കൊട്ടാരക്കര: (www.kvartha.com) വയോധികയെ ആക്രമിച്ച് സ്വര്ണമാല കവര്ന്നെന്ന കേസില് കൊച്ചുമകന് പിടിയില്. തൃക്കണ്ണമംഗല് സ്വദേശിയായ അനിമോനെ(23)യാണ് കൊട്ടാരക്കര പൊലീസ് പുനലൂരില്നിന്ന് അറസ്റ്റ് ചെയ്തത്.
ഒളിവിലായിരുന്ന ഇയാളെ കൊട്ടാരക്കര സി ഐ ജോസഫ് ലിയോണിന്റെ നേതൃത്വത്തില് എസ് ഐ ദീപു, സി പി ഒമാരായ ഷിബു കൃഷ്ണന്, എസ് സുധീര്, സഹീല്, ശ്രീരാജ് എന്നിവര് ചേര്ന്ന് തെന്മലമുതല് പിന്തുടര്ന്നാണ് പിടികൂടിയതെന്ന് പൊലീസ് അറിയിച്ചു.
കഴിഞ്ഞ 27-ന് കല്ലുവാതുക്കല് വിപിന്ഭവനില് മേരി(85)യെ ആക്രമിച്ച് രണ്ടുപവന്റെ സ്വര്ണമാല കവര്ന്നെന്നാണ് കേസ്. മേരിയുടെ കൊച്ചുമകനാണ് അനിമോന്. വീട്ടിലെത്തിയ യുവാവിന് ഭക്ഷണം നല്കുന്നതിനിടെ നിലവിളക്കുപയോഗിച്ചു മേരിയുടെ തലയ്ക്കടിക്കാന് ശ്രമിക്കുകയും മര്ദിക്കുകയും മാല കവരുകയുമായിരുന്നുവെന്ന് പരാതിയില് പറയുന്നു.