്ങള് എന്നത് 205 പഠനദിവസങ്ങളാക്കി നിജപ്പെടുത്തിയത്. മുഴുവന് ശനിയാഴ്ചകളും അധ്യയന ദിവസങ്ങളാണ് എന്ന പ്രചാരണം ശരിയല്ലെന്നും വിദ്യാഭ്യാസ മന്ത്രിയുടെ ഓഫിസ് അറിയിച്ചു.
അധ്യയന വര്ഷത്തിലെ ആകെയുള്ള 52 ശനിയാഴ്ചകളില് 13 ശനിയാഴ്ചകള് മാത്രമാണ് പ്രവൃത്തി ദിനമായി നിശ്ചയിച്ചിട്ടുള്ളത്. നിലവിലെ നിയമങ്ങളും കോടതി വിധികളും ഒരാഴ്ചയില് അഞ്ച് പ്രവൃത്തി ദിനങ്ങള് വേണം എന്നു നിര്ദേശിച്ചിട്ടുള്ള പശ്ചാത്തലത്തിലാണ് ആഴ്ചയില് അഞ്ചു ദിവസം അധ്യയന ദിനങ്ങള് ലഭിക്കാത്ത ആഴ്ചകളില് ശനിയാഴ്ച പഠന ദിവസമാക്കിയിട്ടുള്ളത്.
Keywords: Kerala Government revokes decision to increase academic year instructional days to 210, Thiruvananthapuram, News, Education, Meeting, Summer Vacation, Teachers, V Sivankutty, Students, Court Order, Kerala.