നാഗ്പൂര്‍: (www.kvartha.com 01.04.2022) ഓടിക്കൊണ്ടിരുന്ന ബസിന് തീപിടിച്ച് കത്തിനശിച്ചു. മഹാരാഷ്ട്രയിലെ നാഗ്പൂരിലാണ് സംഭവം. തിത്തൂരില്‍ നിന്ന് സീതാബുല്‍ദിയിലേക്ക് പോവുകയായിരുന്ന ബസാണ് നിന്ന് കത്തിയത്. രാവിലെ നാഗ്പൂര്‍ മെഡികല്‍ കോളജ് സ്‌ക്വയറിന് സമീപത്തെത്തിയതോടെയാണ് അപകടം. യാത്രക്കാര്‍ അത്ഭുതകരമായാണ് പരിക്കേല്‍ക്കാതെ രക്ഷപ്പെട്ടത്.
45 യാത്രക്കാരാണ് ബസിലുണ്ടായിരുന്നത്. തീ മുഴുവനായി വാഹനത്തെ വിഴുങ്ങും മുന്‍പ് യാത്രക്കാര്‍ ഇറങ്ങിയോടിയതിനാല്‍ ആളപായമുണ്ടായില്ലെന്ന് ദൃക്‌സാക്ഷികള്‍ പറഞ്ഞു. അതിനാല്‍ വന്‍ ദുരന്തം തല നാരിഴയ്ക്കാണ് തെന്നിമാറിയത്.
ബസിന്റെ എഞ്ചിനില്‍ നിന്ന് തീ പടര്‍ന്നെന്നാണ് ഡ്രൈവര്‍ പറയുന്നത്. തീയണയ്ക്കാനുള്ള സംവിധാനം ബസിലുണ്ടായിരുന്നെങ്കിലും പരിഭ്രാന്തിയില്‍ അദ്ദേഹത്തിന് അത് ഉപയോഗിക്കാനായില്ലെന്നാണ് വിവരം. അഗ്നി രക്ഷാസേനയെത്തി തീയണച്ചു.
ബസുകള്‍ പരിപാലിക്കുന്നതിലെ വീഴ്ചയാണ് അപകടത്തിന് കാരണമെന്ന് ആക്ഷേപം ഉയര്‍ന്നു. ഒരു മാസത്തിനിടെ നാഗ്പൂര്‍ കോര്‍പറേഷന്റെ രണ്ടാമത്തെ ബസിനാണ് തീപിടിക്കുന്നത്.