ഹാനോയ് : പറന്നുകൊണ്ടിരിക്കെ വിമാനത്തിന്റെ ടോയ്‌ലറ്റില്‍ യുവതിക്ക് സുഖപ്രസവം. ഫിലിപ്പൈന്‍സുകാരിയായ യാത്രക്കാരിയാണ് വിമാന ടോയ്‌ലറ്റില്‍ ആണ്‍കുഞ്ഞിനെ പ്രസവിച്ചത്. കുഞ്ഞിന്റെ ആരോഗ്യനില മോശമായതിനാല്‍ ദുബായില്‍നിന്ന് മാനിലയ്ക്കുപോകുകയായിരുന്ന വിമാനം അടിയന്തിരമായി വിയ്റ്റ്‌നാമില്‍ ഇറക്കി. അമ്മയും കുഞ്ഞും സ്വകാര്യാശുപത്രിയില്‍ ചികിത്സയിലാണ്. എമിറേറ്റ്‌സ് വിമാനത്തിന്റെ കോഡ് സൂചിപ്പിക്കുന്ന ഇ കെ എന്നാണ് കുട്ടിക്ക് പേരിടുക എന്ന് മാതാപിതാക്കള്‍ അറിയിച്ചു. വിമാനത്തിലുണ്ടായിരുന്ന രണ്ടു നേഴ്‌സുമാരുടെ പരിചരണം യഥാസമയം ലഭിച്ചതിനാലാണ് കുഞ്ഞ് അപകടാവസ്ഥ തരണം ചെയ്തത്. പൂര്‍ണഗര്‍ഭിണിയായിരുന്ന യുവതി വേദനകൊണ്ട് പുളഞ്ഞ് ടോയ്‌ലറ്റിലേക്ക് നടക്കുന്നത് കണ്ടപ്പോള്‍ നഴ്സുമാര്‍ക്ക് സംശയം ഉണ്ടാവുകയും അവര്‍ അസ്വസ്ഥനായി കാണപ്പെട്ട ഭര്‍ത്താവിനോട് കാര്യങ്ങള്‍ ചോദിക്കുകയും പരിചരണം ലഭ്യമാക്കുകയുമായിരുന്നു. ഓക്‌സിജന്റെ ലഭ്യതക്കുറവ് മൂലം കുഞ്ഞിന് നീലനിറം ബാധിച്ചിരുന്നു. കുഞ്ഞിന് ഓക്‌സിജന്‍ മാസ്ക് ധരിപ്പിച്ചാണ് ശ്വാസതടസ്സം പരിഹരിച്ചത്.
Keywords: Dubai, Flight, Hospital, Husband, Nurses, Parents, Report, Toilet, Delivery