Congress President Election | കോൺഗ്രസ് പ്രസിഡന്റ് തെരഞ്ഞെടുപ്പ്: ഇപ്പോഴത്തെ തർക്കങ്ങൾ ഓർമിപ്പിക്കുന്നത് 22 വർഷം മുമ്പത്തെ സംഭവ വികാസങ്ങൾ; അന്ന് എന്താണ് സംഭവിച്ചത് ?

ന്യൂഡെൽഹി: (www.kvartha.com) കോൺഗ്രസ് അധ്യക്ഷ സ്ഥാനത്തേക്കുള്ള തെരഞ്ഞെടുപ്പ് അടുത്തിരിക്കുകയാണ്. അതേസമയം, മനീഷ് തിവാരി, ആനന്ദ് ശർമ, കാർത്തി ചിദംബരം, ശശി തരൂർ തുടങ്ങിയ നേതാക്കൾ തെരഞ്ഞെടുപ്പിലെ സുതാര്യതയെക്കുറിച്ച് സംസാരിച്ചു. പാർടിയിലെ പഴയ നേതാക്കളുടെ ഈ ആവശ്യം 22 വർഷം മുമ്പ് നടന്ന പ്രസിഡന്റ് തെരഞ്ഞെടുപ്പിനെ ഓർമിപ്പിക്കുന്നതാണ്. ആ സമയത്ത്, കോൺഗ്രസിന്റെ നിലവിലെ ഇടക്കാല അധ്യക്ഷ സോണിയ ഗാന്ധിയും ഇപ്പോൾ പാർടിയിൽ നിന്ന് വേർപിരിഞ്ഞ ജിതിൻ പ്രസാദയുമാണ് മത്സരരംഗത്തുണ്ടായിരുന്നത്. ഇരുവരും തമ്മിലുള്ള തെരഞ്ഞെടുപ്പ് പ്രക്രിയയിൽ സുതാര്യതയെ ചൊല്ലി വലിയ സംഘർഷം ഉടലെടുത്തിരുന്നു.
                               

2000-ൽ എന്താണ് സംഭവിച്ചത്?

2000ലാണ് അവസാനമായി കോൺഗ്രസ് അധ്യക്ഷ സ്ഥാനത്തേക്കുള്ള തിരഞ്ഞെടുപ്പ് നടന്നത്. തുടർന്ന് പ്രസാദ് ക്യാംപ് തിരഞ്ഞെടുപ്പ് സുതാര്യമാണോ എന്ന ചോദ്യമുയർത്തിയിരുന്നു. സംസ്ഥാന കോൺഗ്രസ് കമിറ്റി പ്രതിനിധികളുടെ പട്ടികയിലും ക്രമക്കേട് നടന്നതായി ആരോപണമുയർന്നിരുന്നു. വോടർ പട്ടികയിൽ വ്യാജ പേരുകളും ഉൾപ്പെടുത്തിയതായി പ്രസാദിനെ അനുകൂലിക്കുന്നവർ ആരോപിച്ചിരുന്നു. ഇലക്ടറൽ കോളജിലെ അംഗങ്ങളുടെ വിലാസം അവർക്ക് നൽകിയിട്ടില്ലെന്നും ഇത് പിന്തുണ സമാഹരിക്കാനുള്ള അവരുടെ ശ്രമങ്ങളെ ബാധിച്ചുവെന്നും അവർ പറഞ്ഞു. തെരഞ്ഞെടുപ്പിന് മുമ്പ് തന്നെ പ്രസാദ് പാർടിയുടെ കേന്ദ്ര തിരഞ്ഞെടുപ്പ് അതോറിറ്റിക്ക് (സിഇഎ) കത്തയച്ചിരുന്നു, അതിൽ കോൺഗ്രസ് പ്രതിനിധികളുടെ പട്ടിക പുറത്തുവിടാത്തതിനെക്കുറിച്ച് ചോദ്യങ്ങൾ ഉയർന്നിരുന്നു എന്നതാണ് പ്രത്യേകത.

ഇപ്പോഴത്തെ അവസ്ഥ

ഇപ്പോഴത്തെ അവസ്ഥയും സമാനമാണ്. കോൺഗ്രസിന്റെ 'ജി 23' ഗ്രൂപിൻറെ ഭാഗമായിരുന്ന തിവാരി പറഞ്ഞു, '28 പി സി സികൾക്കും എട്ട് ടി സി സികൾക്കും വേണ്ടിയല്ല കോൺഗ്രസ് പ്രസിഡന്റ് തിരഞ്ഞെടുപ്പ് പ്രഖ്യാപിച്ചത്. വോടർമാർ ആരാണെന്ന് അറിയാൻ രാജ്യത്തെ എല്ലാ പിസിസി ഓഫീസുകളിലും ഒരാൾ എന്തിന് പോകണം? ഒരു ക്ലബ് തിരഞ്ഞെടുപ്പിൽ പോലും ഇതിനെക്കാൾ ബഹുമാനത്തോടെയുള്ള നടപടിക്രമങ്ങളായിരിക്കും ഉണ്ടാകുക. നീതിയും സുതാര്യതയും ഉറപ്പാക്കാൻ വോടർ പട്ടിക മുഴുവൻ ഐഎൻസി വെബ്സൈറ്റിൽ പ്രസിദ്ധീകരിക്കാൻ അഭ്യർത്ഥിക്കുകയാണ്' , മനീഷ് തിവാരി ട്വീറ്റിൽ പറഞ്ഞു.

10 പേരുടെ പിന്തുണ ഉള്ള ആർക്കും തിരഞ്ഞെടുപ്പിൽ സ്ഥാനാർത്ഥികളാകാം എന്നാണ് നേതൃത്വം വ്യക്തമാക്കിയത്. എന്നാൽ വോടർ പട്ടിക പ്രസിദ്ധീകരിച്ചില്ലെങ്കിൽ നിങ്ങളെ പിന്തുണയ്ക്കുന്ന വോടർമാർ സാധുവല്ലെന്ന് ചൂണ്ടിക്കാണിച്ച് നാമനിർദ്ദേശ പത്രിക നിരസിക്കാൻ സാധിക്കില്ലേയെന്നും മനീഷ് തിവാരി കൂട്ടിച്ചേർത്തു.

മറുവശത്ത്, കോൺഗ്രസ് പ്രസിഡന്റ് തിരഞ്ഞെടുപ്പിൽ മത്സരിക്കാൻ ആലോചിക്കുന്ന എംപി ശശി തരൂർ തിവാരിയുടെ അഭിപ്രായത്തോട് യോജിക്കുകയും ആർക്കൊക്കെ വോട്ടുചെയ്യാമെന്ന് എല്ലാവരും അറിയണമെന്നും പറഞ്ഞു. കോൺഗ്രസ് എംപി കാർത്തി ചിദംബരവും തിവാരിയുടെ അഭിപ്രായത്തെ പിന്തുണച്ചു, എല്ലാ തെരഞ്ഞെടുപ്പുകളിലും കൃത്യമായി നിർവചിക്കപ്പെട്ട ഒരു വോടർ ഉണ്ടായിരിക്കണമെന്ന് അദ്ദേഹം വ്യക്തമാക്കി.

അടുത്തിടെ നടന്ന കോൺഗ്രസ് പ്രവർത്തക സമിതിയിലും തിരഞ്ഞെടുപ്പ് പ്രക്രിയയെ കുറിച്ച് ചോദ്യങ്ങൾ ഉയർന്നിരുന്നു. സംസ്ഥാന കോൺഗ്രസ് കമിറ്റിയിലെ 9,000 ത്തോളം പ്രതിനിധികളുടെ കാര്യത്തിൽ വ്യക്തതയില്ലെന്ന് പാർടി മുതിർന്ന നേതാവ് ആനന്ദ് ശർമ പറഞ്ഞിരുന്നു. കുറച്ച് ദിവസങ്ങൾക്ക് മുമ്പ്, ഹിമാചൽ പ്രദേശിലെ പാർടിയുടെ സ്റ്റിയറിംഗ് കമിറ്റിയിൽ നിന്നും അദ്ദേഹം രാജിവച്ചിരുന്നു. ജമ്മു കശ്മീർ മുൻ മുഖ്യമന്ത്രി ഗുലാം നബി ആസാദിന്റെ രാജിക്ക് പിന്നാലെ കോൺഗ്രസിൽ രാഷ്ട്രീയ കോളിളക്കം രൂക്ഷമായെന്നതാണ് പ്രത്യേകത.

Keywords: Row Over Congress President Election, Newdelhi, News, Top-Headlines, Latest-News, Congress, President Election, Political party, Vote.