തിരുവനന്തപുരം: (www.kvartha.com) പിതാവ് വീണ്ടും വിവാഹം കഴിക്കുന്നതിന്റെ വൈരാഗ്യത്തില്‍ മകന്‍ വീട് അടിച്ചുതകര്‍ത്തതായി പരാതി. കാട്ടാക്കട സ്വദേശി മനോഹരനാണ് മകന്‍ സനല്‍കുമാറിനും സുഹൃത്തുക്കള്‍ക്കും എതിരെ പരാതി നല്‍കിയിരിക്കുന്നത്.
സംഭവത്തെ കുറിച്ച് പൊലീസ് പറയുന്നത്:
കഴിഞ്ഞദിവസമായിരുന്നു പരാതിക്കിടയാക്കിയ സംഭവം നടന്നത്. വീടിന്റെ പിന്‍വാതില്‍ തകര്‍ത്ത് അകത്തുകടന്ന അക്രമികള്‍ ജനല്‍ച്ചില്ലുകള്‍ അടിച്ചുതകര്‍ക്കുകയും 45000 രൂപ അപഹരിക്കുകയും വസ്ത്രങ്ങളും അഞ്ച് നാടന്‍ കോഴികളെയും മോഷ്ടിച്ചുവെന്നും മനോഹരന്‍ നല്‍കിയ പരാതിയില്‍ പറയുന്നുണ്ട്. ഒറ്റയ്ക്ക് താമസിക്കുന്ന താന്‍ വീണ്ടും വിവാഹം കഴിക്കാന്‍ തീരുമാനിച്ചതിന്റെ വിരോധത്തിലാണ് മകന്‍ ആക്രമണം നടത്തിയതെന്നാണ് മനോഹരന്റെ പരാതിയില്‍ പറയുന്നത്.
ഭാര്യ മരിച്ചതിന് ശേഷം മനോഹരന്‍ ഒറ്റയ്ക്കാണ് താമസം. മകനും മകള്‍ക്കും പാരമ്പര്യമായി നല്‍കാനുള്ള സ്വത്തുക്കളെല്ലാം അദ്ദേഹം നേരത്തെ തന്നെ വീതിച്ചുനല്‍കിയിരുന്നു. നിലവില്‍ താമസിക്കുന്ന വീടും സ്ഥലവും താന്‍ ഒറ്റയ്ക്ക് അധ്വാനിച്ചുണ്ടാക്കിയതാണെന്നാണ് മനോഹരന്‍ പറയുന്നത്.
ഭാര്യ മരിച്ചതോടെ തന്റെ കാര്യങ്ങള്‍ നോക്കാന്‍ ആരുമില്ലെന്നും അതിനാലാണ് വിവാഹം കഴിക്കാനുള്ള ആഗ്രഹം അറിയിച്ചതെന്നും മനോഹരന്‍ പറഞ്ഞു. ഇതിന്റെ വൈരാഗ്യത്തിലാണ് മകനും മറ്റുനാലുപേരും വീട്ടില്‍ കയറി അക്രമം അഴിച്ചുവിട്ടതെന്നുമാണ് പരാതി.
മനോഹരന്റെ പരാതിയില്‍ കാട്ടാക്കട പൊലീസ് കേസെടുത്ത് അന്വേഷണം ആരംഭിച്ചു.
Keywords: Complaint against man and his friends, Thiruvananthapuram, News, Local News, Attack, Police, Case, Kerala.