സംസ്ഥാനത്തെ എല്ലാ ആശുപത്രികളിലെയും മോശം സ്ഥിതി മന്ത്രിമാരും മറ്റു ജന പ്രതിനിധികളും മനസിലാക്കാന് ഒരു വഴി തുറക്കാതെ വയ്യ. തിരുവനന്തപുരം ജനറല് ആശുപത്രി ഒമ്പതാംവാര്ഡിലെ അസുഖംമാറിയ 17 പേര്ക്ക് സര്ക്കാര് ആശ്വാസകരമായ തുടര് ജീവിതം വാഗ്ദാനം ചെയ്തതുപോലെ കേരളത്തിലെമ്പാടും കൈനീട്ടിക്കാത്തിരിക്കുന്നവരുടെ മുന്നിലേയ്ക്കാകണം ആ വഴി.
നിസ്സഹായരായിരുന്ന ആ 17 പേര്ക്ക് സാമൂഹ്യക്ഷേമവകുപ്പും സാമൂഹ്യ സുരക്ഷാ മിഷനുംചേര്ന്നാണ് പുനരധിവാസ സൗകര്യം ഏര്പ്പെടുത്തിയത്. ഇന്നലെ ഔപചാരികമായിത്തന്നെ അത് പ്രഖ്യാപിക്കുകയം ചെയ്തു. പക്ഷേ, നാലാള് അറിയുന്ന വിധം മൈക്കു കെട്ടി പറഞ്ഞാല് കൂടുതല് പേര് സഹായം ചോദിച്ചാലോ എന്നാണു സര്ക്കാരിന്റെ പേടി.
നാലുദിവസത്തിനകം 19 പേരെക്കൂടി പുനരധിവസിപ്പിക്കാനാണ് തീരുമാനം. ഏതായാലും ജനറല് ആശുപത്രി ഒമ്പതാം വാര്ഡിലെ വിശേഷങ്ങള് പത്രങ്ങളിലും ചാനലുകളിലും വന്നതുകൊണ്ടാണ് ആ 21 പേര്ക്ക് പുതുജീവിതം കിട്ടുന്നത് എന്ന കാര്യത്തില് സംശയമില്ല.
അസുഖം മാറിയവരെ പുനരധിവസിപ്പിക്കുന്നതിനനുസരിച്ച് കൂടുതല്പ്പേര് അന്തേവാസികളായി എത്തിക്കൊണ്ടിരിക്കുകയാണ്. അത് സ്വാഭാവികവുമാണ്. മുപ്പത്തിനാലുപേരില് പത്തുപേരെ കഴിഞ്ഞ ദിവസം വൃദ്ധസദനത്തിലേക്ക് മാറ്റിയിരുന്നു. ഏറെക്കാലം ഇവിടെ കിടന്ന മൂന്നുപേരെ അവരുടെ ബന്ധുക്കളെ ഏല്പ്പിച്ചു.
മറ്റു നാലുപേരെ വെള്ളിയാഴ്ച പുനരധിവസിപ്പിക്കുകയും ചെയ്തു. ഇതാണ് കഴിഞ്ഞയാഴ്ച മാധ്യമങ്ങളില് നിറഞ്ഞുനിന്ന ഒമ്പതാം വാര്ഡ് വാര്ത്തയുടെ ഇംപാക്ട്. മാനസികാസ്വാസ്ഥ്യമുള്ള പത്തുപേരെ മാനസികാരോഗ്യകേന്ദ്രങ്ങളിലേക്ക് മാറ്റുന്നതിന് ചീഫ് ജുഡീഷ്യല് മജിസ്ട്രേറ്റിന്റെ അനുവാദത്തിനായി നടപടികള് സ്വീകരിച്ചിട്ടുണ്ട്.
പുനരധിവസിപ്പിച്ചവരില് ഒരാളെ സാമൂഹ്യക്ഷേമവകുപ്പിന്റെ പൂജപ്പുരയിലുള്ള വൃദ്ധസദനത്തിലേക്കും മൂന്നുപേരെ മുളയറയിലുള്ള രജിസ്ട്രേഡ് വൃദ്ധസദനത്തിലേക്കുമാണ് മാറ്റിയത്. അവര്ക്ക് അവിടെ സുഖമായിരിക്കും എന്ന് ഉറപ്പു വരുത്തുമെന്ന് മന്ത്രി ശിവകുമാര് പറയുന്നുണ്ട്. കേരളത്തിലെ ജില്ലാ, ജനറല് ആശുപത്രികളിലും മെഡിക്കല് കോളജുകളിലും സമാന സാഹചര്യങ്ങളിലുള്ള നിരവധി രോഗികള് ഇനിയും ഉണ്ടായിരിക്കേ, തിരുവനന്തപുരം ജനറല് ആശുപത്രി ഒമ്പതാം വാര്ഡ് ഒരു സൂചകം തന്നെ. ആ സൂചകം സര്ക്കാര് തിരിച്ചറിഞ്ഞ് പ്രവര്ത്തിക്കണം എന്നേയുള്ളു, സംസ്ഥാനത്തെ സര്ക്കാര് വൃദ്ധസദനങ്ങളെല്ലാം അന്തേവാസികളെക്കൊണ്ട് നിറഞ്ഞിരിക്കുകയാണെന്ന് സര്ക്കാര് സമ്മതിച്ചിട്ടുണ്ട്. സ്വാഭാവികമായും കൂടുതല് വൃദ്ധ സദനങ്ങള് തുറക്കേണ്ടി വരും.
തിരുവനന്തപുരത്ത് പൂജപ്പുരയിലെ സ്ത്രീകള്ക്കും പുരുഷന്മാര്ക്കും പ്രത്യേകമായുള്ള ആശാഭവനുകള്, ഡേ കെയര് സെന്റര്, ചാക്ക വൃദ്ധസദനം എന്നിവയാണ് സര്ക്കാറിനൂ കീഴിലുള്ളത്. ഇവിടങ്ങളിലും അന്തേവാസികളുടെ ബാഹുല്യമാണ്. ഇതിനാലാണ് ഒമ്പതാം വാര്ഡിലെ അസുഖം മാറിയ അന്തേവാസികളെ രജിസ്റ്റര് ചെയ്ത വൃദ്ധസദനങ്ങളില് പുനരധിവസിപ്പിക്കുന്നത്. കഴിഞ്ഞ സര്ക്കാരിന്റെ കാലത്ത് സാമൂഹിക ക്ഷേമ മന്ത്രിയായിരുന്ന പി.കെ. ശ്രീമതി മുന്കൈയെടുത്ത് വയോജന നയത്തിന്റെ കരട് തയ്യാറാക്കിയിരുന്നു. നിയമസഭയിലും വന്നതാണ്. പിന്നെ അത് എവിടെപ്പോയെന്ന് അറിയില്ല. മാതാ പിതാക്കളെ ആശുപത്രികളിലും വൃദ്ധ സദനങ്ങളിലും ഉപേക്ഷിക്കുന്ന മക്കളില് നിന്ന് അവരുടെ ചെലവിന് നിര്ബന്ധമായും പണം ഈടാക്കാന് വ്യവസ്ഥ ചെയ്തിരുന്ന ആ ബില്ല് നിയമമായാല് കാര്യങ്ങള് ചിലപ്പോള് കുറേയെങ്കിലും മാറി മറിഞ്ഞേക്കാം. ആശ്രയമില്ലാതെ ആശുപത്രി വാര്ഡുകളില് നിറയുന്ന വൃദ്ധരില് എത്ര കുറച്ചുപേര്ക്കുമാത്രമാണ് ആശ്വാസമാകാന് സര്ക്കാരിനു കഴിയുക. പരിമിതികളുണ്ടല്ലോ, സര്ക്കാരിനും.
-എസ്.എ. ഗഫൂര്
Keywords: Article, Thiruvananthapuram, General Hospital, Government, 9th ward of Kerala.