ന്യൂഡെൽഹി: (KVARTHA) വരാനിരിക്കുന്ന ഇടക്കാല ബജറ്റിൽ അടുത്ത സാമ്പത്തിക വർഷത്തേക്കുള്ള കാർഷിക വായ്പാ ലക്ഷ്യം 22-25 ലക്ഷം കോടി രൂപയായി വർധിപ്പിക്കുമെന്ന് റിപ്പോർട്ട്. അർഹരായ എല്ലാ കർഷകർക്കും വായ്പ ഉറപ്പാക്കുകയാണ് ലക്ഷ്യം. നടപ്പ് സാമ്പത്തിക വർഷം സർക്കാരിന്റെ കാർഷിക-വായ്പ ലക്ഷ്യം 20 ലക്ഷം കോടി രൂപയാണ്. നിലവിൽ, എല്ലാ ധനകാര്യ സ്ഥാപനങ്ങൾക്കും മൂന്ന് ലക്ഷം രൂപ വരെയുള്ള ഹ്രസ്വകാല കാർഷിക വായ്പകൾക്ക് സർക്കാർ രണ്ട് ശതമാനം പലിശ ഇളവ് നൽകുന്നു. അതായത് കർഷകർക്ക് പ്രതിവർഷം ഏഴ് ശതമാനം ഇളവ് നിരക്കിൽ മൂന്ന് ലക്ഷം രൂപ വരെ കാർഷിക വായ്പ ലഭിക്കുന്നു.
യഥാസമയം വായ്പ അടയ്ക്കുന്ന കർഷകർക്ക് പ്രതിവർഷം മൂന്ന് ശതമാനം അധിക പലിശയിളവും നൽകുന്നുണ്ട്. കർഷകർക്ക് ദീർഘകാല വായ്പയും എടുക്കാം, എന്നാൽ പലിശ നിരക്ക് മാർക്കറ്റ് നിരക്ക് അനുസരിച്ചാണ്. 2024-25 സാമ്പത്തിക വർഷത്തിലെ കാർഷിക വായ്പ ലക്ഷ്യം 22-25 ലക്ഷം കോടി രൂപയായി ഉയരുമെന്ന് വൃത്തങ്ങൾ പറയുന്നു. അഗ്രി-ക്രെഡിറ്റിന് കൂടുതൽ ശ്രദ്ധ നൽകുകയും, അർഹരായ കർഷകരെ കണ്ടെത്തി അവരെ വായ്പാ ശൃംഖലയിലേക്ക് കൊണ്ടുവരാൻ സർക്കാർ നിരവധി പ്രചാരണങ്ങൾ നടത്തുകയും ചെയ്യുന്നു.
2022-23ൽ കാർഷിക വായ്പ വിതരണം 21.55 ലക്ഷം കോടി രൂപ
ഇതിനുപുറമെ, വിവിധ കാർഷിക-അനുബന്ധ പ്രവർത്തനങ്ങൾക്കുള്ള വായ്പാ വിതരണം കഴിഞ്ഞ 10 വർഷത്തിനിടെ ലക്ഷ്യത്തേക്കാൾ കൂടുതലാണ്. നടപ്പ് സാമ്പത്തിക വർഷത്തിൽ 2023 ഡിസംബറോടെ 20 ലക്ഷം കോടി രൂപയുടെ കാർഷിക വായ്പാ ലക്ഷ്യത്തിന്റെ 82 ശതമാനവും കൈവരിച്ചതായി സർക്കാർ കണക്കുകൾ വ്യക്തമാക്കുന്നു. ഔദ്യോഗിക കണക്കുകൾ പ്രകാരം ഈ കാലയളവിൽ ഏകദേശം 16.37 ലക്ഷം കോടി രൂപയുടെ വായ്പകൾ സ്വകാര്യ, പൊതു ബാങ്കുകളിൽ നിന്ന് വിതരണം ചെയ്തിട്ടുണ്ട്. കാർഷിക വായ്പ വിതരണം ഈ സാമ്പത്തിക വർഷവും ലക്ഷ്യം കവിയാൻ സാധ്യതയുണ്ടെന്ന് ബന്ധപ്പെട്ട വൃത്തങ്ങൾ പറഞ്ഞു.
2022-23 സാമ്പത്തിക വർഷത്തിൽ മൊത്തം കാർഷിക വായ്പ വിതരണം 21.55 ലക്ഷം കോടി രൂപയായിരുന്നു. ഈ കാലയളവിൽ ലക്ഷ്യമിട്ടിരുന്ന 18.50 ലക്ഷം കോടി രൂപയേക്കാൾ കൂടുതലായിരുന്നു ഇത്. കിസാൻ ക്രെഡിറ്റ് കാർഡിന്റെ (KCC) ശൃംഖല വഴി 7.34 കോടി കർഷകർക്ക് വായ്പ ലഭിച്ചിട്ടുണ്ടെന്നാണ് കണക്ക്. 2023 മാർച്ച് 31 വരെ ഏകദേശം 8.85 ലക്ഷം കോടി രൂപ കുടിശ്ശികയാണ്.
Keywords: Top-Headlines, News-Malayalam-News, National, National-News, Budget-Expectations-Key-Announcement, New Delhi, Agricultural Credit, Finance, Govt, Govt may increase agri-credit target to Rs 22-25 lakh crore.