കുവൈത്ത് സിറ്റി: (www.kvartha.com 29.11.2020) വ്യാജ ഉത്പന്നങ്ങളുടെ വില്‍പന നടത്തിയതിനും മറ്റു ക്രമക്കേടുകളുടെയും പേരില്‍ കുവൈത്തില്‍ 27 കടകള്‍ പൂട്ടിച്ചു. വാണിജ്യ വ്യവസായ മന്ത്രാലയം നടത്തിയ പരിശോധനകളിലാണ് നടപടി. പ്രാദേശിക, അന്താരാഷ്ട്ര നിയമങ്ങള്‍ ലംഘിച്ച് വിപണിയിലിറക്കിയ വ്യാജ ഉത്പന്നങ്ങള്‍ പരിശോധനകളില്‍ പിടിച്ചെടുത്തതായി വാണിജ്യ-വ്യവസായ മന്ത്രാലയം പുറത്തിറക്കിയ വാര്‍ത്താക്കുറിപ്പില്‍ അറിയിച്ചു.
രാജ്യത്തെ വ്യാജ ഉത്പന്നങ്ങളുടെ വ്യാപനം നിയന്ത്രിക്കാനും ഉപഭോക്താക്കളെ കബളിപ്പിക്കുന്നത് തടയാനും കര്‍ശന പരിശോധന തുടരുമെന്ന് മന്ത്രാലയം അറിയിച്ചു. കടകളുടെ ഉടമകളെ തുടര്‍ നടപടികള്‍ക്കായി ബന്ധപ്പെട്ട വകുപ്പുകള്‍ക്ക് കൈമാറിയിട്ടുണ്ട്.